ނައިބް ރައީސް ފައިސަލް ނަސީމް ހދ. އަތޮޅުގެ ތަރައްޤީގެ މަޝްރޫތަކާ ގުޅޭގޮތުން ކަމާބެހޭ އިސްވެރިންނާއެކު މަޝްވަރާ ކުރައްވައިފިއެވެ.

އެކަމާ ގުޅޭގޮތުން ރައީސް އޮފީހުން ބުނީ، އެ އަތޮޅުގެ ތަރައްޤީގެ މަޝްރޫއުތަކާއި، އަދި ރައްޔިތުންގެ ކަންބޮޑުވުންތަކާ ގުޅޭގޮތުން އެ އަތޮޅުގެ ދާއިރާތަކުގެ މަޖްލިސް މެންބަރުންނާއި، ކަމާއިބެހޭ އިދާރާތަކުގެ އިސްވެރިންނާއެކު މަޝްވަރާ ކުރައްވާފައިވާ ކަމަށާއި، މި ބައްދައްދަލުވުމުގައި ހދ އަތޮޅުގެ އިންތިހާބީ 6 ދާއިރާގެ ރައްޔިތުންގެ މަޖިލީހުގެ މެންބަރުންނާއި، ސަރުކާރުގެ ބައެއް ވުޒާރާތަކުގެ ވަޒީރުންނާއި، ބައެއް އިދާރާތަކުގެ އިސްވެރިން ބައިވެރިވެ ވަޑައިގެންނެވި ކަމަށެވެ.

އެގޮތުން މި ބައްދަލުވުމުގައި ދެއްކެވި ވާހަކަފުޅުގައި މި ސަރުކާރުން ޚިދުމަތްތައް ދިނުމުގައި އެއްވެސް ރަށެއް ތަފާތު ނުކުރައްވާނެ ކަމަށާއި، މިފަދަ ބައްދަލުވުމެއް ބޭއްވެވުމުގެ އެންމެބޮޑު ބޭނުންފުޅަކީވެސް ތަރައްޤީއާ ގުޅޭ ކަންކަން ރައްޔިތުންނާ ވީހާވެސް ގާތުން އަދި ހުރިހާ ފަރާތްތަކެއް ގުޅިގެން ކުރިއަށް ގެންދެވޭނެ މަގު ތަނަވަސް ކޮށްދެއްވުން ކަމަށް ނައިބް ރައީސް ވަނީ ފާހަގަ ކުރައްވާފައެވެ.

މި ބައްދަލުވުމުގައި ވަނީ އަތޮޅުގެ ސިއްހީ ހިދުމަތާއި، ތައުލީމީ ދާއިރާއާއި، ބޯހިޔާވަހިކަމުގެ އިތުރުން ދަތުރުފަތުރުގެ ނިޒާމާއި، އަތޮޅުގައި މިހާރު ޚިދުމަތް ދެމުންދާ ދެ އެއާޕޯޓާ ގުޅިގެން ހުރި ކަންބޮޑުވުންތަކާއި އެ ތަންތަނުގެ ޚިދުމަތުގެ ފެންވަރު މަތިކުރުމަށް ކުރަންހުރި ކަންތައްތަކާއި ބެހޭގޮތުން ވެސް މަޝްވަރާކޮށްފައެވެ.

އެގޮތުން މި ބައްދަލުވުމުގައި އިންތިހާބީ ދާއިރާތަކުގައި ކުރެވެމުންދާ ތަރައްޤީގެ މަސައްކަތްތަކާއި ރަށްރަށުގައި ހުރި މައްސަލަތަކާ ބެހޭގޮތުން މައުލޫމާތު ހިއްސާކޮށްފައިވާއިރު، އެ އަތޮޅުގައި ކުރިޔަށް ގެންދިއުމަށް ރޭވިފައިވާ އެކިއެކި މަޝްރޫއުތަކާއި ބެހޭ މައުލޫމާތުތައް، ދައުލަތުގެ އިދާރާތަކުގެ އިސްވެރިން ވަނީ އެ ފަރާތްތަކާ ހިއްސާ ކުރައްވާފައެވެ.