ފެނަކައިން ހިންގި ތެލާއި ޑޮލަރުގެ ވިޔަފާރީގެ މައްސަލައިގެ ތަހުގީގު ކުރިއަށް އެބަދޭ: އޭސީސީ
އެސްޓީއޯ އިން ވިއްކާ އަގަށް ވުރެ އެތައް ގުނައެއް ބޮޑުކޮށް އަމިއްލަ ފަރާތްތަކުގެ އަތުން ތެޔޮ ގަނެފައިވޭ
ފެނަކަ ކޯޕަރޭޝަންގެ ކުރީގެ މެނޭޖިންގ ޑިރެކްޓަރ މުހައްމަދު ނިމާލު (ވ)
ސަރުކާރުގެ ސަތޭކަ ޕަސެންޓް ކުންފުންޏެއް ކަމުގައިވާ ފެނަކަ ކޯޕަރޭޝަންއިން ހިންގާފައިވާ ކަމަށް ތުހުމަތު ކުރެވޭ ބޮޑެތި ބައެއް މައްސަލަތައް ތަހުގީގު ކުރަމުންދާ ކަމަށް އެންޓި ކޮރަޕްޝަން ކޮމިޝަން (އޭސީސީ) އިން ބުނެފިއެވެ.
އޮޑިޓް އޮފީހުން މިދިޔަ އަހަރުގެ ސެޕްޓެމްބަރު 19 ވަނަ ދުވަހު ނެރުނު ފެނަކަ ކޯޕަރޭޝަންގެ ޕްރޮކިއުމަންޓާ ގުޅޭ ހާއްސަ އޮޑިޓް ރިޕޯޓުގައި ފާހަގަ ކޮށްފައިވާ، 2014 އަދި 2015 ވަނަ އަހަރު އެކުންފުނިން ހިންގާފައިވާ ކޮރަޕްޝަންގެ މައްސަތައް ބަލަމުންދާ ކަމަށް ހަމަ އެދުވަސްވަރު އޭސީސީން ބުނެފައި ވެއެވެ.
ނަމަވެސް އޭގެ ހައެއްކަ މަސް ފަހުން އެމައްސަލަތަކުގެ ތަހުގީގު ކުރިއަށް ގޮސްފައިވާ ހިސާބެއް ބެލުމަށް ގުޅުމުން ވެސް އޭސީސީން ބުނީ އަދިވެސް އެމައްސަލަތަކުގެ ތަހުގީގު ނުނިމޭ ކަމަށާއި ތަހުގީގު ކުރިއަށްދާ ކަމަށެވެ.
އޭސީސީން ބުނީ އޮޑިޓް ރިޕޯޓުގައި ފާހަގަކޮށްފައިވާ ގިނަ ކަންކަމުގެ ތަހުގީގު ކުރަމުން ދާ ކަމަށާއި އޭގެ ތެރޭގައި ޑޮލަރު ގަތުމާއި ތެޔޮ ވިއްކުމާއި ވަކި ބަޔަކަށް ނާޖާއިޒު ފައިދާ ހޯދައިދިން ކަމަށް ތުހުމަތުކުރެވޭ މައްސަލަތައް ހިމެނޭ ކަމަށެވެ.
އެމްއެމްޕީއާރުސީގެ ބޮޑު ޚިޔާނާތައް ފަހު ކޮރަޕްޝަންގެ އިނގިލި ވަރަށް ބޮޑަށް ދިއްކުރަމުންދިޔަ ފެނަކައިގެ ކޮރަޕްޝަންތަކެއް ފަޅާއަރާފައި މިވަނީ އޮޑިޓަރ ޖެނެރަލް ހަސަން ޒިޔަތު ސޮއިކުރައްވައި ނެރުއްވި އޮޑިޓް ރިޕޯޓުންނެވެ. އޭގެ ތެރޭގައި އެކި ފަރާތްތަކަށް މިލިއަނުން ފައިދާ ލިބޭ ގޮތައް ހިންގާފައިވާ ކަންކަމާއި ކޮރަޕްޝަން ހިންގުމަށް މަގުފަހިވާ ފަދަ ގޮތަކަށް ހުރި އެތައް ކަމެއް ވަނީ ފާހަގަކޮށްފައެވެ.
ރިޕޯޓުގައި ބުނެފައިވާ ގޮތުގައި އެސްޓީއޯގެ ދަށުން ހިނގަމުން އަންނަ ފިއުލް ސަޕްލައިސް މޯލްޑިވްސް (އެފްއެސްއެމް) އިން ފެނަކަ ކޯޕަރޭޝަނަށް ޑީސަލް ވިއްކުމަށް ހުށަހަޅާފައިވާ އަގަށް ވުރެ ބޮޑު އަގުގައި އަމިއްލަ ފަރާތްތަކަކުން ޑީސަލް ގަތުމުގެ ސަބަބުން 2014 ވަނަ އަހަރާއި 2015 ވަނަ އަހަރު ޑީސަލް ގަތުމަށް އިތުރަށް 21.8 މިލިއަން ރުފިޔާ ޚަރަދުކޮށްފައިވާކަން ހާމަވެފައިވެއެވެ. އަދި އެއް ފަރާތެއްގެ ވިޔަފާރިތަކެއްގެ ގޮތުގައި ބެލެވޭ ވިޔަފާރިތަކަކުން ކޯޓޭޝަން ހޯދައިގެން 2015 ވަނަ އަހަރު ޖުމްލަ 4.3 މިލިއަން ރުފިޔާގެ ޑީސަލް ގަނެފައިވާ ކަމަށާއި އެ ފަރާތްތަކުގެ ތެރޭގައި ހިމެނޭ އެކި ވިޔަފާރިތަކަށް ފެނަކަ ކޯޕަރޭޝަނުން ދޫކުރާ ޗެކުތަކާއި އެ ވިޔަފާރިތަކުގެ ފަރާތުން އެކަކު ހަވާލުވާކަން އެނގިފައިވާ ކަމަށް އޮޑިޓް ރިޕޯޓުގައި ވަނީ ބުނެފައެވެ.
އޮޑިޓް ރިޕޯޓުގައި ބުނެފައިވާ ގޮތުގައި ތެލުގެ ވިޔަފާރި ކުރައްވާ ރައްޔިތުންގެ މަޖިލީހުގެ ވިލުފުށީ ދާއިރާގެ މެންބަރު ރިޔާޒް ރަޝީދު ނިސްބަތްވާ ތ. އަތޮޅުގެ އެކި ރަށްތަކުގައި ހުރި ފެނަކަ ކޯޕަރޭޝަންގެ އިންޖީނުގެތަކުގެ ބޭނުމަށް އެންމެ ކުންފުންޏަކުން އަގު ހޯދައިގެން ޑީސަލް ގަނެފައިވާ ކަމަށާއި އެ ކުންފުނިން އެކަނި ވެސް 26 މިލިއަން ރުފިޔާގެ ޑީސަލް ގަނެފައިވާއިރު އެ ކުންފުނިން ފެނަކަ ކޯޕަރޭޝަނަށް ޑީސަލް ވިއްކާފައިވާ އަގު އެފްއެސްއެމުން ފެނަކަ ކޯޕަރޭޝަނަށް ޑީސަލް ވިއްކަން ހުށަހަޅާފައިވާ އަގަށް ވުރެން، އެވްރެޖް ގޮތެއްގައި ލީޓަރަކުން 1.29 ރުފިޔާ ބޮޑުކަން ވެސް ވަނީ ހާމަވެފައެވެ.
އޮޑިޓް ރިޕޯޓުގައި ބުނެފައިވާ ގޮތުގައި އިންޖީނުގެތަކަށް ބޭނުންވާ ކޭބަލް ސަޕްލައި ކޮށްދިނުމަށް ބިޑް ހުށަހެޅި ކުންފުނިތަކުގެ ތެރެއިން އެމަސައްކަތައް އެންމެ ކުޑަ އަގު ހުށަހެޅި ކުންފުންޏަށް ވުރެ 2.3 މިލިއަން ރުފިޔާ އަގުބޮޑުކޮށް ބިޑް ހުށަހެޅި އެހެން ކުންފުންޏަކަށް މަސައްކަތް ހަވާލުކޮށްފައި ވަނީ ޕްރޮޖެކްޓަށް ހުށަހެޅުނު ބިޑްތައް އިވެލުއޭޓް ކުރުމުގައި އެންމެބޮޑު ކްރެޑިޓް ޕީރިއަޑެއް ދިނުމަށް ހުށަހަޅާ ފަރާތަކަށް އިސްކަން ދީގެން ބިޑް އިވެލުއޭޝަން ކުރިއަށް ގެންގޮސްގެން ކަމަށްވާއިރު، ޕްރޮޖެކްޓް އެކުންފުންޏާ ހަވާލުކުރުމަށް ފަހު އެލްސީ ހުޅުވަން އުނދަގޫތަކެއް ކުރިމަތިވެފައިވާ ކަމަށް ނިންމައި ކްރެޑިޓް ޕީރިއަޑެއް ނެތި ކޮންޓްރެކްޓަރއަށް ފައިސާ ދީފައިވުމުން 2.3 މިލިއަން ރުފިޔާ ބޮޑުކޮށް މަސައްކަތް ހަވާލުކުރުމަށް ނިންމި ނިންމުމުގެ ޙަޤީގީ މަންފާ ކުންފުންޏަށް ލިބިފައި ނުވާ ކަމަށް އޮޑިޓް ރިޕޯޓުގައި ވަނީ ފާހަގަ ކޮށްފައެވެ.
އޮޑިޓް ރިޕޯޓުގައި ބުނެފައިވާ ގޮތުގައި 2014 އަދި 2015 ވަނަ އަހަރު އަމިއްލަ ފަރާތްތަކުން ޑޮލަރު ގަތުމަށް 95.56 މިލިއަން ރުފިޔާ ދޫކޮށްފައިވާއިރު ޑޮލަރު ވިއްކާ ފަރާތްތަކަށް ކަމިޝަންގެ ގޮތުގައި 5.08 މިލިއަން ރުފިޔާ ދޫކޮށްފައިވާކަން ފާހަގަ ކުރެވުމާއި އެމުއާމަލާތްތައް ގެންގޮސްފައި ވަނީ ހާމަކަންބޮޑު އުސޫލެއްގެ ދަށުން ނޫން ކަމާއި ޑޮލަރު ގަތުމުގެ މުއާމަލާތް ކުރިއަށް ގެންދާނެ އުސޫލެއް ތައްޔާރުކޮށް ޢަމަލުކުރަމުން ގޮސްފައި ނުވުމާއި އަދި ޑޮލަރު ގަނެ ވިއްކުމުގެ ހުއްދަ އެމްއެމްއޭ އިން ދީފައި ނުވާ ބައެއް ފަރާތްތަކުގެ އަތުން ޑޮލަރު ގަންނަމުން ވެސް ގޮސްފައިވާ ކަމަށް ވެސް ބުނެފައިވެއެވެ.
މީގެ އިތުރުން ވެސް ކޮރަޕްޝަނަށް މަގުފަހިވާ ގޮތަށް ހިންގާފައިވާ ކަމަށް ބެލެވޭ ކިތައްމެ ކަމެއް އެއޮޑިޓް ރިޕޯޓުގައި ވަނީ ފާހަގަ ކޮށްފައެވެ.
