އިދިކޮޅު ފަރާތްތަކުން އީޔޫގެ މެމްބަރުންނާއި ބައްދަލުކޮށް، ކަންބޮޑުވުންތައް ހިއްސާކޮށްފި

ގުޅިފައިވާ ސިޔާސީ ޕާޓީތަކުގެ އިސްބޭފުޅުން ޔޫރަޕްގެ އިއްތިހާދުގެ މެމްބަރުންނާއި ބައްދަލުކޮށް، ރާއްޖެގެ މަޝްރަހާ ގުޅެގޮތުންހުރި ކަންބޮޑުވުންތައް ހިއްސާކޮށްފި އެވެ.

އިދިކޮޅު ފަރާތްތަކުން އީޔޫގެ މެމްބަރުންނާއި ބައްދަލުކުރުމަށް ޔޫރަޕަށް ކުރަމުންގެންދާ ދަތުރުގައި އިސްކޮށް ހުންނެވި ހެންވޭރު އުތުރު ދާއިރާގެ މެމްބަރު އަބްދުﷲ ޝާހިދު އެވެ.

ރާއްޖެޓީވީއަށް މައުލޫމާތުދެއްވަމުން ޝަހިދު ވިދާޅުވީ، އީޔޫގެ މެމްބަރުންނާއި ބައްދަލުކޮށް މަޝްވަރާކޮށްފައިވަނީ ސިޔާސީ މަސްރަހުގައި ރާއްޖެއަށް ދިމާވެފައިވާ ގޮންޖެހުންތަކާއި އަދި އިދިކޮޅު ފަރާތްތަކަށް ކުރިމަތިކުރުވާ ހުރަސްތަކާއި ގުޅޭގޮތުން ކަމަށެވެ. އަދި ބެލްޖިއަމްގެ ވެރިރަށް ބްރަސެލްސްގައި އީޔޫގެ މެމްބަރުންނާ ބައްދަލު ކުރައްވައި ދެއްކެވި ވާހަކަތަކުގައި އީޔޫ އިން ގޮވާލި ގޮވާލުންތަކަށް ސަރުކާރުން އަދިވެސް އިޖާބަނުދޭތީ އެކަމުގެ މައުލޫމާތު މެމްބަރުންނާ ހިއްސާ ކުރެއްވިކަމަށްވެސް ޝާހިދު ވިދާޅުވި އެވެ.

އީޔޫ އިން ވަނީ 2015 ވަނަ އަހަރުގެ ޑިސެމްބަރ މަހުގެ ތެރޭގައި ޤަރާރެއް ފާސްކޮށް ސިޔާސީ ގޮތުން ރާއްޖެ އަށް ހަމަޖެހުން ގެނައުމަށް މަޝްވަރާ ކުރުމަށާއި އިދިކޮޅު ލީޑަރުން ދޫކޮށްލުމަށާއި ސިޔާސީ ހަރަކާތްތައް ހިންގުމަށް ޖާގަ ދިނުމަށް ގޮވާލައިފަ އެވެ. އަދި މީޑިއާތަކަށް މިނިވަންކަން ދިނުމަށްވެސް މި ޤަރާރުގައި ބުނެފައިވެއެވެ. ނަމަވެސް މިއަދު މިހުރިހާ ކަމެއް ރާއްޖޭގައި އޮތީ އެތައް ގުނައެއް ފަހަތައް ޖެހިފައި ކަމަށާއި އަދި ވަކިން ހާއްސަކޮށް އަނިޔާވެރި ގޮތަކަށް މަރާލާފައިވާ ޔާމިން ރަޝީދު މަރާލި މައްސަލަގައިވެސް މިނިވން ތަހްޤީޤެއް ހިންގުމަށް ޔާމިންގެ އާއިލާއާއި އިދިކޮޅު ފަރާތްތަކުން ގޮވާލާފައިވަނިކޮށް އެކަމަށްވެސް ސަރުކާރުން އިޖާބަ ނުދޭ ކަން އިޔޫގެ މެމްބަރުންނަށް މައުލޫމާތު ހިއްސާކުރެއްވި ކަމަށް ޝާހިދު ވިދާޅުވި އެވެ.

އޭނާ ވިދާޅުވީ އީޔޫއިން މި ކަންކަން ވަރަށް ކައިރިން ބައްލަވާނެ ކަމުގެ ޔަޤީންކަން ލިބިފައިވާ ކަމަށާއި މިމަސައްކަތުގެ ރަނގަޅު ނަތީޖާ ފެނިގެންދާނެ ކަމަށެވެ.

މި ވަފްދުގައި ހިމެނިވަޑައިގަންނަވަނީ ޝާހިދުގެ އިތުރުން ކުރީގެ ރައީސް މައުމޫން އަބްދުލްގައްޔޫމްގެ ދަރިކަނބަލުން ޔުމްނާ މައުމޫނާއި އެސްޓީއޯގެ ކުރީގެ މެނޭޖިން ޑިރެކްޓަރު އަދި ކުރީގެ ޑިފެންސް މިނިސްޓަރު ކާނަލް މުހައްމަދު ނާޒިމްގެ ކޮއްކޮ އާދަމް އާޒިމާއި ޖުމްހޫރީ ޕާޓީން ކުރީގެ އެޑިޔުކޭޝަން މިނިސްޓަރު ޑރ. އާސިމް މުހައްމަދާއި ރައީސް މައުމޫން ފެކްޝަންގެ ޕީޕީއެމްގެ ނައިބް ރައީސް އައިމިނަތު ނާދިރާ އެވެ.