ވިއްސާރައިގައި ގެއްލުން ލިބުނު ރަށްތަކުގެ ހާލަތު މިދަނީ ބަލަމުން: ޑިޒާސްޓަރ
ގެއްލުން ލިބުނު ރަށްރަށުގެ ހާލަތު މޮނިޓަރ ކުރަމުން މިދަނީ
މާލެސިޓީއަށް މޫސުމް ގޯސްވެފައި
ވިއްސާރައިގައި ގެއްލުން ލިބުނު ރަށްތަކުގެ ހާލަތު ބަލަމުންދާ ކަމަށް ނެޝަނަލް ޑިޒާސްޓަރ މެނޭޖުމަންޓް ސެންޓަރ (އެންޑީއެމްއޭ) ބުނެފިއެވެ.
ޑިޒާސްޓަރ ސެންޓަރުން ބުނީ ރާއްޖޭގެ ދެކުނު ސަރަޚައްދަށް ކުރަމުންދާ ވިއްސާރާގައި ގެއްލުން ލިބުނު ރަށްރަށުގެ ހާލަތު އެ އޮތޯރިޓީއިން މޮނިޓަރ ކުރަމުންދާ ކަމަށާއި ފުރާޅު އެއްލާލި ގެތަކުގެ ފުރާޅު އެޅުމުގެ މަސައްކަތް ކައުންސިލްތަކުން ކުރަމުންދާ ކަމަށެވެ.
ރާއްޖެއަށް މިހާރު ކުރަމުންދާ ވިއްސާރައިގައި ފުވައްމުލަކު ސިޓީގެ ދެ ގެއެއްގެ ފުރާޅު ވަޔާ އެއްލާލާފައިވާއިރު އައްޑޫ ސިޓީގެ 24 ގެ އެއްގެ ފުރާޅަށް އެކި ވަރުގެ ގެއްލުން ލިބިފައިވާކަމަށް ފުލުހުން މައުލޫމާތު ދެއެވެ. އަދި މާލޭ ފަޅުތެރޭގައި އަޅާފާއޮތް ލޯންޗެއް އަޑިއަށް ގޮސްފައިވާ ކަމަށް ފުލުހުން ބުންޏެވެ.
ރާއްޖެއަށް މިހާރު ކުރަމުންދާ ވިއްސާރާގައި ކަނޑުމަތީގެ ބައެއް ހާދިސާތައް ވެސް ދަނީ ހިނގަމުންނެވެ. އެގޮތުން ހުރިހާ ފަރާތްތަކުން މޫސުމަށް ޚާއްސަ ސަމާލުކަމެއް ދިނުމަށް މެޓް އޮފީހުން ވަނީ އިލްތިމާސްކޮށްފައެވެ.
މެޓް އޮފީހުން ބުނީ އާދީއްތަ ދުވަހު ހެނދުނު 10:00 އިން ހޯމަ ދުވަހުގެ ހެނދުނު 10:00 އަށް ރާއްޖޭގެ އެކިހިސާބަށް ބޯކޮށް ވިއްސާރަކުރާނެ ކަމަށާއި، ގުގުރުން އެކަށީގެންވާ ކަމަށެވެ.
