ދިވެހިރާއްޖެ އާއި ރުވާންޑާ އާ ދެމެދު ސިޔާސީ ގުޅުން ގާއިމްކޮށްފި
6 ސެޕްޓެމްބަރު 2019 | ހުކުރު 17:38މިއީ މި ސަރުކާރުގައި ސިޔާސީ ގުޅުން ޤާއިމްކުރެވުނު ދެވަނަ ގައުމު
ދިވެހިރާއްޖެ އާއި ރުވާންޑާ އާއި ދެމެދު ސިޔާސީ ގުޅުން ގާއިމް ކުރުމުގެ އެއްބަސްވުމުގައި ސޮއިކުރައްވަނީ
ދިވެހިރާއްޖެ އާއި ރުވާންޑާ އާއި ދެމެދު ސިޔާސީ ގުޅުން ގާއިމް ކޮށްފިއެވެ.
ދެ ގައުމުގެ ދެމެދުގައި ސިޔާސީ ގުޅުން ޤާއިމް ކުރުމަށްޓަކައި ދެ ގައުމުގެ ދެމެދުގައި އެކުލަވާލެވުނު ގުޅިފައިވާ ބަޔާނުގައި ސޮއިކުރުން އޮތީ ނިއުޔޯކްގައި ހުންނަ ރުވާންޑާގެ ދާއިމީ މިޝަންގައި ހުކުރު ދުވަހު ބޭއްވި ޚާއްސަ ރަސްމިއްޔާތެއްގައެވެ.
ދިވެހިރާއްޖޭގެ ފަރާތުން މި ލިޔުމުގައި ސޮއިކުރެއްވީ ދިވެހިރާއްޖެއިން އދ. އަށް ކަނޑައަޅުއްވަފައި ހުންނަވާ ދާއިމީ މަންދޫބު ތިލްމީޒާ ހުސައިންއެވެ.
ރުވާންޑާގެ ފަރާތުން ސޮއިކުރެއްވީ ރުވާންޑާގެ ފަރާތުން އދ އަށް ކަނޑައަޅުއްވަފއި ހުންނަވާ އެގައުމުގެ ދާއިމީ މަންދޫބު ވެލެންޓައިން ރުގްވަބިޒާއެވެ.
ރާއްޖެއާއި އެކު ގުޅުން ބަދަހިކުރަން ބޭނުންވާ ހުރިހާ ގައުމުތަކާއި އެކު ޚާރިޖީ ގުޅުންތައް ޤާއިމްކޮށް ރާއްޖެއަކީ ބޭރުގައުމުތަކުން ބަލައިގަންނަ ގައުމަކަށް ހެދުމަކީ ރައީސް އިބްރާހިމް މުހައްމަދު ސާލިޙުގެ ހުޅުވާލެވިފައިވާ ޚާރިޖީ ސިޔާސަތުގެ މުހިއްމު އެއް އަމާޒެވެ.
މިގޮތުން ރުވާންޑާއާއި އެކު ސިޔާސީ ގުޅުން ޤާއިމުކުރެވުމުން ރާއްޖެ އާއި އެކު ސިޔާސީގުޅުން އޮންނަ ގައުމުތަކުގެ އަދަދަކީ 172 އެވެ. އަދި މިއީ މި ސަރުކާރުގައި ސިޔާސީ ގުޅުން ޤާއިމްކުރެވުނު ދެވަނަ ގައުމެވެ.
ރުވާންޑާ އަކީ ކޮމަންވެލްތްގެ ގައުމެކެވެ. 2020 ވަނަ އަހަރުގެ ކޮމޮންވެލްތް ގައުމުތަކުގެ އިސްވރިންގެ ބައްދަލުވުން ބޭއްވުމަށް ހަމަޖެހިފައިވަނީވެސް ރުވާންޑާގެ ވެރިރަށް ކިގާލީގައެވެ.
