އައްޑޫ ފްލައިން ސްކޫލުގެ ބޯޓެެއް ޝަންގްރިއްލާ ރިސޯޓު ބޭރަށް ވެއްޓިއްޖެ
9 އޯގަސްޓު 2019 | ހުކުރު 13:29ދުއްވަން އިނީ ދިވެހި ދަރިވަރެއް
ބޯޓު ވެއްޓުނު ސަރަހައްދުގައި އެމްއެންޑީއެފްގެ ޑައިވަރުން ހަރަކާތްތެރިވަނީ
އޭޝިއަން އެކެޑެމިކް އޮފް އެއިރްނޮޓިކްސް އިން އައްޑޫ ސިޓީ ގަމުގައި ހިންގަ ފްލައިން ސްކޫލުްގެ ބޯޓެއް އެ އަތޮޅު ޝަންގްރިއްލާ ވިލިގިލި ރިސޯޓް އެންޑް ސްޕާ ކައިރިއަށް ވެއްޓިއްޖެ އެވެ.
އެ ބޯޓު ވެއްޓިފައިވަނީ ހުކުރު ދުވަހުގެ ހަވީރު އެވެ. ބޯޓު ވެއްޓުނު ސަރަހައްދުގައި މޯލްޑިވިއަން ނެޝަނަލް ޑިފެންސް ފޯސްގެ ޑައިވަރުން ދަނީ ހަރަކަތްތެރިވަމުންނެވެ. އެ އެއާ ކްރާފްޓު އޮތީ ކަނޑުގެ 8.6 މީޓަރު އަޑީގައި ކަމަށް އެމްއެންޑީއެފް އިން ބުންޏެވެ.
އައްޑޫ ސިޓީ މޭޔަރު އަބްދުﷲ ސޯދިގު (ސޯބެ) ރާއްޖެ.އެމްވީ އަށް ވިދާޅުވީ، ބޯޓު ވެއްޓިފައިވަނީ ޓެކްނިކަލް މައްސަލަ އެއް ދިމާވެެގެން އިމެޖެންސީގައި މޫދަށް ޖައްސަން އުޅެނިކޮށް ކަމަށެވެ. ދީމާވީ ކޮން ޓެކްނިކަލް މައްސަލައެއް ކަމެއް އަދި އެނގިފައިނުވާ ކަމަށް އޭނާ ވިދާޅުވި އެވެ.
ބޯޓުން ވެއްޓުނު އިރު ބޯޓު ދުއްވަން އިނީ ޕައިލެޓް ކޯސް ހަދާ ދިވެހި ދަރިވަރެކެވެ. އޭނާގެ އިންސްޓްރަކްޓަރަކަށް ހުރީ އިންޑިއާ މީހެއް ކަމަށް ސޯބެ ވިދާޅުވި އެވެ. އެ ދެމީހުންގެ ހާލުވެސް ރަނގަޅެވެ.
އެ މައްސަލަ ހިނގަން މެދުވެރިވި ސަބަބު ދެނެގަތުމަށް ހޮނިހިރު ދުވަހު ލަންކާގެ ޓީމެއް އައްޑުއަށް އައުމަށް ހަމަޖެހިފައިވާ ކަމަށް އޭނާ ވިދާޅުވި އެވެ.
