ގެއްލިގެން އުޅުނު "ނޫރު" ނަމަކަށްކިޔާ ސަޕްލައި ދޯނި ފެނިއްޖެ
11 އޯގަސްޓު 2019 | އާދީއްތަ 07:38ދޯނި ފެނުނީ ރިސޯރޓްގެ ލޯންޗަކަށް އާދިއްތަ ދުވަހު ހެދުނު 10:36 ހާ އިރު
ނޫރު ދޯނި
ދެކުނުގެ އަތޮޅުތަކަށް މިހާރު ކުރަމުންދާ ވިއްސާރާގައި އައި ކޮޅިގަނޑެއްގައި، ގއ.އަތޮޅުގައި ހިންގާ ރޮބިންސަން ކްލަބް މޯލްޑިވްސް ރިސޯޓު ފަޅުތެރޭ އަޅާފައި އޮއްވާ ގެއްލުނު "ނޫރު" ނަމަކަށް ކިޔާ ސަޕްލައި ދޯނި ފެނިއްޖެއެވެ.
އެމްއެންޑީއެފް އިން މައުލޫމާތު ދިން ގޮތުގައި ގެއްލިގެން ހޯދަމުން ދިޔަ 75 ފޫޓުގެ ސަޕްލައި ދޯނި އެ ރިސޯރޓްގެ ލޯންޗަކަށް އާދިއްތަ ދުވަހު ހެދުނު 10:36 ހާ އިރު އެ އަތޮޅު ހިރުފުށި ކައިރިން ފެނިފައިވާކަމަށެވެ.
މި ހާދިސާގެ މައުލޫމާތު އާދިއްތަ ދުވަހު ހެނދުނު 07:10 އެމްއެންޑީއެފް ކޯސްޓްގާޑުގެ މެރިޓައިމް ރެސްކިއު ކޯޑިނޭޝަން ސެންޓަރަށް ލިބުމާއެކު އެމްއެންޑީއެފް ސަދަން އޭރިއާ ކޯސްޓްގާޑް ސްކޮޑްރަންއިން ވަނީ އެ ދޯނި ހޯދުމުގެ މަސައްކަތްފަށާފައެވެ.
އެމްއެންޑީއެފުން ބުނީ މިދޯނި ގެއްލުނު އިރު އެއްވެސް މީހަކު ދޯނީގައި ހުރިކަމުގެ މައުލޫމާތެއް ލިބިފައެއް ނުވާ ކަމަށެވެ. އަދި އެ ރިސޯޓުން މައުލޫމާތު ދިންގޮތުގައި ރޭ މެންދަމު 02:00 ހާއިރު ވެސް އެ ދޯނި ފައްތިޔަލުގައި އޮތްކަމަށާއި ދޯނި ގެއްލިފައިވާކަން ފާހަގަކުރެވުނީ ރޭ ފަތިހު 05:30 ހާއިރު ކަމަށް އެމްއެންޑީއެފުން މައުލޫމާތުދެއެވެ.
