މުދާ ބަރުކޮށްގެން ދަތުރު ކުރަމުންދިޔަ ދޯންޏެއް އަރިއަޅާލާ މުދާތައް ކަނޑަށް ދޫވި ކަމުގެ ރިޕޯޓް ލިބިފައިވާތީ، އެ ސަރަހައްދުގައި ދަތުރު ކުރަމުންދާ ފަރާތްތަކުން ސަމާލުވުމަށް މޯލްޑިވްސް ނެޝަނަލް ޑިފެންސް ފޯސް(އެމްއެންޑީއެފް) އިން އިލްތިމާސްކޮށްފިއެވެ.
އެމްއެންޑީއެފް އިން ބުނެފައިވަނީ ދޯންޏެއް އަރިއަޅާލައިގެން އުޅޭ ކަމުގެ މައުލޫމާތު ލިބިފައިވަނީ ހޮނިހިރު ދުވަހު ހެނދުނު 10:30 ހާއިރު ކަމަށާ ކ. މާހަލް ކައިރިން ދަތުރުކުރަމުން ދިޔަ އެ ދޯނީގައި އެވަގުތު ތިބީ ދިވެއްސަކާއި ތިން ބިދޭސީން ކަމަށެވެ.
އަރިއަޅާލަފައިވަނީ "ސަމޯރާ 2" ނަމަކަށް ކިޔާ ދޯންޏެކެވެ. އަދި އެ ދޯނި ދަތުރުކުރަމުން ދިޔައީ މާލެއިން ފުރައިގެން މާލެ އަތޮޅު ކައިރިއަށް ކަމަށް އެމްއެންޑީއެފުން ބުނެފައިވެއެވެ.
މީގެ އިތުރުން، ކޯސްޓްގާޑް ގެ ޑައިވަރުންގެ ޓީމާއެކު ކޯސްޓްގާޑުގެ ލޯންޗު އެސަރަހައްދަށް ދަތުރުކޮށްފައިވާ ކަމަށް ވެސް އެމްއެންޑީއެފުން ބުނެފައިވެއެވެ.
މި ހާދިސާގައި އެއްވެސް މީހަކަށް އަނިޔާ ލިބިފައިވާ ކަމަށް ރިޕޯޓުކޮށްފައި ނުވާ ކަމަށް ވެސް އެމްއެންޑީއެފުން ބުނެފައިވެއެވެ.
