ޔުވެންޓަސްއަށް ކުޅެމުން އަންނަ ކްރޮއޭޝިއާގެ ފޯވާޑް މާރިއޯ މަންޒުކިޗް ހޯދުމަށް ޕެރިސް ސެއިންޓް ޖާމަން (ޕީއެސްޖީ) އިން މަސައްކަތް ކުރަމުން އަންނަ ކަމަށް ރިޕޯޓްތައް ބުނެފިއެވެ.

އިޓަލީގެ ނޫސްތަކުން ބުނީ، މަންޒުކިޗް ހޯދުމަށް ޕީއެސްޖީން މަސައްކަތް ކުރަމުން އަންނަ ކަމަށާއި، ހޯމަ ދުވަހު ޓްރާންސްފާގެ ބާޒާރު ބަންދުވުމުގެ ކުރިން ޕީއެސްޖީން އެކަން ކުރަން ބޭނުންވާ ކަމަށެވެ.

މިއަހަރުގެ އެޕްރީލް ޔުވެންޓަސްއާއެކު ހަދާފައިވާ އެއްބަސްވުން މަންޒުކިޗް އާކޮށްފައިވާއިރު، އޭނާ އެ ކްލަބުގައި 2021 ވަނަ އަހަރުގެ ނިޔަލަށް މަޑުކުރަން ޖެހޭނެއެވެ.

ނަމަވެސް ރިޕޯޓްތައް ބުނާގޮތުން މަންޒުކިޗް ބޭނުންވަނީ މި ޓްރާންސްފާގައި ނުވަތަ ކުރިޔަށް އޮތް ޖެނުއަރީ ޓްރާންސްފާގައި ޔުވެންޓަސް ދޫކޮށް، އެހެން ކްލަބަކަށް ބަދަލުވާށެވެ.

ޑައިނަމޯ ޒަގްރެބް އިން 2007 ވަނަ އަހަރު ކެރިއަރު ފެށި މަންޒުކިޗް ވަނީ ވުލްފްސްބާގް އާއި ބަޔާން މިއުނިކް އަދި އެތުލެޓިކޯ މެޑްރިޑަށް ވެސް ކުޅެފައެވެ. އޭނާ ޔުވަންޓަސް އަށް ބަދަލުވީ 2015 ވަނަ އަހަރެވެ. އެގޮތުން އޭނާ ވަނީ މިހާތަނަށް އެޓީމަށް ކުޅުނު 162 މެޗުގައި 44 ލަނޑު ކާމިޔާބުކޮށްފައެވެ.

ނިމިގެންދިޔަ ފީފާ ވޯލްޑް ކަޕްގައި މޮޅު ކުޅުމެއް ކްރޮއޭޝިއާ ޓީމަށް ދެއްކި މަންޒުކިޗް ގައުމީ ޓީމަށް ކުޅުން ހުއްޓާލާފައިވާއިރު، އޭނާ ވަނީ އެޓީމަށް ކުޅުނު 89 މެޗުގައި 33 ލަނޑު ކާމިޔާބު ކޮށްފައެވެ.