ކަނޑައަޅާފައިވާ އަގަށްވުރެ ގިނައިން ފައިސާ ނަގައިގެން 6 ޓެކްސީ ޑްރައިވަރުން ޖޫރިމަނާކޮށްފި

ޓްރާންސްޕޯޓް އޮތޯރިޓީން ކަނޑައަޅާފައިވާ އަގުތަކަށްވުރެ ބޮޑުއަގުގައި ޓެކްސީއަށް ފައިސާ ނަގައިގެން 6 ޓެކްސީ ޑްރައިވަރަކު ޖޫރިމަނާކޮށްފައިވާ ކަމަށް ފުލުހުން ބުނެފިއެވެ.

ހޮނިހިރު ދުވަހު ފުލުހުން ކުރި ޓްވީޓެއްގައި ބުނީ، ޓްރާންސްޕޯރޓް އޮތޯރިޓީން ކަނޑައަޅާފައިވާ މިންގަނޑަށްވުރެ ގިނައިން ފައިސާ ނަގާ ޓެކްސީތަކާމެދު ފިޔަވަޅު އެޅުމަށް އޯގަސްޓް 7 ވީ ބުދަ ދުވަހު ފުލުހުން ފެށި ޚާއްސަ އޮޕަރޭޝަންގައި ހުކުރު ދުވަހުގެ ނިޔަލަށް 6 ފަރާތެއް ޖޫރިމަނާ ކުރެވިފައިވާ ކަމަށެވެ.

ފުލުހުން 6 ޓެކްސީ ޑްރައިވަރެއް ޖޫރިމަނާކޮށްފައިވާއިރު، ބުދަ ދުވަހު ޓްރާންސްޕޯޓް އޮތޯރިޓީން ނެރެފައިވާ އިއުލާނެއްގައި ބުނެފައިވަނީ ޓެކްސީ ކުރާ ފަރާތްތަކުން ބޮޑު އަގު ނަގާނަމަ 750 ރުފިޔާ އިން ޖޫރިމަނާ ކުރާނެ ކަމަށާއި، އޭގެ އިތުރުން ޓެކްސީގެ ޑިކީއަށް އަރުވާ ދާގީނާއަކުން އިތުރު އަގެއް ނެގުމަކީ މަނާކަމެއް ކަމަށެވެ.

ޓްރާންސްޕޯޓް އޮތޯރިޓީން މާލެ އަދި ހުޅުމާލޭގެ އެތެރޭގެ ދަތުރަކަށް 25 ރުފިޔާ ކަނޑައަޅާފައިވާއިރު، މާލެއާއި ހުޅުމާލެއިން ހުޅުލެއަށް ކަނޑައަޅާފައިވަނީ ދަތުރެއް 60 ރުފިޔާއަށެވެ. އަދި މާލެ އިން ހުޅުމާލެއަށް ނުވަތަ ހުޅުމާލެ އިން މާލެއަށް ކަނޑައަޅާފައިވަނީ 75 ރުފިޔާއެވެ.

އަގުތައް ޓްރާންސްޕޯޓް އޮތޯރިޓީން މިގޮތަށް ކަނޑައަޅާފައިވާއިރު އެކަށީގެންވާ އާމްދަނީއެއް ނުލިބޭނެ ކަމަށް ބުނެ، ކަނޑައަޅާފައިވާ އަގުތަކުގައި ޓެކްސީ ހިދުމަތް ނުދޭނެ ކަމަށް ދިވެހި ޑްރައިވަރުންގެ އެސޯސިއޭޝަނުން ވަނީ ބުނެފައެވެ.

ޑްރައިވަރުންގެ ފަރާތުން ހުށައަޅާފައިވާ އަގުތަކުގައި ވަނީ ހުޅުލެއަށް ދަތުރުކުރާ އަގުތައް ފިޔަވައި މާލޭ ސަރަހައްދުގައި ކުރާ ހުރިހާ ދަތުރެއްގެ އަގުތައް ބޮޑުކުރާށެވެ. އަދި ހަމަ ކުރިން ނެގި އުސޫލުގެ ތެރެއިން ދާގީނާއަކަށް ފަސް ރުފިޔާ އަދި ވެއިޓިން ޗާޖަށް ކޮންމެ ފަސް މިނެޓަކަށް ހަތަރު ރުފިޔާގެ ރޭޓުން ނެގުމަށް ވެސް ހުށައަޅާފައިވެއެވެ.

ޓްރާންސްޕޯޓް އޮތޯރިޓީން ވަނީ ޓެކްސީގެ ހިދުމަތް ދިނުމުގެ އަގުތައް ކަނޑައެޅި އިއުލާނުގައި ޓެކްސީގެ ހިދުމަތްދޭ ހުރިހާ ފަރާތްތަކަށް އެޕްލިކޭޝަން ބޭނުންކުރަން މަޖުބޫރުކޮށްފައި އޮތް އޮތުން ބާތިލް ކޮށްފައެވެ. އެންމެ ފަހުން ކުރި އިއުލާނުގައިވާ ގޮތުން ނަމަ މިހާރު ޓެކްސީ އެޕްލިކޭޝަން ބޭނުންކުރުން މަޖުބޫރު ކޮށްފައިވަނީ 1 އޮގަސްޓުގެ ފަހުން ރަޖިސްޓްރީކުރާ ޓެކްސީތައް އެކަންޏެވެ. ޓްރާންސްޕޯޓް އޮތޯރިޓީން ކުރި އިތުރު އިއުލާނެއްގައި ވަނީ ޓެކްސީ ކުރާ ފަރާތްތަކުން، ރޭގަނޑު 12 އިން ފެށިގެން ހެނދުނު 6 އާއި ދެމެދު ކުރާ ދަތުރުތަކުން، ދަތުރަކަށް 5 ރުފިޔާ ނެގިދާނެ ކަމަށް ބުނެފައެވެ.