ސްޕެނިޝް ލަލީގާގެ ޗެމްޕިއަން ބާސެލޯނާ ކުޅުނު ފުރަތަމަ މެޗުން ބަލިވެއްޖެއެވެ.
ހުކުރު ދުވަހުގެ ރޭ ކުޅުނު މެޗުން ބާސާ ބަލިވީ އެތުލެޓިކް ކްލަބްއާ ވާދަކޮށް 0-1 ގެ ނަތީޖާއަކުންނެވެ.
ބާސާގެ ކެޕްޓަން ލިއޮނެލް މެސީ ނުލައި، އެޓީމު އެތުލެޓިކް ދަނޑުގައި ކުޅުނު މެޗު ފެށިގެން ރަނގަޅަށް ކުޅެމުންދިޔައީ ބާސާއެވެ. އެގޮތުން އެޓީމުން ވަނީ އެތުލެޓިކްގެ ހާފަށް ބާރުބޮޑުކޮށް ހަމަލާވެސް އުފައްދާފައެވެ.
މި ހާފްގައި ލަނޑު ޖެހުމަށް ބާސެލޯނާގެ ލުއިސް ސުއަރޭޒް އަދި އެންޓޯނިއޯ ގްރިޒްމަންއަށް ހުސް ގިނަ ފުރުސަތުތައް ލިބުނެވެ. ނަމަވެސް އެ ފުރުސަތުތަކުގެ ބޭނުން މާ އެދެވޭ ގޮތެއްގައި ދެ ކުޅުންތެރިންނަށްވެސް ނުހިފެއެވެ.
ފުރަތަމަ ހާފްގައި އެތުލެޓިކްގެ ފަރާތުން މާގިނަ ހަމަލާތައް ނުފެނުނު ނަމަވެސް، އެޓީމަށް ލިބުނު މަދު ފުރުސަތުތަކުން ނުރައްކާތެރި ހަމަލާތައް ވަނީ އުފައްދާފައެވެ.
ދެވަނަ ހާފް ފެށިގެން އެތުލެޓިކްއިން އެޓީމުގެ އެޓޭކްތައް ވަރުގަދަކޮށްފައިވާއިރު، ފުލުފުލުގައި ހަމަލާތަކެއް އެޓީމުން ވަނީ އުފައްދާފައެވެ.
މެޗުގައި ފެނިގެންދިޔަ ހަމައެކަނި ލަނޑު 89 ވަނަ މިނެޓުގައި އެތުލެޓިކްއިން ވަނީ ކާމިޔާބު ކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ކަޕާގެ އެހީތެރިކަމާއެކު އަޑުރީޒްއެވެ.
ލީގުގައި އަމިއްލަ ދަނޑުގައި އަންނަ ހޮނިހިރު ދުވަހު ރެއާލް ބެޓިސްއާ ދެކޮޅަށް ބާސާ ނިކުންނައިރު، ހޯމަ ދުވަހު އެތުލެޓިކް ނިކުންނާނީ ރަށުން ބޭރުގައި ގެޓާފޭއާ ދެކޮޅަށެވެ.
