އެކައުންޓިންގ ދާއިރާގެ ވަޒީފާތަކާ ދިވެހިން ހަވާލުވާންވީ ވަގުތު އަތުވެއްޖެކަމަށް އޮޑިޓަރ ޖެނެރަލް ހަސަން ޒިޔަތު ވިދާޅުވެއްޖެއެވެ.

މޯލްޑިވްސް އެކައުންޓަންޓްސް ފޯރަމް 2019 އިފްތިތާހު ކުރުމަށް އަންގާރަ ދުވަހު ބޭއްވި ރަސްމިއްޔާތުގެ ފުރަތަމަ ސެޝަނަށްފަހު "ރާއްޖެއެމްވީ" އަށް ދެއްވި ޚާއްސަ އިންޓަރވިއުއެއްގައި ޒިޔަތު ވިދާޅުވީ، މިހާރު އެންމެ ބޮޑު އިސްކަމެއް ދެއްވަނީ އެކައުންޓިންގ ގެ ޕްރޮފެޝަން ދިވެހިންގެ އަތްމައްޗަށް ގެންދިއުމަށް ކުރަންޖެހޭ ކަންކަން ބަލައި އެކަން މަގުފަހި ކުރުން ކަަމަށާއި، އަމާޒަކީ ހުރިހާ ސެކްޓަރއެއްގެ އެކައުންޓިންގ ބައިގައިވެސް ދިވެހިން ތިބުން ކަމަށެވެ.

އޭގެ އިތުރުން، އޮޑިޓަރ ޖެނެރަލްގެ އޮފީހުން 2015 ވަނަ އަހަރުން ފެށިގެން މިދާއިރާއަށް ދިވެހިން އިތުރު ކުރުމުގެ ގޮތުން ގިނަ މަސައްކަތްތަކެއް ކުރަމުން އަންނަކަމަށާއި، އެގޮތުން ދިވެހިންނަށް އޮޑިޓް ލައިސަންސް ދޭން ފެށުމާއި، ފަންނީ ގާބިލްކަން އިތުރު ކުރުމަށް ތަމްރީނުތަށް ފޯރުކޮށް ދިނުމާއި، ވިޔަފާރިވެރިންނާއި، އަދި ގުޅުންހުރި ފަރާތްތަކާއި ވާހަކަ ދައްކައިގެން ދިވެހިންނަށް ފުރުޞަތުތަށް ފަހިކުރެވޭނެ ގޮތްތަށް ހޯދަން މަސައްކަތް ކުރަމުންދާކަން މި ރަސްމިއްޔާތުގައި ވާހަކަދައްކަވަމުން ޒިޔަތު ވަނީ ފާހަގަކުރައްވާފައެވެ.

ޒިޔަތު އިތުރަށް ވިދާޅުވީ، ޕްރޮފެޝަނަލް އެކައުންޓެންސީ ބޮޑީއެއް އެކުލަވާލެއްވުމަށްޓަކައި ދިވެހިރާއްޖޭގައި ޗާރޓަޑް އެކައުންޓިންގ އޯގަނައިޒޭޝަން އުފެއްދުމަށް މަސައްކަތް ކުރައްވަމުން އަންނަ ކަމަށާއި، އެކަމާބެހޭ ބިލް ޑްރާފްޓްކުރެވިފައިވާ ކަމަށެވެ. އެގޮތުން މި ޕްރޮފެޝަން ރެގިއުލޭޓް ކުރެވޭނެ ނިޒާމެއް ޤާއިމު ކުރެވިގެންދާނެ ކަމަށާއި، އެކަމަށް ސަރުކާރާއި މަޖިލީހުން އެއްބާރުލުން ލިބޭނެ ކަމަށް އުއްމީދުކުރައްވާ ކަމަށް ޒިޔަތު ވިދާޅުވިއެވެ.

އެކަމާ ގުޅޭގޮތުން ވާހަކަދައްކަވަމުން މި ރަސްމިއްޔާތުގައި ޝަރަފުވެރި މެހެމާނެއްގެ ގޮތުން ބައިވެރިވެވަޑައިގެންނެވި ރައްޔިތުންގެ މަޖިލީހުގެ ޕަބްލިކް އެކައުންޓްސް ކޮމިޓީގެ މުޤައްރިރު މުޙައްމަދު ނާޝިޒް ވިދާޅުވީ، އެކައުންޓިންގ ޕްރޮފެޝަންގެ ރެގިއުލޭޓަރީ ބޮޑީއެއް ޤާއިމުކުރެވިގެން ދިއުމަކީ މިދާއިރާއަށް ލިބޭނެ ވަރަށް ބޮޑު ކުރިއެރުމެއް ކަމަށާއި، އެކަމަށްޓަކައި މަޖިލީހުން އަދާކުރަންޖެހޭ ދައުރު އެންމެ ފުރިހަމައަށް އަދާކުރައްވާނެ ކަަމަށެވެ.

ނާޝިޒް އިތުރަށް ވިދާޅުވީ، ކޮރަޕްޝަން ނައްތާލުމަށް ސަރުކާރުން ކުރާ މަސައްކަތުގައި އެކައުންޓިންގ އަދި އޮޑިޓިންގ ދާއިރާގައި މަސައްކަތް ކުރައްވާ ބޭފުޅުންގެ އެހީތެރިކަން ވަރަށް މުހިއްމު ކަމަށާއި، ދައުލަތުގެ މުދަލާއި ފައިސާ ބޭނުންކޮށްފައިވަނީ އިންސާފުުވެރިކަމާއި އަމާނާތްތެރިކަމާއެކު ކަން ޔަގީން ކުރުމަށް އޮޑިޓަރުންނާއި އެކައުންޓެންޓުންގެ ދައުރު ވަރަށް މުހިއްމު ކަމަށެވެ.

ތިން ދުވަހުގެ މުއްދަތަށް ބަހާލައިގެން ކުރިއަށްގެންދާ މި ފޯރަމްގައި ސަރުކާރުގެ މުއައްސަސާތަކާއި ކުންފުނިތަކުގެ ބައެއް އިސްވެރިންގެ އިތުރުން، އެކައުންޓިންގ ދާއިރާގެ ފަންނީ ބޭފުޅުން ބައިވެރިވެ ވަޑައިގެންފައިވެއެވެ.