ގަވާއިދާ ހިލާފަށް ގާޑިޔާ ހިންގާނަމަ ފިޔަވަޅު އަޅާނަން: އައްޑޫ ކައުންސިލް
3 ސެޕްޓެމްބަރު 2019 | އަންގާރަ 17:17ގަވާއިދާ ހިލާފަށް ވިޔަފާރި ހިންގާ ކަމުގެ ޝަކުވާ ލިބޭ
ގާޑިޔާތަކެއް
ގާޑިޔާ ހިންގަމުންދާ ފަރާތްތަކުން ގަވާއިދާއި އެއްގޮތަށް އަމަލުތައް ބެހެއްޓުމަށާއި ގަވާއިދާ ހިލާފަށް ވިޔަފާރި ހިންގާ ފަރާތްތަކާ މެދު ފިޔަވަޅު އަޅާނެ ކަމަށް އައްޑޫ ސިޓީ ކައުންސިލުން އިލްތިމާސްކޮށްފިއެވެ.
އައްޑޫ ސިޓީ ކައުންސިލުން ބުނީ ވިޔަފާރި ރަޖިސްޓްރީ ކުރުމުގެ ޤާނޫނުގައިވާ ގޮތުގެ މަތިން އަމިއްލަ ފަރުދުންގެ ވިޔަފާރި ރަޖިސްޓަރީ ކުރުމަށްފަހު، ކުރަން އެދޭ ވިޔަފާރިއަކީ ސަރުކާރުގެ ކަމާބެހޭ އިދާރާއަކުން ހުއްދަ ހޯދަންޖެހޭ ވިޔަފާރިއެއް ނަމަ، އެވިޔަފާރިއެއް ކުރަންވާނީ ސަރުކާރުގެ ކަމާއި ބެހޭ އިދާރާއަކުން ހުއްދަ ނަގައިގެން ކަމަށް ގާނޫނުގައި ބަޔާންކޮށްފައިވާ ކަމަށެވެ.
ކައުންސިލުން ބުނީ އަމިއްލަ ފަރުދުންގެ ވިޔަފާރިއަށް ރަޖިސްޓްރީ ކުރުމަށްފަހު ގާޑިޔާ ހިންގަމުންދާ ފަރާތްތަކުން ގަވާއިދާއި އެއްގޮތަށް އަމަލުތައް ބެހެއްޓުމަށާއި ހެދިފައިވާ ގަވާއިދުތަކަށް ސަމާލުކަން ދިނުމަށް އިލްތިމާސް ކުރާ ކަމަށާއި، ގާޑިޔަލުން ވިއްކޭނީ ކުރުނބާ، ދުފުމަށް ބޭނުންވާ ސާމާނު،ހެދިކާގެ ބާވަތްތަކުގެ ތެރެއިން ގިނަ ދުވަހަށް ބޭނުންކުރެވޭ ގޮތަށް ތައްޔާރުކޮށް ލޭބަލްކޮށްފައިވާ ތަކެތި، މަސްކާށި، މަސްކުރޮޅި އަދި ދަނޑުވެރިކަމުން އުފައްދާ ތަކެތި ފަދަ ބާވަތްތައް ކަމަށެވެ. ނަމަވެސް، ގާޑިޔާ ބަހައްޓައިގެން ވިޔަފާރި ކުރާ ފަރާތްތަކުން ގާޑިޔަލުން ހިންގޭނެ ވިޔަފާރިއަށް ވުރެ ފުޅާ ދާއިރާގެ ވިޔަފާރި ހިންގަމުންދާކަމުގެ ޝަކުވާ ލިބެމުންދާ ކަމަށާއި، ގާޑިޔަލުން އިމްޕޯރޓް މުދާ، ކޮފީ އަދި ކާބޯތަކެތި ތައްޔާރުކޮށްގެން ނުވިއްކޭނެ ކަމަށް އައްޑޫ ކައުންސިލުން ބުންޏެވެ.
ކައުންސިލުން ބުނީ ވިޔަފާރި ހިންގާ ތަންތަނާއި ގާޑިޔާތައް ޗެކްކޮށް އިންސްޕެކްޓް ކުރުމުގެ މަސައްކަތް އަވަށު އޮފީސްތަކުން ކުރަމުން ދާއިރު ގާޑިޔާ ހިންގާ ފަރާތްތަކުންވެސް މިކަމަށް ސަމާލުކަން ދިނުމަށް އިލްތިމާސް ކުރާ ކަމަށެވެ.
ކައުންސިލުން ބުނީ ގަވާއިދާއި އެއްގޮތަށް ނުހުންނަ ތަންތަނާއިމެދު އަޅަންޖެހޭ ފިޔަވަޅުތައް އެއިދާރާއިން އަޅަމުންދާނެ ކަމަށެވެ.
