އެމްޑީޕީ ޒުވާނުންގެ ހިތްވަރުގެ ލޯގޯ ޑިޒައިން ކުރުމަށް ހުޅުވާލައިފި
ކުރެހުން ހުށަހެޅޭނެ އެންމެ ފަހު ތާރީހަކީ 23 އޯގަސްޓް
އެމްޑީޕީގެ ޒުވާނުންގެ ހިތްވަރުގެ ރައީސް، ނައިބު ރައީސް، އަދި ކޮންގްރެސް ޑިރެކްޓަރ، އެމްޑީޕީން ބޭއްވި ނޫސްވެރިންގެ ބައްދަލުވުމެއްގެ ތެރެއިން
އެމްޑީޕީ ޒުވާނުންގެ ހިތްވަރުގެ ލޯގޯ ޑިޒައިންކޮށް ކުރެހުމަށް ހުޅުވާލައިފިއެވެ.
އެމްޑީޕީން ބުނީ ދިވެހިރައްޔިތުންގެ ޑިމޮކްރެޓިކް ޕާޓީގެ ޒުވާނުންގެ ކޮންގްރެސގައި ޒުވާނުންގެ ހިތްވަރުގެ އައު ލޯގޯ ފާސްކުރުމަށް އެޖެންޑާ ކުރެވިފައިވާ ކަމަށާއި އެހެންކަމުން ލޯގޯ ޑިޒައިންކޮށް ކުރެހުމަށް އާންމުކޮށް ހުޅުވާލާކަމަށެވެ.
ލޯގޯ ޑިޒައިން ކުރާއިރު ބޭނުންކުރަން ޖެހޭ މައިގަނޑު ކުލަ އަކީ ރަން ރީނދޫ ކުލަ ކަމަށާއި ތީމް އިން ޒުވާނުން، ލީޑަރުން ފެންނަން ޖެހޭނެ ކަމަށް އެމްޑީޕީން ބުނެއެވެ. އެ ޕާޓީން އިތުރަށް ބުނީ ލޯގޯ ޑިޒައިންކޮށް ކުރެހުން ހުށަހެޅޭނެ އެންމެ ފަހު ތާރީހަކީ 23 އޯގަސްޓް ކަމަށާއި އެންމެ ރަނގަޅު ލޯގޯ ޑިޒައިން ކުރާ ފަރާތަކަށް އިނާމެއްގެ ގޮތުން ތިން ހާސް ރުފިޔާ ލިބިގެންދާނެ ކަމަށެވެ.
ހުށަހެޅުންތަކުގެ ތެރެއިން ހޮވާލެވޭ ލޯގޯ އަކީ މުސްތަޤްބަލުގައި އެ ޕާޓީގެ ޒުވާނުންގެ ހިތްވަރުން ރަސްމީކޮށް ދެން ބޭނުންކުރާނެ ލޯގޯކަމަށް ވެސް އެމްޑީޕީން ބުނެއެވެ.
އެމްޑީޕީގެ ފުރަތަމަ ޔޫތު ކޮންގްރެސް ބޭއްވުމަށް ހަމަޖެހިފައިވަނީ މަހު 31 ވަނަ ދުވަހުއެވެ. ކޮންގްރެސް ޑިރެކްޓަރ އައިކް އަހުމަދު އީސާ ވިދާޅުވީ، ޔޫތް ކޮންގްރެސް ބޭއްވުމަށް ހަމަޖެހިފައިވަނީ އޮގަސްޓް މަހުގެ 31 ވަނަ ދުވަހު ހުޅުމާލޭ، ހުރަވީ ސްކޫލްގައި ކަމަށެވެ. އެގޮތުން ކޮންގްރެސްގައި ބައިވެރިވެލައްވާ ކޮންގްރެސްމަނުން އެއްތަނަކަށް ޖަމާވެ، އަސާސީ ގަވާއިދު ތައްޔާރުކޮށް އެކުލަވާލުމާއި ޕާޓީގެ ޒުވާނުންގެ ގޮފީގެ މަސައްކަތްތައް ކުރިއަށް ގެންދާނެ ޕްލޭނެއް އެކުލަވާލުމުގެ އިތުރުން ކޮންގްރެސް ކުރިއަށް ގެންދިއުމުގެ ޕްލޭނެއް އެކުލަވާލުމަށް ޕްރީ ކޮންގްރެސް ވޯކްޝޮޕެއް، އޮގަސްޓް މަހުގެ 30 ވަނަ ދުވަހު ބޭއްވާނެކަމަށް އައިކް ވިދާޅުވިއެވެ.
އެމްޑީޕީގެ ޔޫތު ކޮންގްރެސްގައި އަސާސީ ގަވައިދު އެކުލަވާލާ ފާސްކުރުމުގެ އިތުރުން އާ ލޯގޯއެއް ފާސް ކުރެވިގެންދާނެއެވެ. އޭގެ އިތުރުން ކުރިއަށް އޮތް ތިން އަހަރުގެ ތަސައްވުރެއް އެކުލަވާލުމާއި، ނިމިގެން ދިޔަ އަހަރުތަކުގެ ރިޕޯޓު އިއްވުންވެސް ވަނީ އެޖެންޑާ ކުރެވިފައެވެ.
އެމްޑީޕީގެ ޔޫތް ކޮންގްރެސް ބޭއްވުމުގެ މައިގަނޑު މަގުސަދަކީ، ޒުވާނުންނަށް ސިޔާސީ ހަރަކާތްތައް އިންތިޒާމް ކުރުމުގެ ފުރުސަތު ތަނަވަސްކޮށްދިނުމާއި އެކިއެކި ދާއިރާތަކުން، އެކިއެކި ފިކުރުތަކުގެ ޒުވާނުންގެ ޚިޔާލު ބަދަލުކޮށް މަޝްވަރާކުރުމެވެ.
