ޔުވެންޓަސްގެ ކެޕްޓަން ކިއެލިނީއަށް އަނިޔާވެ ކުޅުމާ ދުރަށް!
ކިއެލިނީ އަށް އަނިޔާވީ ފަރިތަކުރުންތަކުގެ ތެރެއިން
ކިއެލިނީ
ޔުވެންޓަސް އަދި އިޓަލީގެ ކެޕްޓަން ޖީއޯޖިއޯ ކިއެލިނީއަށް އަނިޔާވެ މަހެއްހާދުވަހަށް ކުޅުމާއި ދުރަށް ދާން ޖެހިއްޖެއެވެ.
ކިއެލިނީ އަށް އަނިޔާވީ ހުކުރު ދުވަހު ކުރިޔަށްދިޔަ ފަރިތަކުރުން ތަކުގެ ތެރޭގައެވެ. މީޑިއާ ރިޕޯޓްތައް ބުނާ ގޮތުން ކިއެލިނީގެ ކަނާތު ކަކުލުގެ ލިގަމެންޓަށް ވަނީ ސީރިއަސް އަނިޔާއެއް ވެފައެވެ.
ޔުވެންޓަސް އިންބުނީ ކިއެލިނީގެ އަނިޔާވެ އޭނާ އޮޕަރޭޝަންއެއް ކުރަން ޖެހޭ ކަމަށާއި އޭނާގެ އަނިޔާ ވަރަށް ސީރިއަސް ކަމަށެވެ. އަދި އޭނާ ކުޅުމަށް އެނބުރި އަންނަން ނަގާނެ ދުވަހެއް ނޭނގޭ ކަމަށާއި ލަފާކުރެވޭ ގޮތުގައި މަހެއްހާ ދުވަހު ކުޅުމާއި ދުރުގައި އޭނާ ހުންނަން ޖެހޭނެކަމަށެވެ.
ކިއެލީނީގެ ބަދަލުގައި، ޔުވެންޓަސް އަދި އިޓަލީގެ ކެޕްޓަން ކަމުގެ ޒިންމާ ނަގާނީ ލިއޮނާޑޯ ބޮނޫޗީ އެވެ. އަދި ބޮނޫޗީއާ އެކު، ޔުވެންޓަސްގެ ޑިފެންސަށް ދެން ކުޅޭނީ މި ސީޒަނުގައި ގެނައި ނެދަލެންޑްސް ޑިފެންޑަރު މަތިއަސް ޑި ލީޓް އެވެ.
އަނިޔާގެ ސަބަބުން ކިއެލީނީ އަށް އިޓަލީގެ މުހިއްމު މެޗުތަކެއް ގެއްލޭނެއެވެ. ޔޫރޯ ކޮލިފައިންގައި ވާދަކުރާ އިޓަލީ ސްކޮޑަށް އޭނާގެ ބަދަލުގައި ނަގާފައިވަނީ ލާޒިއޯގެ ފްރެންސެސްކޯ އެސެރެބީ އެވެ.
