ރެއާލް މެޑްރިޑް ދޫކޮށް އެ ކްލަބަށް ކުޅެމުން އައި ކޮސްޓަރިކާގެ ކީޕަރ ކޭލޯ ނަވާސް ޕެރިސް ސެއިންޓް ޖާމަން (ޕީއެސްޖީ) އަށް ބަދަލުވެއްޖެއެވެ.

އުމުރުން 32 އަހަރުގެ ނަވާސް ޕީއެސްޖީއަށް ބަދަލުވެފައިވަނީ 15 މިލިއަން ޔޫރޯގެ އަގަކަށް ހަތަރު އަހަރުގެ އެއްބަސްވުމެއްގެ ދަށުންނެވެ. އޭނާ ވެގެންދާނީ އެ ކްލަބަށް ކުޅޭ ފުރަތަމަ ކޮސްޓަރިކާ ކުޅުންތެރިޔާ އަށެވެ.

ރިޕޯޓްތައް ބުނާގޮތުން ނަވާސް ރެއާލް ދޫކޮށްލީ އެ ކްލަބާމެދު ހިތްހަމަ ނުޖެހިގެންނެވެ. އަދި އޭނާ ހިތްހަމަނުޖެހުނީ ފުރަތަމަ 11 އިން ފުރުސަތު ލިބުން މަދުވުމުން ކަމަށްވެސް ރިޕޯޓްތައް ބުނެއެވެ.

ނަވާސް ޕީއެސްޖީއަށް ބަދަލުވީ އޭނާ ރެއާލްއާއެކު ހަދާފައިވާ އެއްބަސްވުން 2020 ގައި ހަމަވާގޮތަށް އޮއްވައެވެ. އޭނާ ހޯދުމަށް ޕީއެސްޖީގެ އިތުރުން މި ޓްރާންސްފާގައި ގިނަ ކްލަބްތަކަކުން ވަނީ މަސައްކަތް ކޮށްފައެވެ.

ލެވެންޓޭ ދޫކޮށްލުމަށް ފަހު ނަވާސް ރެއާލް އަށް ބަދަލުވީ 2014 ވަނަ އަހަރުގެ ސީޒަނުގައެވެ. އެގޮތުން އޭނާ ވަނީ މިހާތަނަށް އެޓީމަށް 162 މެޗު ކުޅެ، އެޓީމާއެކު ސްޕެނިޝް ލަލީގާ، ސްޕެނިޝް ސުޕާ ކަޕް، ޔުއެފާ ޗެމްޕިއަންސް ލީގު ތިންފަހަރު، ޔުއެފާ ސުޕާ ކަޕް ދެފަހަރު އަދި ކްލަބް ވޯލްޑް ކަޕް ތިން ފަހަރު ހޯދާފައެވެ.

ބްރެޒިލްގައި 2014 ވަނަ އަހަރު ބޭއްވި ވޯލްޑްކަޕުން ވިދާލި ކޮސްޓަރިގާ ގައުމީ ޓީމުގެ ނަވާސް ވަނީ އެޓީމަށް މިވީތަނަށް 86 މެޗު ކުޅެދީފައެވެ. އޭނާ ވަނީ 2014 ވަނަ އަހަރު ކޮންކާކަފްގެ އެންމެ މޮޅު ކުޅުންތެރިޔާގެ މަގާމު ވެސް ހޯދާފައެވެ.