ް މާލެ އާއި ރަށްރަށުން ފްލެޓް ދޫކުރުމާއި ގުޅޭގޮތުން މަޖިލީހަށް ގަރާރެއް

މާލެ އާއި ރަށްރަށުން ފްލެޓް ދޫކުރުމާއި ގުޅޭ ގޮތުން މަޖިލީހަށް ގަރާރެއް ހުށަހަޅައިފިއެވެ.

ގަރާރު މަޖިލީހަށް ހުށަހެޅުއްވީ ހޯރަފުށީ ދާއިރާގެ މެމްބަރު އަހްމަދު ސަލީމްއެވެ. މި ގަރާރުގެ ފުރަތަމަ ކިޔުން އާދީއްތަދުވަހުގެ ޖަލްސާއަށް ވަނީ އިއްވާފައެވެ.

ގަރާރުގައި ބުނެފައިވަނީ ދިވެހިރާއްޖޭގެ މީހުން ދިރިއުޅޭ ކޮންމެ ރަށެއްގައި ވަޒަންވެރިވުމަކީ ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީގެ 41 ވަނަ މާއްދާއިން ކޮންމެ ދިވެހި ރައްޔިތަކަށް ލިބިދޭ އަސާސީ ހައްގަކަށްވީހިނދު، އަދި އެފަދައިން ވަޒަންވެރިވާ ކޮންމެ ރައްޔިތަކަށްމެ އެ ރަށެއްގައި ދިރިއުޅޭ މީހުންނަށް ލިބޭ އެންމެހައި ހިދްމަތްތަކާއި އިމްތިޔާޒްތައް ލިބިގެންވާ ކަމަށެެވެ. ދިވެހިރާއްޖޭގެ ގިނަ ރައްޔިތުންނަށް ބޯހިޔާވަހިކަމުގެ ދަތިކަމާއި، އެކަމާ ގުޅުން ހުރި އެކި އުދާސްތައް ގިނަވެ، އަތޮޅުތައް ތަރައްގީކުރުމުގައި ވޭތުވެދިޔަ ސަރުކާރުތަކުން ގެންގުޅެފައިވާ އުސޫލްތަކުގެ ސަބަބުން ބޯހިޔާވަހިކަމުގެ މައްސަލައަށް ހައްލެއް ނުލިބިވާ ކަމަށް ގަރާރުގައި ވަނީ ބުނެފައެވެ.

ގަރާރުގައި ބުނެފައިވަނީ އެކި ކަންކަމުގައި މާލެއަށް ހިޖްރަކޮށްފައިވާ މީހުންގެ އަދަދު އިތުރުވުމުގެ ސަބަބުން މާލެ ތޮއްޖެހި، ގެދޮރުގެ ޖާގަ ދަތިވެ، ކުލި އިންތިހާއަށް ބޮޑުވެ، އާއިލާތައް ދިރިއުޅުމަށް އެކަށީގެންނުވާވަރުގެ ކުދިކުދި ޖާގަތަކުގައި މީހުން ދިރިއުޅުން އިތުރުވެފައިވާ ކަމަށާއި،ކުދިކުދި ތަންތަންކޮޅުގައި ދިރިއުޅޭ އެތައް ފަރާތްތަކަކަށް ދިވެހިރާއްޖޭގެ އެއްވެސް ތަނަކުން އެކަށީގެންވާ ވަރުގެ ބޯހިޔާވަހިކަމެއް ލިބޭނެ ގޮތެއް ނެތް ކަމަށެވެ. މިކަމަށް ވީހާވެސް އަވަސް މުއްދަތެއްގައި ހައްލު ހޯދައިދިނުމުގެ މުހިންމުކަން އިންތިހާއަށް ބޮޑުވެ، އެކަމަށް މަސައްކަތްތަކެއް ކުރަންޖެހިފައިވާ ކަމަށެވެ.

ހައުސިން ނީޑްސްއަށް ބިނާކޮށް ބޯހިޔާވަހިކަން ފޯރުވައިދިނުމުގެ މަޝްރޫއުތައް އަވަސްކުރުން

ބިން ދަތިވެ، އަދި ބިން ހިއްކޭނެ ފަޅުވެސް ނެތް ރަށްރަށުގައި އެ ރަށްރަށާ ގާތުގައިވާ އެހެން ރަށްރަށާއި ގުޅުވާލައި، ބިން ބޮޑުކުރުމުގެ މަސައްކަތް ހިންގާނޭ އުސޫލްތައް ކަނޑައެޅުން

ދިރިއުޅޭނޭ އަމިއްލަ ތަނެއް ނެތް ނުވަތަ އާއިލާތަކަށް ދިރިނޫޅެވޭނެ ވަރުގެ ކުދިކުދި ތަންތަންކޮޅުގައި ދިރިއުޅޭ ފަރާތްތަކަށް އެކަށީގެންވާ ވަރުގެ ބޯހިޔާވަހިކަން ފޯރުކޮށްދިނުމުގެ އުސޫލްތައް ކަނޑައެޅުމަށާއި އަދި މާލެ އާއި ދިވެހިރާއްޖޭގެ އެހެންރަށްތަކާ ތަފާތެއް ނެތި ބޯހިޔާވަހިކަން ބިނާކުރާނެ ތަނަވަސްކަމެއް ނެތް ފަރާތްތަކުގެ ދިގު މުއްދަތުން ދައްކާ ޚަލާސް ކުރާގޮތަށް ލުއި ލޯނު ލިބޭނެގޮތް ފަހިކޮށްދިނުން

ގަރާރުގައި ހިމެނޭ ކަންތައް ހާސިލްކުރުމަށްޓަކައި ސަރުކާރުގެ އިދާރާތަކުން މިކަމުގައި ކުރަންޖެހޭ މަސައްކަތްތައް ކުރުމާއި ، މަޖިލީހުގެ ސަރުކާރުގެ މަސައްކަތުގެ ދާއިރާތަކުގެ ތެރެއިން މި ކަންކަމަށް ހައްލެއް ހޯދުމަށް މަޖިލީހުން ގޮވާލުމަށް ވަނީ ގަރާރުގައި ބުނެފައެވެ.