ލ. ދަނބިދޫ އިންޖީނުގޭގެ ޖަނަރޭޓަރުތައް އަނދާ ރަށުން ކަރަންޓު ކެނޑިއްޖެ އެވެ.
ރާއްޖެ.އެމްވީއަށް މައުލޫމާތުދެމުން ރަށު ކައުންސިލުން ބުނީ ޖަނަރޭޓަރުތަކުގައި ރޯވި ސަބަބު އަދި ނޭނގޭ ކަމަށާއި، އެ ގަޑީގައި ޑިއުޓީގައި ހުރި ކުއްޖާއަށް ފެނުނީ ޖަނަރޭޓަރުތަކުގައި ރޯވެފައި ވަނިކޮށްކަމަށެވެ.
ރޯވެ ބޭނުން ނުކުރެވޭ ވަރަށް އަނދާފައިވަނީ އިންޖީނުގޭގައި ބޭނުންކުރި ދެ ޖަނަރޭޓަރެކެވެ. ހާދިސާ ހިނގާފާވަނީ ހުކުރު ދުވަހުގެ ރޭ 08:25 ހާއިރު ކަމަށް ކައުންސިލުން ބުންޏެވެ.
ކައުންސިލުން ބުނީ ހާދިސާގެ ސަބަބުން މިހާރު ރަށުން ވަނީ އެއްކޮށް ކަރަންޓު ކެނޑިފަ އެވެ. އަދި މިހާރު ރަށަށް ކަރަންތު ދިނުމަށް އިތުރު ޖަނަރޭޓަރެއްވެސް ނެތްކަމަށް ކައުންސިލުން ބުންޏެވެ. މި ހާދިސާގައި އެއްވެސް މީހަކަށް އަނިޔާއެއް ލިބިފައެއް ނުވެ އެވެ.
ކައުންސިލުން ބުނީ ރޯވި ޖަނަރޭޓަރުތަކުގެ ތެރެއިން އެއް ޖަނަރޭޓަރަކީ ހުކުރު ދުވަހު ހަވީރު އޯވަހޯލް ކުރި ޖަނަރޭޓަރެއް ކަމަށެވެ.
