ނައިބުރައީސް ކޮޅުމަޑުލު އަތޮޅު ކައުންސިލާ ބައްދަލު ކުރައްވައިފި

ނައިބްރައީސް ފައިސަލް ނަސީމް ކޮޅުމަޑުލު އަތޮޅު ކައުންސިލަރުންނާ ބައްދަލު ކުރައްވައިފިއެވެެ.

އާދިއްތަ ދުވަހު ރައީސް އޮފީހުގައި ބޭއްވި މި ބައްދަލު ކުރެއްވުމުގައި ކޮޅުމަޑުލުގެ ތަރައްޤީއާ ގުޅޭގޮތުން މަޝްވަރާ ކުރައްވާފައިވާއިރު، ކައުންސިލަރުން ވަނީ ރައްޔިތުންގެ ކަންބޮޑުވުންތައް ވެސް ނައިބްރައީސްއާ ހިއްސާ ކުރައްވާފައެވެ.

މި ބައްދަލުކުރެއްވުމުގައި އެންމެ މުހިއްމު އެއްކަމެއްގެ ގޮތުން ކައުންސިލަރުން ވަނީ އަތޮޅުގެ 13 ރަށުގެ ސިއްހީ ޚިދުމަތުގެ ފެންވަރު ރަނގަޅުކުރުމާއި، ހުރިހާ ރަށަކުން ވެސް 24 ގަޑިއިރު ބޭސް ލިބޭނެ އިންތިޒާމް ހަމަޖެއްސުމާ ގުޅޭގޮތުން މަޝްވަރާ ކުރައްވާފައެވެ.

އޭގެ އިތުރުން، ސީ އެމްބިއުލާންސްގެ ޚިދުމަތުގައި ހުރި މައްސަލަތަކާއި، ރައްޔިތުންގެ ހުރި ކަންބޮޑުވުންތައް ނައިބްރައީސްއާ ހިއްސާ ކުރައްވާފައިވާއިރު، އަތޮޅުގެ ރަށްރަށުގެ އަންހެނުންގެ ކޮމިޓީތަކަށް ބާރުވެރިކަން ހޯދުމާއި، އަތޮޅުގެ ފެރީ ނިޒާމުގެ ތެރޭގައި ހުރި މައްސަލަތައް ހައްލުކުރުމަށް ކުރެވިދާނެ ކަންކަމާބެހޭގޮތުން ވެސް ވަނީ މަޝްވަރާ ކުރައްވާފައެވެ.

އެގޮތުން ކައުންސިލަރުން ފާހަގަ ކުރައްވާފައިވާ ކަންކަމަށް ސަރުކާރުގެ ފަރާތުން ދޭންޖެހޭ އެއްބާރުލުން ދެއްވާނެ ކަމަށް ނައިބްރައީސް ވަނީ ފާހަގަ ކުރައްވާފައެވެ.

ރާއްޖޭގެ އެންމެ ބޮޑެތި އަތޮޅުތަކުގެ ތެރޭގައި ހިމެނޭ ކޮޅުމަޑުލުގެ ވެރިކަންކުރާ ރަށަކީ ތ.ވޭމަންޑޫއެވެ. އެގޮތުން ކޮޅުމަޑުލުގައި މީހުން ދިރިއުޅޭ 13 ރަށެއް ހިމެނެއެވެ.