ކިއެލިނީ އަށް 6 މަސް ދުވަހަށް ކުޅުމާއި ދުރަށް ދާން ޖެހިއްޖެ

ޔުވެންޓަސް އަދި އިޓަލީގެ ކެޕްޓަން ކިއެލިނީ އަށް އަނިޔާވެ ހަމަސް ދުވަހަށް ކުޅުމާއި ދުރައް ދާން ޖެހިފައިވާ ކަމަށް މީޑިއާ ރިޕޯޓްތައް ބުނެފިއެވެ.

މީޑިއާ ރިޕޯޓްތައް ބުނާ ގޮތުން އަންގާރަ ދުވަހު ކިއެލިނީގެ ކަކޫ އޮޕަރޭޝަން ކޮށްފައިވާއިރު އެންމެ ފަހުން ހެދުނު ޓެސްޓްތައް ދައްކާ ގޮތުން ކިއެލިނީ އަށް ދެން އެންމެ އަވަހަށް ވެސް ކުޅެވޭނީ އަންނަ އަހަރުގެ މާޗް މަހުގައެވެ.

ޔުވެންޓަސް އިންބުނީ ކިއެލިނީއަށް އަނިޔާވެ އޭނާ އޮޕަރޭޝަނެއް ކޮށްފައިވާ ކަމަށާއި އޭނާގެ އަނިޔާ ވަރަށް ސީރިއަސް ކަމަށެވެ.

ކިއެލީނީގެ ބަދަލުގައި، ޔުވެންޓަސް އަދި އިޓަލީގެ ކެޕްޓަން ކަމުގެ ޒިންމާ ނަގާނީ ލިއޮނާޑޯ ބޮނޫޗީ އެވެ. އަދި ބޮނޫޗީއާ އެކު، ޔުވެންޓަސްގެ ޑިފެންސަށް ދެން ކުޅޭނީ މި ސީޒަނުގައި ގެނައި ނެދަލެންޑްސް ޑިފެންޑަރު މަތިއަސް ޑި ލީޓް އެވެ.

އަނިޔާގެ ސަބަބުން ކިއެލީނީ އަށް އިޓަލީގެ މުހިއްމު މެޗުތަކެއް ގެއްލޭނެއެވެ. ޔޫރޯ ކޮލިފައިންގައި ވާދަކުރާ އިޓަލީ ސްކޮޑަށް އޭނާގެ ބަދަލުގައި ނަގާފައިވަނީ ލާޒިއޯގެ ފްރެންސެސްކޯ އެސެރެބީ އެވެ.

މި އަނިޔާގެ ސަބަބުން ކިއެލީނީއަށް މުހިންމު ގިނަ މެޗުތަކެއް ގެއްލޭއިރު، ޔޫރޯ ކޮލިފައިންގައި އިޓަލީން ކުޅޭ ގިނަ މެޗުތަކެއްވެސް އޭނާއަށް ގެއްލޭނެއެވެ.

ލިވޯނޯ، ރޯމާ އަދި ފިއޮރެންޓީނާ އަށް ވެސް ކުޅެފައިވާ ކިއެލީނީ އަކީ ޔުވެންޓަސްގައި މުހިންމު ދައުރެއް އަދާކުރަމުން އަންނަ ކުޅުންތެރިއެކެވެ. އަދި ގައުމީ ޓީމަށް 2005 އިން ފެށިގެން 103 މެޗު އޭނާ ވަނީ ކުޅެދީފަ އެވެ