އެމްޑީޕީ ކައުންސިލަރުންގެ ކޮންފަރެންސް ބާއްވަނީ
ކޮންފަރެންސް ބޭއްވުމަށް ހަމަޖެހިފައިވަނީ އޮގަސްޓް މަހުގެ 22 އަދި 23 ގައި ހުޅުމާލެ ހުރަވީ ސްކޫލްގައި
އެމްޑީޕީގެ ޑެޕިއުޓީ ސެކެޓްރީ ޖެނެރަލް އަފްޝަން ލަތީފް
މޯލްޑިވިއަން ޑިމޮކްރެޓިކް ޕާޓީ އެމްޑީޕީއަށް ނިސްބަތްވާ ކައުންސިލަރުންނަށް ޚާއްސަކޮށް ކޮންފަރެންސެއް ބޭއްވުމަށް އެޕާޓީން ނިންމައިފިއެވެ.
މި ކޮންފަރެންސާއި ގުޅޭގޮތުން މައުލޫމާތު ދެއްވަމުން އެޕާޓީގެ ޑެޕިއުޓީ ސެކެޓްރީ ޖެނެރަލް އަފްޝަން ލަތީފް ވިދާޅުވީ މި ކޮންފަރެންސް ކޮންފަރެންސް ބޭއްވުމަށް ހަމަޖެހިފައިވަނީ މިހިނގާ އޮގަސްޓް މަހުގެ 22 އަދި 23 ގައި ހުޅުމާލެ ހުރަވީ ސްކޫލްގައި ކަމަށެވެ.
ކައުންސިލަރުންގެ ކޮންފަރެންސްގައި ބައިވެރިވުމަށް ދައުވަތު އަރުވަމުންދާ ކަމަށާއި އެގޮތުން ކައުންސިލަރުންނަށް އެސްއެމްއެސް މެދުވެރިކޮށް ޕްރޮގްރާމާއި އަދި ދައުވަތުގެ ސިޓީ ފޮނުވަމުންދާ ކަމަށް އަފްޝަން ވިދާޅުވިއެވެ. މީގެ އިތުރުން ކޯލް ސެންޓަރ އެއްވެސް ހިނގަމުންދާ ކަމަށާއި ވަރަށް ގިނަ ކައުންސިލަރުންވަނީ ވަޑައިގަންނަވާނެކަމުގެ ޔަގީންކަން ދެއްވާފައިވާކަން އަފްޝަން ފާހަގަ ކުރެއްވިއެވެ.
މި ކޮންފަރެންސްގައި ކައުނސްލިރުންގެ ހުރި ކަންބޮޑުވުންތަކާއި ލާމަރުކަޒީ ނިޒާމަށް ގެނެވޭ އިސްލާހުތަކާއި މެދު މައުލޫމާތު ލިބިވަޑައިގެން ކުރައްވަން ހުރި ސުވާލުތަކެއް ކުރައްވާ މައުލޫމާތު ސާފުކުރުމަށް ލިބޭނެ ވަރަށް ރަނގަޅު ފުރުސަތެއް ކަމަށް އަފްޝަން ވިދާޅުވިއެވެ. ބުރާސްފަތި ދުވަހުގެ ރޭ ސަރުކާރުގެ ވުޒާރާތަކުގެ ބޭފުޅުންނާއި ކައުންސިލަރުންނާއި ބައްދަލު ކުރުގެ އިންތިޒާމްވެސް ހަމަޖެހިގެންދާނެ ކަމަށް ވެސް އަފްޝަން ވިދާޅުވިއެވެ.
މި ސެޝަންތަކަށް ވަޑައިގަތުމަށްޓަކައި އެމްޕީއެލްގެ ބަސް ހަމަޖައްސާފައިވާކަމަށާއި އެގޮތުން ބުރާސްފަތި ދުވަހު ހެނދުނު 9:00 ގައި މި ކޮންފަރެންސް ހުޅުވުމުގެ ރަސްމިއްޔާތު އޮންނައިރު 8:30 ގައި ގްރޭޓަރ މާލޭ ބަސް ސްޓޭޝަން ސަރަހއްދުން ބަސް ނައްޓާލާނެކަމަށް އަފްޝަން ވިދާޅުވިއެވެ. އެގަޑިއަށް ވަޑައިގަތުމަށް އެޕާޓީން ވަނީ އެދިފައެވެ.
މި ކޮންފަރެންސް ފެށުމަށް ބުރާސްފަތި ދުވަހު ހެނދުނު ބާއްވާ ޚާއްސަ ރަސްމިއްޔާތުގައި ރައީސުލް ޖުމްހޫރިއްޔާ އިބްރާހިމް މުހައްމަދު ސާލިޚާއި އެމްޑީޕީގެ ރައީސް އަދި އަދި ރައްޔިތުންގެ މަޖިލީހުގެ ރައީސްވެސް ބައިވެރިވެ ވަޑައިގަތުމަށް ވަނީ ހަމަޖެހިފައެވެ. ކޮންފަރެންސް ނިންމާލުމުގެ ރަސްމިއްޔާތު، ހުކުރުދުވަހުގެ ރޭ ފަރިއްކޮޅަކާއި ލައިވް މިއުޒިކާއި އެކު ކުލަގަދަކޮށް ބޭއްވުމަށް ވަނީ ހަމަޖެހިފައެވެ.
މި ކޮންފަރެންސަކީ ކައުންސިލަރުންނަށް ޕާޓީ އާއި ގުޅުން ބަދަހިކޮށް އެބޭފުޅުންގެ ހުރި ކަންބޮޑުވުންތައް ހިއްސާކުރުމަށް ލިބިގެންދާނެ ވަރަށް ބޮޑު ފުރުސަތެއް ކަމަށް އެމްޑީޕީން މައުލޫމާތު ދެއެވެ.
