ލަންކާއަށް ދަތުރުކުރާ ދިވެހިންނަށް ތިން މަސްދުވަހުގެ އޮންއެރައިވަލް ވިސާ ހަމަޖެއްސުމުގެ އެއްބަސްވުމުގައި ސޮއިކޮށްފި
ފަސް އެމްއޯޔޫއެއްގައި ވަނީ ސޮއިކޮށްފައި
ރަނިލް ވިކްރަމަސިންހައަށް ރަސްމީ ގޮތުން މަރްހަބާ ދެންނެވުމުގެ ހަރަކާތްތައް ބާއްވާފައިވަނީ ޖުމްހޫރީ މައިދާނުގައި
ސްރީލަންކާއަށް ދަތުރުކުރާ ދިވެހިންނަށް 90 ދުވަހުގެ އޮންއެރައިވަލް ވިސާ ލިބޭ އެއްބަސްވުމެއްގައި ދެ ގައުމުގެ ދެ މެދުގައި ސޮއިކޮށްފިއެވެ.
މި އެއްބަސްވުމުގައި ސޮއިކުރައްވާފައިވާފައި ވަނީ ސްރީލަންކާގެ ބޮޑުވަޒީރު ރަނިލް ވިކްރަމަސިންހަ މިހާރު ރާއްޖެއަށް ކުރައްވަމުންގެންދަވާ ދަތުރުފުޅުގެ ތެރެއިންނެވެ. މި އެއްބަސްވުމުގެ ދަށުން ސްރީ ލަންކާއަށް ދަތުރުކުރާ ދިވެހީންނަށް 90 ދުވަހުގެ އޮންއެރައިވަލް ވިސާ ހިލޭ ހަމަޖެހިގެންދާނެއެވެ. މީގެ އިތުރުން ދެޤައުމުގައިވެސް ވިޔަފާރިކުރަން ބޭނުންވާ ފަރާތްތަކަށް މަލްޓިޕްލް އެންޓްރީ ބިޒްނަސް ވިސާ މި އެއްބަސްވުމުގެ ދަށުން ހަމަޖެހިގެންދާނެއެވެ. ރައީސް އޮފީހުން ބުނީ ލަންކާގައި ތައުލީމު ހާސިލުކުރާ އަށާރަ އަހަރުން ދަށުގެ ދިވެހި ދަރިވަރުންނާއި އެދަރިވަރުންގެ މައިންބަފައިންނާއި ބެލެނިވެރިންނަށް ވިސާގެ އެއްބަސްވުމަށް ގެނެވުނު ލުއިފަސޭހަކަމުގެ ބޭނުން ހިފިގެންދާނެ ކަމަށެވެ. ”އެގްރީމަންޓް އޮން ފެސިލިޓޭޝަން އޮފް ވިސާ އެރޭންޖްމެންޓްސް" ގެ ނަމުގައި ބަދަލުކުރެވުނު މި އެއްބަސްވުމާއެކު 2008 ވަނަ އަހަރު ދެޤައުމުގެ މެދުގައި ވެވިފައިވާ ވިސާއާބެހޭ އެއްބަސްވުމަށް އިސްލާހު ގެނެވިގެންދާނެ ކަމަށް ރައީސް އޮފީހުން ވަނީ ބުނެފައެވެ.
މީގެ އިތުރުން ވެސް ދެ ޤައުމުގެ ދެމެދުގައި ވަނީ ހަތަރު އެމްއޯޔޫއެއްގައި ސޮއި ކޮށްފައެވެ. އޭގެ ތެރޭގައި ހިމެނެނީ "އެމްއޯޔޫ އޮން ހަޔަރ އެޑިއުކޭޝަން އެންޑް ވޯޓަރ ސެކްޓަރ ކޯޕަރޭޝަން"، "އެމްއޯޔޫ އޮން ސޯޝަލް ޕްރޮޓެކްޝަން" އަދި "އެމްއޯޔޫ ފޮރ ވޮކޭޝަނަލް ޓްރެއިނިންގ އެންޑް ޔޫތް ޑިވެލޮޕްމަންޓް" އެއްބަސްވުމެވެ. "އެމްއޯޔޫ އޮން ހަޔަރ އެޑިއުކޭޝަން" އެއްބަސްވުމަކީ ރާއްޖެއާއި ސްރީލަންކާގެ ދަރިވަރުންނަށް ތަޢުލީމީ ފުރުސަތުތައް ފަހިކޮށްދީ ޚާއްސަކޮށް ފެނާއި ގުޅުންހުރި ދާއިރާތަކުން ކަމާގުޅޭ މާހިރުންގެ ލަފަޔާ އިރުޝާދާ އެކީ ކަންކަމުގެ މަޢުލޫމާތު ބަދަލުކުރުމަށް ވެވުނު އެއްބަސްވުމެކެވެ.
"އެމްއޯޔޫ އޮން ސޯޝަލް ޕްރޮޓެކްޝަން" އެއްބަސްވުމަކީ އިޖްތިމާއީ ރައްކާތެރިކަމުގެ ދާއިރާއިން ދެޤައުމުގެ މެދުގައި އެއްބާރުލުން ދިނުމާއެކު މިރޮނގުން އެންމެ ނާޒުކު ފަރާތްތައް ކަމަށްވާ ކުޑަކުދިންނާއި، ދުވަސްވީ މީހުންގެ އިތުރުން، ނުކުޅެދުންތެރިކަން ހުންނަ ފަރާތްތަކަށް އެހީތެރިކަން ފޯރުކޮށްދިނުމާއި ބެހޭގޮތުން ވެފައިވާ އެއްބަސްވުމެވެ.
"އެމްއޯޔޫ ފޮރ ވޮކޭޝަނަލް ޓްރެއިނިންގ އެންޑް ޔޫތް ޑިވެލޮޕްމަންޓް" ގެ ނަމުގައި ބަދަލު ކުރެވުނު އެއްބަސްވުމަކީ ޒުވާނުންނަށް އަމާޒުކޮށްގެން މަޢުލޫމާތު ބަދަލުކުރުމާއި، ގުޅިގެން މަސައްކަތްކުރުމާއި، އިސްނެގުމާއި ހިންގުމުގެ ހުނަރު ތަރައްޤީ ކުރުމަށް ފަންނީ އަދި ވޮކޭޝަނަލް ތަމްރީންތައް ހިންގުމަށް ވެވުނު އެއްބަސްވުމެކެވެ. އަދި، މި އެއްބަސްވުމުގެ ދަށުން ދެޤައުމުގެ ދެމެދުގައި ތާރީޚާއި ސަޤާފަތް ދިރުވާ އާލާކުރުމާ، ބަހާއި އާދަކާދައިގެ ތެރެއިން ޢިލްމީ ދިރާސާތައް ހެދުންވެސް ހިމެނޭނެއެވެ.
ބޮޑުވަޒީރު ރަނިލް ވިކްރަމަސިންހަ ހޯމަ ދުވަހު ރާއްޖެ ވަޑައިގެންފައިވާއިރު، މަޖިލީހުގަ އެ މަނިކުފާނު ތަގުރީރު ކުރެއްވުމަށް ހަމަޖެހިފައިވަނީ އަންގާރަދުވަހުގެ ހެނދުނު 9:30 ގައެވެ. އަދި މީގެ އިތުރުން ރާއްޖޭގައި މާދަމާ ފަށާ އިންޑިއަން އޯޝަން ކޮންފަރެންސް 2019 ގައި ވެސް އެ މަނިކުފާނު ބައިވެރިވެވަޑައިގަންނަވާނެ އެވެ.
