ދިވެހިރާއްޖޭގެ ވަށައިގެން މިއޮތް ކަނޑަކީ މި ގައުމުގެ ދިރުން ކަމަށާއި ހަމައެއާއެކު އެއީ މިގައުމަށް ބޭނުންވާ ކާބޯތަކެތި ލިބޭ އެންމެ ބޮޑު ވަސީލަތް ކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.

ބުދަ ދުވަހުން ބުރާސްފަތި ދުވަހުގެ ނިޔަލަށް ކުރިއަށްގެންދާ އިންޑިއަން އޯޝަން ކޮންފަރެންސްގެ ފެށުމުގެ ރަސްމިއްޔާތުގައި ވާހަކަ ދައްކަވަމުން ޝާހިދު ވިދާޅުވީ ރާއްޖެއަކީ ފަސްމަދު ނަމަވެސް ކަނޑުގެ ސަރަހައްދު ބޮޑު ގައުމެއް ކަމަށެވެ.

ރާއްޖެ ރަމްޒުކޮށްދެނީ ރާއްޖޭގެ ވަށައިގެން އޮތް ކަނޑު ކަމަށް ވިދާޅުވަމުން އެމަނިކުފާނު ވިދާޅުވީ ރާއްޖެއަށް ޒިޔާރަތް ކުރުމަކީ އިންޑިއާ ކަނޑަށް އައުން ކަމަށެވެ.

މޫސުމަށް އަންނަ ބަދަލުތަކާއި ކަނޑުފޭރުން ފަދަ ކަންކަމުގެ، ސީރިއަސްކަން ރާއްޖޭގެ ސަރަހައްދު ބެލުމުން އެނގިގެންދާނެ ކަމުގައި ޝާހިދު ވިދާޅުވިއެވެ.

ކަނޑުގެ ލޮނުގަނޑު އުފެދުމަކީ ގިނަ ދިރުންތަކެއް ނެތިގެންދިއުމަށް މަގުފަހިވާ ކަމެއް ކަމަށާއި އެކަމުގެ ސަބަބުން އަހަރެމެން ކައިއުޅޭ ކާބޯތަކެއްޗަށް ވެސް ނޭދެވޭ އަސަރު ކުރާ ކަމަށް އޭނާ ވިދާޅުވިއެވެ.

ކަނޑުން ލިބިދޭ ވަސީލަތްތަކުގެ ހެޔޮ ބޭނުން ހިފުމަކީ އިގްތިސާދަށް ވެސް ހުރި މުހިއްމު ކަމެއް ކަމަށް އޭނާ ވިދާޅުވިއެވެ.