ގްރީޒްމަން ކާމިޔާބުކުރި ދެ ލަނޑާއެކު ބާސެލޯނާއަށް ފަސޭހަ މޮޅެއް

ސްޕެނިޝް ލަލީގާގައި ބާސެލޯނާގެ ގްރީޒްމަން ކާމިޔާބުކުރި ދެ ލަނޑާއެކު އެޓީމު ލީގުގައި ކުޅުނު ދެވަނަ މެޗުން ފަސޭހަ ކަމާއެކު މޮޅުވެއްޖެއެވެ.

ބާސެލޯނާގެ ދަނޑުގައި ރެއަލް ބެޓިސްއާ ދެކޮޅަށް ކުޅުނު މެޗުން ބާސެލޯނާ މޮޅުވީ 2-5 ގެ ނަތީޖާ އަކުންނެވެ.

80،000 ސަޕޯޓަރުންގެ ކުރިމަތިގައި ކުޅުނު މި މެޗުގައި ފުރަތަމަ ލަނޑުޖަހާ ލީޑު ނެގީ ރެއަލް ބެޓިސްއިންނެވެ. މި ލަނޑު އެޓީމަށް ކާމިޔާބުކޮށްދިނީ ނަބިލް ފީކިއާއެވެ. މި ލަނޑާ އެކު ބާސެލޯނާއިން އެ ޓީމުގެ ކުޅުން ރަނގަޅު ކުރި އިރު އެޓީމުން ވަނީ ރެއަލް ބެޓިސް ކޮޅަށް ނުރައްކާކޮށް ގިނަ ހަމަލާތަކެއް އުފައްދާފައެވެ.

ފުރަތަމަ ހާފު ނިމުމުގެ ކުރިން ބާސެލޯނާއިން ވަނީ ލަނޑެއް ޖަހާ ނަތީޖާ ހަމަހަމަ ކޮށްފައެވެ. މި ލަނޑު މެޗުގެ 41 ވަނަ މިނެޓުގައި ބާސެލޯނާއަށް ކާމިޔާބުކޮށްދިނީ އިތުބާރު ފޯވާޑް ގްރީޒްމަންއެވެ.

މެޗުގެ ދެވަނަ ހާފުގެ ފަށައިގެން ގިނަ އިރުތަކެއް ނުވެ ބާސެލޯނާއިން ވަނީ އިތުރު ލަނޑެއް ޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ ވެސް ގްރީޒްމަންއެވެ.

ބާސެލޯނާ އިން ކާމިޔާބުކުރި ދެ ލަނޑަށް ފަހުވެސް އެޓީމުން ދިޔައީ ބެޓިސްގެ ގޯލަށް ގިނަ ހަމަލާތަކެއް ފޮނުވާލަމުންނެވެ.

ގްރީޒްމަންގެ ލަނޑަށް ފަހު ބާސެލޯނާއިން ކައިރި ކައިރީ އިތުރު ދެ ލަނޑު ޖަހާ ލީޑު ފުޅާ ކޮށްފައެވެ. މި ލަނޑުތަށް އެޓީމަށް ކާމިޔާބުކޮށްދިނީ ޕެރޭޒް އަދި ޖޯޑީ އަލްބާއެވެ.

ބާސެލޯނާއިން ޖެހި ފަހު ލަނޑު އެޓީމަށް ކާމިޔާބުކޮށް ދިނީ ބަދަލު ކުޅުންތެރިއެއްގެ ގޮތުގައި ކުޅެން ނިކުތް ވިޑާލްއެވެ. ބެޓިސް އިން ވަނީ މެޗު ނިމުމުގެ ކުރިން އިތުރު ލަނޑެއްޖަހާ ފަރަގު ކުޑަކޮށްފައެވެ.

މި މޮޅާއެކު ބާސެލޯނާއިން ވަނީ ލީގުގެ ނުވަ ވަނަ އަށް ކުރިއަށް ޖެހިލައިފައެވެ. ލީގުގެ އެއްވަނައިގައި ލިބުނު ހަ ޕޮއިންޓާއެކު ސެވީލިއާ އޮތް އިރު ދެވަނައިގައި ހަމަ މިއަދަދަށް ޕޮއިންޓް ހޯދައިގެން އޮތީ އެތްލެޓިކޯ އެވެ.