އިޔާދަކުރަނިވި ހަކަތަ އުފައްދަން އީޔޫ މެދުވެރިވެގެން 779 މިލިއަން ރުފިޔާގެ ލޯނެއް

ދިވެހިރާއްޖޭގައި އިޔާދަކުރަނިވި ހަކަތަ އުފައްދަން އެހީތެރިވުމުގެ ގޮތުން ޔޫރަޕުގެ އިއްތިހާދު (އީޔޫ) މެދުވެރިވެގެން 45 މިލިއަން ޔޫރޯ (779 މިލިއަން ރުފިޔާ) ގެ ލޯނެއް ފޯރުކޮށްދީފިއެވެ.

ބުރާސްފަތި ދުވަހު ފޮރިން މިނިސްޓްރީގައި، ބޭއްވި ނޫސްވެރިންގެ ބައްދަލުވުމެއްގައި، ޔޫރަޕިއަން ކޮމިޝަންގެ ނައިބު ރައީސާ ފެޑެރީކާ މޮގެރީނީ ވިދާޅުވީ މި ލޯނަކީ މޫސުމަށް އަންނަ ބަދަލުތަކާ ދެކޮޅަށް ރާއްޖެއިން އެހީތެރިވެދިނުމުގެ ގޮތުން ފޯރުކޮށްދިން ލޯނެއް ކަމަށެވެ. ޔޫރަޕިއަން އިންވެސްޓްމަންޓް ބޭންކް (އީއައިބީ) މެދުވެރިކޮށް ދިން ލޯނުގެ މަގުސަދަކީ ދެމެހެއްޓެނިވި އިޔާދަކުރެނިވި ހަކަތައިގެ ވަސީލަތްތައް ތަރައްގީ ކުރުމަށް ބާރުއެޅުން ކަމަށް ވެސް މޮގެރީނީ ވިދާޅުވިއެވެ.

ބާރު ދުވެއްޔެއްގައި ބަދަލުވަމުން އަންނަ ދުނިޔޭގައި މޫސުމަށް އަންނަ ބަދަލުތަކާއި ދެކޮޅަށް ކުރާ މަސައްކަތުގައި ކުޑަވެސް ދުލެއް ދީފިނަމަ އެކަމުގެ ހިތަ ނަތީޖާއާ ކުރިމަތިލާން ޖެހޭނެކަމަށް ވެސް މޮގެރީނީ ވިދާޅުވިއެވެ. މޫސުމަށް އަންނަ ބަދަލުތަކާއި އެކު ކަނޑުގެ ލޮނުގަނޑު އުފުލުމާއި ގުޅިގެން ދިވެހިރާއްޖެ ފަދައިން ޔޫރަޕުގެ ބައެއް ސަރަހައްދުތައް ނެތިދިއުމުގެ ބިރު އެބައޮތްކަމަށް މޮގެރީނީ ވިދާޅުވިއެވެ.

ޔޫރަޕުގެ ގައުމުތަކުން ވަނީ 2030 ވަނަ އަހަރުގެ ޖައްވަށް ބޭރުކުރާ ވިހަ ގޭސްތަކުގެ 40 އިންސައްތަ ކަނޑާލުމަށް އަޒުމް ކަނޑައަޅާފައެވެ. އެގޮތުން މިހާރު ޔޫރަޕުގެ ގައުމުތަކުންވެސް ވަނީ އެ އިއްތިހާދުގައި ހިމެނޭ ގައުމުތަކުގެ އިގްތިސާދުތަކުން ހަކަތަ ބޭނުންކުރާގޮތް ބަދަލުކޮށް ޖައްވަށް ބޭރުކުރާ ގެނދަބުޅި (ކާބަން އެމިޝަން) މަދުކުރަމުން އަންނަކަމަށް މޮގެރީނީ ވިދާޅުވިއެވެ.

ދެމެހެއްޓެނިވި ތަރައްގީއާއި އެކު މޫސުމަށް އަންނަ ބަދަލުތަކާއި ދެކޮޅަށް މަސައްކަތްކުރުމަކީ ޔޫރަޕާއި އޭޝިއާ ގުޅުވާލުމުގެ މަސައްކަތުގެ މުގުލުގައިވާކަން ކަމުގައި ވެސް އެކަމަނާ ފާހަގަކުރެއްވިއެވެ. މިއަމާޒަށް ވާސިލްވުމަށް ދަތުރުފަތުރުގެ ނިޒާމްތައް ގުޅުވާލުމާއި ހަކަތައިގެ ވިއުގަތައް ގާއިމްކުރުމާއި ޑިޖިޓަލް ވިއުގަތައް ގާއިމްކުރުމުގެ އިތުރުން ދެ ބައްރުގެ މީހުން ގުޅިގެން ކުރެވޭ މަސައްކަތްތައް ވެސް ހިމެނޭކަމަށް ވެސް މޮގެރީނީ ވިދާޅުވިއެވެ.

ދިވެހިރާއްޖެއާއި އެކު މިހާރު ފަށާފައިވާ މަސައްކަތުގައި، ރާއްޖެއާ ވަރަށް ގާތުން މަސައްކަތްކުރައްވަން ބޭނުންފުޅުވެލައްވާކަމަށް ވެސް އެކަމަނާ ވިދާޅުވިއެވެ. އެގޮތުން އެ އިއްތިހާދާއި ދިވެހިރާއްޖެއާ އޮތް ދޭދޭ ގުޅުން ބަދަހިކުރަން ބޭނުންވަނީ ދެފަރާތް ގުޅިގެން ހިންގާ މަޝްރޫއުތަކުގައި ތިމާވެއްޓާއި އިޖްތިމާއީ ކަންކަމަށާއި މާލީ ގޮތުން ދެކޮޅު ޖެހޭ މިންވަރަށް ބަލާފައިކަމަށް މޮގެރީނީ ވިދާޅުވިއެވެ. ޔޫރަޕު ވެސް ކުރިއަރައިގެން ގޮސްފައިވަނީ މިއުސޫލަތަކުގެ މައްޗަށް ބިނާވެގެން ކަމަށް އެކަމަނާ ފާހަގަކުރެއްވިއެވެ.

މިދިޔަ ޖުލައި މަހުގެ ތެރޭގައި ވެސް، ހާރިޖީ ވަޒީރު އަބްދުﷲ ޝާހިދު ބްރަސްލްސްއަށް ކުރެއްވި ޒިޔާރަތުގައި ޔޫރަޕުގެ އިއްތިހާދުން ވަނީ އިޔާދަކުރަނިވި ހަކަތަ އުފެއްދުމުގައި އެހީތެރިވެދިނުމުގެ ގޮތުން 5 މިލިއަން ޔޫރޯ (86.5 މިލިއަން ރުފިޔާ) ގެ ހިލޭ އެހީ ރާއްޖެއަށް ދީފައެވެ. މިއާއި އެކު އެ އިއްތިހާދުން ރާއްޖޭގައި އިޔާދަކުރަނިވި ހަކަތައިގެ ވަސީލަތްތައް އުފެއްދުމަށް ދީފައިވާ ޖުމްލަ އެހީގެ އަދަދު އުޅެނީ 865 މިލިއަން ރުފިޔާއަށް ވުރެ މަތީގައެވެ.