ކޮރެލްބުލެވާޑްއަށް ދޭނެ ބިން ފައިނަލްވެ، ކުންފުނިން ވަނީ އެއްބަސްވެފައި: ހައުސިން މިނިސްޓްރީ
އެ މަޝްރޫއު ހަވާލު ކޮށްފައިވަނީ ޝަންހުއާ ކުންފުންޏާ
ކްރެލްބުލެވާޑް މާލެ ސައިޓް
މާލެ ރަސްފަންނު ސަރަހައްދުގައި އަޅަން ނިންމި 100 މީޓަރު އުސް ކޮރެލް ބުލެވާޑް މަޝްރޫއު ހުޅުމާލެ އަށް ބަދަލު ކުރުމަށް ބިން ހަމަޖެހި، ޝަންހުއާ ކުންފުނިން އެކަމަށް އެއްބަސްވެފައިވާ ކަމަށް ހައުސިންގ މިނިސްޓްރީން ބުނެފި އެވެ.
ސަރުކާރުން މާލޭ ތޮއްޖެހުމުގެ މައްސަލައަށް ހައްލެއް ގެންނަން ކަމަށް ބުނެ ހުޅުމާލެއަށް އެ މަޝްރޫއު ބަދަލުކުރަން ނިންމީ މިދިޔަ އަހަރުގެ ފެބްރުއަރީ މަހު އެވެ. އަދި ސަރުކާރުގެ ނިންމުމާއި އެއްގޮތަށް ކޮރަލް ބުލެވާޑް ތަރައްގީކުރާ އެ ކުންފުންޏަށް މިނިސްޓްރީއާ އެޗްޑީސީއާ ގުޅިގެން އެ މަސައްކަތް ކުރިޔަށް ގެންދިޔުމަށް އަންގާފައިވެ އެވެ.
އެ މަޝްރޫއު ކުރިޔަށް ގެންދަން ހުޅުމާލެއިން 1،29000 އަކަ ފޫޓުގެ ބިމެއް ޖޫން މަހުގެ ތެރޭގައި ހަމަޖައްސާފައިވާއިރު، މާލެއިން ދިން ސަރަހައްދަށް ވުރެ ބޮޑު ސަރަހައްދެއް ހުޅުމާލެއިން ދޭން ނިންމާފައިވާ ކަމަށް ހައުސިން މިނިސްޓަރު އާތިފާ ޝުކޫރު ވަނީ ވިދާޅުވެފަ އެވެ. މާލެއިން އެ ކުންފުންޏަށް ދިނީ 70،000 އަކަ ފޫޓުގެ ބިމެކެވެ.
ކްރެލްބުލެވާޑް ހުޅުމާލެއަށް ބަދަލުކުރުމުގެ އެންމެ ފަހުގެ މައުލޫމާތު ރާއްޖެ.އެމްވީއާ ހިއްސާ ކުރަމުން ހައުސިން މިނިސްޓްރީގެ ޑެޕިއުޓީ މިނިސްޓަރު އަލީ ޝާމިން ވިދާޅުވީ، ހުޅުމާލެ ދެ ސަރަހައްދަކުން ބިން ދިނުމަށް އެޗްޑީސީއާ ވާހަކަ ދައްކައިގެން މިހާރު ހަމަޖެހިފައިވާ ކަމަށެވެ. އެހެން ނަމަވެސް ބިން މިހާތަނަށް ހަވާލުކޮށްފައެއް ނުވެއެވެ.
ޝާމިން ވިދާޅުވީ، ބިން ހަވާލުނުކުރެވިގެން އުޅެނީ އެ މަޝްރޫއު ހަވާލުކޮށްފައިވާ ޝަން ހުއާ ކުންފުނިން ''ޕްލޭން'' އަށް ބަދަލުތަކެއް ގެންނަން ބޭނުންވެގެން ކަމަށެވެ. އެގޮތުން އެޓާނީ ޖެނެރަލްގެ ލަފާޔަކަށް ހައުސިން މިނިސްޓްރީން ވަނީ އެދިފައެވެ.
އޭޖީން ޖަވާބެއް ލިބޭހާ އަވަހަކަށް ބިން ހަވާލުކުރުމުގެ އެއްބަސްވުމުގެ މަސައްކަތް ކުރިއަށް ދާނެ ކަމަށް އޭނާ ވިދާޅުވި އެވެ.
ޝާމިން ވިދާޅުވީ ބިން ހަވާލުކުރެވޭނެ ދުވަހެއް ދަންނަވަން ދަތިކަމަށެވެ.
ކޮރަލް ބުލެވާޑް އެޕާޓްމަންޓަކީ މާލޭ ރަސްފަންނު ސަރަހައްދުގައި، މިކްސްޑް ރެޒިޑެންޝަލް ޕާރޕަސްއަށް ތަރައްގީ ކުރަން ނިންމި އިމާރާތްތަކެކެވެ. އެގޮތުން ހައިއެންޑް އެޕާޓްމަންޓާއި ވިޔަފާރީގެ ބޭނުމަށާއި އޮފީސް ވެސް ހިމެނޭގޮތަށް ތަރައްގީކޮށް ނިންމަން އޭރު އެއްބަސްވެވުނީ ތިން އަހަރު ދުވަހުގެ ތެރޭގަ އެވެ.
