އދ.ގެ އިންސާނީ ހައްޤުތަކާބެހޭ މަޖުލީހުގެ 42 ވަނަ ހިއުމަން ރައިޓްސް ކައުންސިލް ސެޝަން ސްވިޓްޒަރލޭންޑްގެ ޖެނީވާގައި ހުންނަ އ.ދ.ގެ މައި މަރުކަޒުގައި ފެށިއްޖެއެވެ.

3 ހަފްތާގެ މުއްދަތަށް ކުރިއަށްދާ ސެޝަން ނިމެނީ ސެޕްޓެމްބަރު މަހުގެ 27 ވަނަދުވަހު ކަމަށް ފޮރިން މިނިސްޓްްރީއިން އަންގާރަ ދުވަހު ނެރުނު ބަޔާނުގައި ވެއެވެ.

މި ސެޝަން ފަށްޓަވާ ދެއްވީ އިންސާނީ ހައްޤުތަކާބެހޭ މަޖިލީހުގެ ރައީސް، އެމްބެސެޑަރ ކޮލީ ސެކްއެވެ. އެމްބެސެޑަރ ކޮލީ ސެކް ވާހަކަފުޅުދައްކަވާފައިވާއިރު ހައިކޮމިޝަނަރ ފޮރ ހިޔުމަން ރައިޓްސް މިޝެއިލް ބެޝެލޭ ވަނީ ތަގުރީރު ކުރައްވާފައެވެ. މި ތަޤްރީރުގައި އަލިއަޅުވާލައްވާފައިވަނީ ދުނިޔޭގެ އެކިކަންކޮޅުތަކުގައި ހިންގަމުން އަންނަ އިންސާނީ ހައްޤުތަކާގުޅުން ހުރި މައްސަލަތަކާއި އެކަމަނާގެ އޮފީހުންކުރާ މަސައްކަތްތަކަށެވެ. މީގެއިތުރުން އެކަމަނާގެ ވާހަކަފުޅުގައި ދުނިޔެއަށް ކުރިމަތިވަމުންދާ މޫސުމީ ބަދަލުތަކަށް އަލިއަޅުވާލާފައިވެއެވެ. އަދި ގައުމުތަކުން ބައިނަލްއަގްވާމީ މައިދާނުގައި އިތުރަށް މަސައްކަތްކުރުމަށް ވެސް މިޝެއިލް ބެޝެލޭ ވަނީ ގޮވާލައްވާފައެވެ.

މި ކައުންސިލް ސެޝަންގައި ވެސް ދިވެހިރާއްޖެ އިން އެކިއެކި އެޖެންޑާ އައިޓަމްގެ ދަށުން ތަޤުރީރު ކުރައްވަން ހަމަޖެހިފައިވާއިރު މިޔަންމާގައި ރޮހިންގްޔާ ދަރިކޮޅުގެ މުސްލިމުންނާ ދޭތެރޭ ހިނގަމުން އަންނަ ލާ އިންސާނީ އަމަލުތައް ހުއްޓުވުމަށް ގޮވާލުމުގެ އިތުރުން، ސީރިއާ އަދި ޕަލަސްތީންގައި ހިނގަމުން އަންނަ އިންސާނީ ޙައްޤުތަކާ ޚިލާފް އަމަލުތައް ހުއްޓުވުމަށް ރާއްޖޭގެ ފަރާތުން ވާހަކަދެއްކުމަށް ވަނީ ހަމަޖެހިފައެވެ.

މީގެ އިތުރުން އެނުއަލް ޑިސްކަޝަން އޮން އިންޓިގްރޭޝަން އޮފް އަ ޖެންޑަރ ޕަރސްޕެކްޓިވް، ކްލަސްޓަރޑް ޑައިލޮގް އޮން އެންފޯސްޑް އެންޑް އިންވޮލޮންޓޮރީ ޑިސަޕިއަރެންސަސް އެންޑް ޓްރޫތް، ޖަސްޓިސް އެންޑް ރެޕެޓްރިއޭޝަން އެންޑް އިންޑިވިޑުއަލް އިންޓަރެކްޓިވް ޑައިލޮގް އާއި ވޯކިންގް ގްރޫޕް އޮފް އާބިޓަރީ ޑިޓެންޝަން ދަށުން ވެސް ވާހަކަދެއްކުމަށް ވަނީ ހަމަޖެހިފައެވެ.

42 ވަނަ ހިއުމަން ރައިޓްސް ކައުންސިލް ސެޝަންގައި ދިވެހިރާއްޖޭގެ ފަރާތުން ބައިވެރިވާ ވަފުދުގައި އިސްކޮށް ހުންނަވާނީ، ދިވެހިރާއްޖޭއިން ޖެނީވާގައި ހުންނަ އދ.ގެ އޮފީހަށް ކަނޑައަޅާފައި ހުންނަ ދާއިމީ މަންދޫބު، ޑރ. ހާލާ ޙަމީދެވެ. އަދި އެ އެކަމަނާއެކު، އެ އޮފީހުގެ ޑެޕިއުޓީ ޕާރމަނަންޓް ރެޕްރެސެންޓޭޓިވް، ޙަވްލާ އަޙްމަދު ދީދީ، ފަސްޓް ސެކްރެޓަރީ، ޝާހިޔާ އަލި މަނިކް އަދި މިނިސްޓްރީގެ ޑެސްކް އޮފިސަރ މުހައްމަދު ޝުޖާއު ބައިވެރިވާނެއެވެ

.ހިއުމަން ރައިޓްސް ކައުންސިލްއަކީ 47 މެންބަރުން ހިމެނޭ، ދުނިޔޭގެ އިންސާނީ ހައްޤުތައް ކުރިއެރުވުމަށް ބާރުއެޅުމަށް އަދި އެކަމާ ގުޅޭ އެންމެ އިސް މަޝްވަރާތަކާ ނިންމުންތައް ނިންމޭ މަޖްލީހެވެ.