މާލޭގައި މީހެއްގެ އަތުން ފޯނެއް ފޭރިގެންފި
14 އޯގަސްޓު 2019 | ބުދަ 18:49ފޯނު ފޭރިގަނެފައިވަނީ ދާރުލް އާސާރު ކުރިމަތީގައި އޮންނަ މައިޒާން ކައިރިން
ފުލުހަކު މަގުމަތީގައި ހަރަކާތްތެރިވަނީ
ވެރިރަށް މާލޭގައި މީހެއްގެ އަތުން ފޯނެއް ފޭރިގެންފިއެވެ.
ފުލުހުން ބުނީ، މަގުމަތިން ހިނގާފައިދިޔަ މީހެއްގެ އަތުން ފޯނު ފޭރިގަނެފައިވާ ކަމުގެ މައުލޫމާތު ލިބިފައިވާ ކަމަށާ ފޯނު ފޭރިގަނެފައިވަނީ ބުދަ ދުވަހުގެ ރޭ 20:48 ހާއިރު ކަމަށެވެ.
މީގެ އިތުރުން، ފޯނު ފޭރިގަނެފައިވަނީ ލިލީ މަގާ ޗާންދަނީ މަގު ގުޅޭ ކަންމަތިން (ދާރުލް އާސާރު ކުރިމަތީގައި އޮންނަ މައިޒާން) ކައިރިން ކަމަށް ފުލުހުން މައުލޫމަތު ދީފައިވެއެވެ.
އެމީހާގެ އަތުން ފޯނު ފޭރިގެންފައިވަނީ ސައިކަލެއްގައި ދިޔަ ދެ މީހަކު ކަމަށްވެސް ފުލުހުން ބުނެފައިވެއެވެ.
އީދު ބަންދާ ގުޅިގެން ވައްކަމާއި ފޭރުމުގެ އަމަލުތައް ގިނަވާނެ ކަމަށް ލަފާކުރެވޭތީ ފުލުހުން ވަނީ، މުދަލަށް ރައްކާތެރިވުމަށް އިލްތިމާސް ކޮށްފައެވެ.
މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
