ހާޒިރީގެ އެންމެ ފުލަށް މީދޫ ދާއިރާގެ މެމްބަރު ސިޔާމް
10 ސެޕްޓެމްބަރު 2019 | އަންގާރަ 08:11ސިޔާމް ވަޑައިގަތީ 16 ޖަލްސާއަށް
މީދޫ ދާއިރާގެ މެމްބަރު އަހުމަދު ސިޔާމް މުހައްމަދު
19 ވަނަ ރައްޔިތުންގެ މަޖިލީހުގެ ފުރަތަމަ ދައުރުގެ ހަޒިރީ އެންމެ ދަށް މެމްބަރަކީ މީދޫ ދާއިރާގެ މެމްބަރު އަހުމަދު ސިޔާމްކަމަށް ހާޒިރީ ރިޕޯޓުން ދައްކައިފި އެވެ.
އަންގާރަ ދުވަހު ރައްޔިތުންގެ މަޖިލީހުން އާންމުކޮށްފައިވާ ހާޒިރީގެ ތަފްސީލުތަކަށްބަލާއިރު މީދޫ ދާއިރާގެ މެމްބަރު ސިޔާމް ވަޑައިގެންފައިވަނީ ފުރަތަމަ ދައުރުގައި ބޭއްވުނު 47 ޖަލްސާގެ ތެރެއިން އެންމެ 16 ޖަލްސާއަށެވެ. 31 ޖަލްސާއަށް އެބޭފުޅާ ވަޑައިގަނެފައެއް ނުވެއެވެ.
މަޖިލިސް ޖަލްސާތަކުގެ ހާޒިރީ އެހެން އަހަރުތަކޭ ބަލާއިރު ބޮޑުތަނުން ރަނގަޅުވެފައިވާއިރު ކޯރަމް ހަމަނުވެގެން ޖަލްސާގެ ވަގުތު ފަސްކޮށްފައެއްވެސް ނުވެއެވެ. މަޖިލިސް އިންތިހާބުގައި އެމްޑީޕީން ވަނީ ރައްޔިތުން ދިން ސުޕަރ މެޖޯރިޓީއާއި އެކު ނަމޫނާ ދައްކައިފައެވެ. އެގޮތުން އެމްޑީޕީ ތަމްސީލްކުރާ ހުރިހާ މެމްބަރުންވެސް ޖަލްސާތަކަށް ވަޑައިގެންފައިވާއިރު މަޖިލީހަށް މެމްބަރުން ހާޒިރުވެފައިނުވަނީ ރަސްމީ ދަތުރުފުޅެއް ނުވަތަ މަޖިލީހުގެ ދަތުރުފުޅެއްގައި އުޅުއްވާތީއެވެ.
މަޖިލިސް ޖަލްސާތަކަށް ބަރާބަރަށް ވަޑައިގެންނެވި މެމްބަރުންގެ ތެރޭގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި، ނައިބް ރައީސް އީވާ ޢަބްދުﷲ ހިމެނިވަޑައިގަންނަވައެވެ. ރަސްމީ ބޭނުމެއްގައި ފިޔަވައި ޖުމްލަ 47 ޖަލްސާއަށް ވަޑައިގެންފައިވަނީ ހަމައެކަނި 37 މެމްބަރުންނެވެ.
ޕާޓީތަކުގެ ޕީޖީ ލީޑަރުންނަށް ބަލާއިރު، އެމްޑީޕީގެ ޕީޖީ ލީޑަރު މެދު ހެންވޭރު ދާއިރާގެ މެމްބަރު އަލީ އާޒިމް ހުރިހާ ޖަލްސާތަކަށް ވަޑައިގެންފައިވާއިރު ޖުމްހޫރީ ޕާޓީގެ ލީޑަރު ގާސިމް އިބްރާހިމް 5 ޖަލްސާއަށް ވަޑައިގަންނަވާފައެއް ނުވެ އެވެ. އަދި 4 ޖަލްސާއަށް ވަނީ ސަލާމް ބުނެފައެވެ. ޕީޕީއެމް ޕީޖީ ލީޑަރ އޭދަފުށީ ދާއިރާގެ މެމްބަރު އަހުމަދު ސަލީމް 9 ޖަލްސާއަށް ވަޑައިގަނެފައެއް ނުވެއެވެ. ޕީއެންސީގެ ޕީޖީ ލީޑަރ މަޑުއްވަރީ ދާއިރާގެ މެމްބަރު އާދަމް ޝަރީފް އުމަރު ހުރިހާ ޖަލްސާތަކަށް ވަޑައިގެންނެވިއެވެ.
މިދިޔަ ބުދަ ދުވަހު ނިމުނު 19 ވަަނަ މަޖިލީހުގެ ފުރަތަމަ ދައުރު ނިމުމާއި ގުޅިގެން މަޖިލީހުގެ އިދާރާގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މަޖިލީހުގެ ރައީސް ވިދާޅުވީ، 19 ވަނަ މަޖިލީހުގެ ފުރަތަމަ ދައުރުގައި ގިނަ މަސައްކަތްތަކެއް ކުރެވިފައިވާ ކަމަށާއި ފުރަތަމަ ދައުރުގެ މަސައްކަތަށް ދޭނީ ''ބީ ޕްލަސް'' އެއް ކަމަށެވެ.
