އއ. އުކުޅަސްގައި ތިން ދުވަހުގެ މުއްދަތައް ކުރިއަށް ގެންދިއުމަށް ހަމަޖެހިފައިވާ އުކުޅަސް ޓެކް ފެއަރ 2019 ފަށައިފިއެވެ.

އުކުޅަސް ކޮންވެންޝަން ސެންޓަރުގައި މި ފެއަރ ފެށުމުގެ ގޮތުން ބޭއްވި ރަސްމިއްޔާތު ޝަރަފްވެރި ކޮށްދެއްވާފައިވަނީ ފޮރިން މިނިސްޓަރ އަބްދުއްﷲ ޝާހިދު އެވެ. އެމަނިކުފާނު ވަނީ ތާރީހާ ތަރިކައާއި ސަގާފަތް ރައްކާތެރިކޮށް ހިމާޔަތް ކުރުމަށް ޓެކްނޮލޮޖީގެ ދައުރު ބޮޑުކަމަށް ފާހަގަ ކުރައްވާފައެވެ. އަދި އިލްމީ ބަހުސްތައް ކުރުމަށް ރާއްޖެއަށް އާ ދޮރެއް ހުޅުވިގެން ގޮސްފި ކަމަށާއި މީގެ ސަބަބުން އަތޮޅު ތަކަށާއި ރަށްތަކަށް އިގްތިސާދީ އަދި އިޖްތިމާއީ ފައިދާކުރާނެ ކަމުގައެވެ.

މިނިސްޓަރ ޝާހިދުގެ އިތުރުން މިނިސްޓަރ އޮފް ޔޫތް، ސްޕޯޓްސް އެންޑް ކޮމިއުނިޓީ އެމްޕަވަރމެންޓް، އަހްމަދު މަހްލޫފްގެ އިތުރުން މިނިސްޓަރ އޮފް ސައިންސް އެންޑް ޓެކްނޮލޮޖީ، މަލީޖް ޖަމާލް އަދި އިންޑިއާއިން ރާއްޖެއަށް ކަނޑަ އަޅުއްވާފައި ހުންނަވާ ސަފީރު ސަންޖޭ ސުދީރު ވަނީ ބައިވެރިވެ ވަޑައިގެންފައެވެ.

މި ރަސްމިއްޔާތު ހުޅުއްވައިދެއްވާ ވާހަކަ ދައްކަވަމުން، ފެއަރ އިންތިޒާމްކޮށް ކުރިއަށް ގެންދާ އުގެއިލް ފައުންޑޭޝަންގެ ފަރާތުން، ޕްރޮފެސަރ ހަސަން އުގައިލް ވަނީ ކުޑަ ދުވަސްކޮޅެއްގެ ތެރޭގައި މިފަދަ ބޮޑު މަހާސިންތާއެއް ބޭއްވޭނީ ވަރަށް ހިކުމަތްތެރި ބަޔަކަށް ކަމަށާއި ބައިނަލް އަގްވާމީ މިފަދަ މަހާސިންތާއެއް ރާއްޖެ ފަދަ ޖަޒީރާ ގައުމެއްގައިވެސް ބޭއްވޭނެކަން މި މަހާސިންތާއިން ހާމަވެގެން ދާ ކަމުގައެވެ. އަދި ފުއްނާބު އުސް ސައިންސްވެރިން އެއްތަނަކަށް އެއްކޮށް ބޮޑު މަހާސިންތާއެއް ބޭއްވުމަށް ބޭނުންވާނީ ކެރޭ ރައްޔިތުންނާ އެއްބާރުލުން ދޭނެ ސަރުކާރެއްކަމުގައި ޕްރޮފެސަރ އުގެއިލް ވިދާޅުވިއެވެ.

ޕްރޮފެސަރ އުގެއިލް އިތުރަށް ވިދާޅުވީ ގައުމެއްގެ ކުރިއެރުމަށް ދެ ކަމެއް ބޭނުންވާ ކަމަށާއި އެއީ ރައްޔިތުންގެ ހޭލުންތެރިކަން އިތުރު ކުރުމާއި މާލީ ފުއްދުންތެރިކަން ކަމުގައެވެ. އަދި މި މަހާސިންތާގެ ސަބަބުން ތިން ދުވަހުގެ ތެރޭގައި އުކުޅަހަށް ތިން މިލިއަނެއްހާ ރުފިޔާ ލިބިގެން ދާނެ ކަމަށް ވެސް ޕްރޮފެސަރ ވިދާޅުވިއެވެ.

މި ރަސްމިއްޔާތުގައި ވާހަކަ ދައްކަވަމުން މިނިސްޓަރ މަލީހް ޖަމާލް ވިދާޅުވީ ކުރިއަށް އޮތް އަހަރު ތަކުގެ ތެރޭގައި އުކުޅަސް ވެގެން ދާނީ އީ ކައުންސިލް އަދި އީ ފާސް ބޭނުންކުރާ ރަށަކަށް ކަމުގައެވެ.

އިންސްޓްޓިއުޓް އޮފް އިލެކްޓްރިކް އެންޑް އިލެކްޓްރިކް އިންޖިނިއާސް އިން ބާއްވާ ސޮފްޓްވެއަރ ނޮލެޖް އިންފޮމޭޝަން މެނޭޖްމެންޓް އެންޑް އެޕްލިކޭޝަން، ސްކީމާ ކޮންފަރެންސްގައި ބޭރުގެ ފުންނާބުއުސް 48 ސައިންސްވެރިން ބައިވެރިވެ ގިނަ އަދަދެއްގެ މައުޟޫތަކާއި ބެހޭގޮތުން މަޝްވަރާކުރެއްވިއެވެ.

މިއަދު ފެށި އުކުޅަސް ޓެކް ފެއާރ ގައި އުރީދޫ، ދަމާސް، ވެމްކޯ، ފޮރ ލޫޕް ކޯޑިންގް އެކަޑަމީ، އޯޕަން ސޯރސް ސޮސައިޓީ، ލެޓްސް ގޯ މޯލްޑިވްސް، ސަމަރ އައިލެންޑް މޯލްޑިވްސްގެ އިތުރުން ސަރުކާރުގެ މިނިސްޓްރީތައް ކަމަށް ވާ މިނިސްޓްރީ އޮފް ޓޫރިޒަމް، މިނިސްޓްރީ އޮފް ކޮމިއުނިކޭޝަން، ސައިނސް އެންޑް ޓެކްނޮލޮޖީ، މިނިސްޓްރީ އޮފް ޔޫތް، ސްޕޯޓްސް އެންޑް ކޮމިއުނިޓީ އެމްޕަވަރމެންޓް، މިނިސްޓްރީ އޮފް ހައުސިންގް އެންޑް އިންފްރާސްޓްރަކްޗަރ، މިނިސްޓްރީ އޮފް ހެލްތް އަދި ހައުސިންގް ޑިވެލޮޕްމެންޓް ކޯޕަރޭޝަން، ޑިޕަރޓްމެންޓް އޮފް ނޭޝަނަލް ރެޖިސްޓްރޭޝަން، ނެޝަނަލް އިންޓެގްރިޓީ ކޮމިޝަން އާއި މޯލްޑިވްސް ޕޮލިސް ސަރވިސްގެ އިތުރުން ސްޕެއިންގެ ޔުނިވަރސިޓީ އޮފް ކަންޓަބްރިއާ އާއި ލިތުއޭނިއާގެ އިންޑެފޯރމް ލިމިޓެޑް އާއި އެމެރިކާގެ ކްލައުޑް ބެޑްސްގެ ސްޓޯލްތައް ފެއަރ އިން ފެނިގެންދާނެއެވެ.

އުކުޅަސް ޓެކް ފެއަރ 2019 އާއި ސްކީމާ ކޮންފަރެންސް އަކީ ރާއްޖޭގައި ބޭއްވޭ މިފަދަ ފުރަތަމަ ޓެކް ފެއަރ އަދި ސައިންސްވެރިންގެ މަހާސިންތާއެވެ.