އިންޓަ މިލާނާއެކު އަންގާރަ ދުވަހު މެންޗެސްޓަރ ޔުނައިޓެޑަށް ކުޅެމުން އަންނަ ޗިލީގެ ފޯވާޑް އެލެކްސަސް ސަންޗޭޒް މެޑިކަލް ފުރިހަމަކުރާ ގޮތަށް ހަމަޖެހިފައިވާ ކަމަށް ރިޕޯޓްތައް ބުނެފިއެވެ.

ސްކައި ސްޕޯޓްސް އިން ބުނީ، އިންޓައާއެކު އަންގާރަ ދުވަހު ސަންޗޭޒް މެޑިކަލް ފުރިހަމަކުރާނެ ކަމަށާއި، މިހާރު ކުރިޔަށްދަނީ ޓްރާންސްފާގެ އެންމެ ފަހުގެ މަރުހަލާ ކަމަށެވެ.

އެ ނޫހުން ބުނީ، ސަންޗޭޒް އިންޓައަށް ބަދަލުވުމަށް ހަމަޖެހިފައިވަނީ ލޯން އެއްބަސްވުމެއްގެ ދަށުން އެއް އަހަރަށް ކަމަށާއި، ސީޒަން ނިމުމުން ދާއިމީ އެއްބަސްވުމެއްގެ ދަށުން 14 މިލިއަން ޕައުންޑަށް އޭނާއަށް އިންޓައަށް ބަދަލުވުމުގެ އިހްތިޔާރުވެސް އޮންނާނެ ކަމަށެވެ. ނަމަވެސް ޔުނައިޓެޑުގެ ކޯޗު ސޯލްޝެއާ ބުނީ، މި ސީޒަން ނިމެންދެން ސަންޗޭޒް ކްލަބުގައި މަޑުކުރާނެ ކަމަށާއި، އޭނާގެ ބޭނުން ޓީމަށް ހިފޭނެ ކަމަށެވެ.

މިދިޔަ އަހަރުގެ ޖެނުއަރީ މަހު އަހަރަކު 14 މިލިއަން ޕައުންޑު މުސާރައިގެ ގޮތުގައި ލިބޭ ގޮތަށް ސަންޗޭޒް ޔުނައިޓެޑަށް ބަދަލުވީ ހަތަރު އަހަރުގެ އެއްބަސްވުމެއްގެ ދަށުންނެވެ. އެގޮތުން އޭނާގެ އެއްބަސްވުން ހަމަވާނީ 2022 ވަނަ އަހަރެވެ.

މީގެ ކުރިން ބާސާ އަށް ވެސް ކުޅެފައިވާ ސަންޗޭޒް ވަނީ އެ ކްލަބާ އެކު ވެސް ގިނަ ކާމިޔާބީތައް ހޯދާފައެވެ. ބާސާގައި ކާމިޔާބީތައް ހޯދުމަށް ފަހު ސަންޗޭޒް ބަދަލުވީ އާސެނަލަށެވެ.

ސަންޗޭޒް ވަނީ އާސެނަލް އަށް ކުޅުނު 166 މެޗުގައި 80 ލަނޑު ކާމިޔާބު ކޮށްފައެވެ. އާސެނަލް ދޫކޮށް ސަންޗޭޒް ޔުނައިޓެޑަށް ބަދަލުވެފައި ވާއިރު، އޭނާ ވަނީ މިހާތަނަށް ޔުނައިޓެޑަށް ކުޅުނު 45 މެޗުގައި ފަސް ލަނޑު ކާމިޔާބު ކޮށްފައެވެ.

ޗިލީގެ ގައުމީ ޓީމަށް ކުޅުނު 130 މެޗުގައި 43 ލަނޑު ކާމިޔާބު ކޮށްފައިވާ ސަންޗޭޒް ވަނީ އެ ޓީމާއެކު ކޮޕާ އެމެރިކާ ކާމިޔާބު ކޮށްފައެވެ.