ތޫފާން ޑޯރިއަން ގައި މަރުވި މީހުންގެ އަދަދު 23 އަށް އަރައިފި

ބަހާމަސްގެ ތާރިހުގައި މިހާތަނަށް އެގައުމަށް އެރި އެންމެ ވަރުގަދަ އެއް ތޫފާން ކަމަށްވާ ''ޑޯރިއަން'' ތޫފަންގައި މަރުވި މީހުންގެ އަދަދު 23 އަށް އަރައިފިއެވެ.

ބީބީސީގައި ރިޕޯރޓްކޮށްފައިވާގޮތުން ތޫފާން ޑޯރިއަންގައި މަރުވި މީހުންގެ އަދަދު 23 އަށް އަރާފައިވާއިރު، މި އަދަދު އިތުރުވުން އެކަށީގެންވެއެވެ. އެގޮތުން ތޫފާން މިހާރު އެމެރިކާގެ ކެރޮލީނާއަށް މިސްރާބު ޖަހާފައިވާއިރު، ތޫފާނުގެ ސަބަބުން 100 އަށްވުރެ ގިނަ މީހުން ވީނުވީއެއް ނޭނގި ގެއްލިފައިވާކަމަށް ރިޕޯރޓްތައް ބުނެއެވެ.

ތޫފާނުގެ ސަބަބުން ފްލޮރިޑާގެ އައްސޭރިފަށާއި، ޖޯޖިއާ ސްޓޭޓްގެ އުތުރާއި ދެކުނުގެ އަދި ކެރޮލީނާ ސަރަހައްދުގައި ދިރިއުޅޭ ދެ މިލިއަނެއްހާ މީހުން އެ ސަރަހައްދު ދޫކޮށް ދިއުމަށް އިންޒާރު ދީފައިވާއިރު، މި ތޫފާން ބަހަމާސްއަށް އަރާފައިވަނީ ކެޓެގަރީ 5 ގެ ބާރުމިނުގައި ކަމަށާއި، ވައިގެ ބާރުމިންވެސް ހުރީ މިހާތަނަށް އެ ސަރަހައްދުން ރެކޯރޑް ކުރެވުނު އެންމެ މަތީ އަދަދަކަށް ކަމަށް ރިޕޯރޓްތައް ބުނެއެވެ.

ތޫފާނުގެ ސަބަބުން ބަހަމާސްގެ 13،000 އަށްވުރެ ގިނަ ގެތައް ހަލާކުވެފައިވާއިރު، ބައެއް ސަރަހައްދުތަކަށް 89 ސެންޓިމީޓަރުގެ ވާރޭ ވެހިފައިވާކަމަށް ރިކޯރޑް ކުރެވިފައިވެއެވެ. އެގޮތުން އެކި ޤައުމުތަކުން އެހީތައް ފޯރުކޮށްދެމުންގެންދާއިރު، މީހުން ސަލާމަތް ކުރުމުގެ މަސައްކަތް ރެސްކިއު ޓީމްތަކުން ދަނީ ހުއްޓުމެއް ނެތި ކުރަމުންނެވެ.

މި ތޫފާނުގެ ސަބަބުން ހާލުގައި ޖެހިފައިވާ 76000 އަށްވުރެ ގިނަ މީހުންނަށް ކަބޯތަކެއްޗާއި އެމަރޖެންސީ ސަޕްލައިތައް ފޯރުކޮށްދިނުމުގެ މަސައްކަތް ދަނީ ކުރަމުންނެވެ.