3 މަޝްރޫއުއަކަށް އޭޑީބީން 120 މިލިއަންގެ ޑޮލަރުގެ އެހީ ދެނީ
27 އޯގަސްޓު 2019 | އަންގާރަ 02:57އަތޮޅުތެރޭގައި އިޔާދަކުރަނިވި ހަކަތައިން ކަރަންޓު އުފެއްދުމަށް އޭޑީބީން ދޭން ނިންމާފައިވަނީ 10 މިލިއަން ޑޮލަރު
މިނިސްޓަރު އަމީން(ކ)، އޭޑީބީގެ ރައީސް ޓަކަހިކޯ ނަކާއޯ(ވ)
ރާއްޖޭގައި ތަރައްޤީގެ ތިން މަޝްރޫއެއް ހިންގުމަށްޓަކައި 120 މިލިއަން ޑޮލަރުގެ އެހީ ދޭން، އޭޝިއަން ޑިވެލޮޕްމަންޓް ބޭންކު (އޭޑީބީ) އިން ނިންމައިފިއެވެ.
ރައީސުލްޖުމްހޫރިއްޔާގެ އޮފީހުގައި މިނިސްޓްރީ އޮފް ފިނޭންސް އަދި އޭޑީބީ ގުޅިގެން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ބޭންކުގެ ރައީސް ޓަކަހިކޯ ނަކާއޯ ވިދާޅުވީ އެ ބޭންކުން ކުރިއަށް އޮތް ދެ އަހަރުތެރޭގައި ތަފާތު ތިން މަޝްރޫއެއް ހިންގުމަށް ރާއްޖެއަށް އެހީ ދިނުމަށް ނިންމާފައިވާކަމަށެވެ.
އޭނާ ވިދާޅުވި ތިން މަޝްރޫއުގެ ތެރޭގައި ހިމެނެނީ އަތޮޅުތެރޭގައި އިޔާދަކުރަނިވި ހަކަތައިން ކަރަންޓު އުފެއްދުމުގެ މަޝްރޫއެއް ކުރިއަށް ގެންދިޔުމަށް ދޭ ފައިސާގެ އެހީއާއި އެދެވޭގޮތުގައި ކުނި މެނޭޖްކޮށް އެ ކުނިތައް އަންދައިގެން ކަރަންޓު އުފެއްދުމުގެ މަޝްރޫއެއް ކުރިއަށް ގެންދިޔުމަށް ދޭ ހިލޭ އެހީގެ އިތުުރުން ކަރަންޓުގެ ހާލަތު ރަނގަޅުކުރުމަށް އިންޖީނުގެ ތަރައްޤީކުރުމަށް ދޭން ނިންމާފައިވާ ހިލޭ އެހީއެވެ.
ކަރަންޓުގެ ހިދުމަތުގެ ފެންވަރު ރަނގަޅުކުރުމަށްޓަކައި ހިންގަން ނިންމާފައިވާ މި މަޝްރޫއުތަކުގެ ތެރެއިން އަތޮޅުތެރޭގައި އިޔާދަކުރަނިވި ހަކަތައިން ކަރަންޓު އުފެއްދުމަށް އޭޑީބީން ދޭން ނިންމާފައިވަނީ 10 މިލިއަން ޑޮލަރެވެ. އަދި ކުނި އަންދައިގެން ކަރަންޓު އުފެއްދުމުގެ މަޝްރޫއަށް ދޭން ނިންމާފައިވަނީ 60 މިލިއަން ޑޮލަރެވެ. އިންޖީނުގެތައް ތަރައްޤީކުރުމަށް ދޭން ނިންމާފައިވަނީ 50 މިލިއަން ޑޮލަރުގެ އެހީއެވެ.
މީގެ އިތުރުން، އޭޑީބީގެ ފަރާތުން ވާހަކަ ދައްކަވަމުން ނަކާއޯ ވިދާޅުވީ މީގެ ކުރިން ރާއްޖެއަށް ހަމައެކަނި ހިލޭ އެހީގެ ގޮތުގައި އެހީތައް ވަމުން އައި ނަމަވެސް މިހާރު މާލީ ގޮތުން ރާއްޖެ ކުރިއަރާފައިވާތީ، ރާއްޖޭގައި ބޮޑެތި މަޝްރޫޢޫތައް ހިންގުމަށްވެސް އިތުރު ގޮތްގޮތުން އެހީ ފޯރުކޮށްދިނުމަށް އެބޭންކުން ނިންމާފައިވާކަމަށެވެ.
ޕްރެސް ކޮނފަރެންސްގައި ވާހަކަ ދައްކަވަމުން ފިނޭންސް މިނިސްޓަރު އިބްރާހިމް އަމީރު ވިދާޅުވީ ކާބަން ނިއުޓްރަލް ގައުމަކަށް ވުމަށް ރާއްޖެއިން ކުރަމުންދާ މަސައްކަތުގައި ފޯރުކޮށްދެމުންދާ އެހީއަށް ޝުކުރު އަދާކުރައްވާ ކަމަށެވެ.
ނަކާއޯ ވިދާޅުވީ ހަކަތައާއި ތިމާވެއްޓާ ގުޅުންހުރި މަޝްރޫޢޫތައް ނޫނަސް، ކުރިއަށް އޮތްތަނުގައި ސިއްޙީ ދާއިރާއާއި ތަޢުލީމީ ދާއިރާގެ އިތުރުން އެސްއެމްއީ ފައިނޭންސްގެ ދާއިރާއިންވެސް އޭޑީބީން ރާއްޖެއަށް އެހީވުމާމެދު މަޝްވަރާތައް ކުރިއަށް ގެންދަވާނެކަމަށެވެ.
