ތަހުގީގީ އިދާރާތަކަށް ފޯރުކޮށްދޭ މައުލޫމާތާ ގުޅިގެން ބޭންކާމެދު ދައުވާއެއް ނުކުރެވޭނެ: ބީއެމްއެލް
8 އޯގަސްޓު 2019 | ބުރާސްފަތި 03:00ރިޔާސީ ކޮމިޝަނާ ދެކޮޅަށް ބީއެމްއެލް އިން ވަނީ މައްސަލަ ހުށަހަޅާފައި
ބޭންކް އޮފް މޯލްޑިވްސް
ތަހުގީގީ އިދާރާތަކަށް ފޯރުކޮށްދޭ މައުލޫމާތާ ގުޅިގެން ބޭންކާމެދު ދައުވާ ނުކުރެވޭނެ ކަމަށް ބޭންކް އޮފް މޯލްޑިވްސް (ބީއެމްއެލް) އިން ބުނެފިއެވެ.
ބީއެމްއެލް އިން ނެރުނު ނޫސްބަޔާނެއްގައި ބުނެފައިވަނީ ބޭންކާއި، ކަސްޓަމަރުންނާއި މުވައްޒަފުންގެ އިތުރުން ގުޅުންހުރި އެންމެ ފަރާތްތަކެއްގެ މަސްލަހަތު ހިމާޔަތް ކުރެވޭނެ ފަދަ އެދެވޭ ހައްލެއް ޝަރީޢަތް މެދުވެރިކޮށް ހޯދުމަށްޓަކައި ސިވިލް ކޯޓުގައި އެ ބޭންކުން އެދުނީ ހައިކޯޓުން ކުރި ހުކުމާއި ގުޅިގެން ތަހުގީގީ އިދާރާތަކަށް މަޢުލޫމާތު ފޯރުކޮށްދިނުމުގައި ބޭންކުން އަމަލު ކުރަންޖެހޭ ކަމަށް އެ ބޭންކަށް ގަބޫލުކުރެވޭ ގޮތާއި ތަހުގީގީ އިދާރާތަކުން ދެކޭ ގޮތާމެދު ފަރަގު އުފެދިފައިވާތީ ކަމަށެވެ.
ސިވިލް ކޯޓުން ބުރާސްފަތި ދުވަހު ކޮށްފައިވާ ހުކުމްގައިވާ ގޮތުން ބޭންކިންގ އާ ބެހޭ ގާނޫނުގެ 41 ވަނަ މާއްދާގައި ލާޒިމްކުރާ މިންވަރަށް، ދިވެހިރާއްޖޭގެ ޤާނޫނުތަކާއި ގަވައިދުތަކާ އެއްގޮތްވާ ގޮތުގެ މަތީން ކަސްޓަމަރުންގެ މަޢުލޫމާތު ރިޔާސީ ކޮމިޝަންތަކާއި އަދިވެސް އެހެން ތަހުގީގީ އިދާރާތަކުން ވެސް ބޭންކުން މައުލޫމާތު ހޯދުމަށް ކޯޓު އަމުރެއް ބޭނުން ނުވާނެ ކަމަށާއި ލިޔުމުން އެދުމުން ބޭންކުތަކުން އެ މައުލޫމާތެއް ފޯރުކޮށްދޭން ޖެހޭނެ ކަމަށް ކަނޑައަޅާފައިވާ ކަމަށެވެ. މީގެ އިތުރުން ޖިނާއީ އިޖުރާއަތުގެ ގާނޫނުގެ 72 ވަނަ މާއްދާގެ (ބ)ގައި ބޭންކިން ގާނޫނުގެ މާއްދާއާ އެއްގޮތްވާ ގޮތުގެ މަތިން، ޖިނާއީ ކުށްތައް ތަހުގީގު ކުރުމުގެ ގާނޫނީ ބާރު ލިބިފައިވާ ފަރާތަކުން ލިޔުމަކުން އެދިގެން، ބޭންކުގެ ކަސްޓަމަރުންގެ އެކައުންޓްތަކާއި، ޑިޕޮސިޓްތަކާއި، ޓްރަސްޓްތަކާއި، ސޭފް ޑިޕޮސިޓް ބޮކްސްތަކުގެ މައުލޫމާތުތައް ހޯދުމަކަށް ހުރަސް ނާޅާ ކަމަށް ވެސް ކޯޓު ހުކުމްގައި ހިމެނޭ ކަމަށް ބީއެމްއެލް އިން ވަނީ ފާހަގަކޮށްފައެވެ.
އެހެންކަމުން ކޯޓް ހުކުމާ އެއްގޮތަށް އަމަލުކުރުމުގެ ސަބަބުން ބޭންކާމެދު ވެސް އަދި ބޭންކުގެ މުވައްޒަފަކާ މެދުވެސް އެއްވެސް ފަރާތަކަށް ޝަރުޢީ މައްސަލައެއް ހުށަނޭޅޭ ކަމަށް ކަނޑައެޅިފައިވާ ކަމަށާއި މިއީ މި ބޭންކުން ސިވިލް ކޯޓަށް އެ މައްސަލަ ހުށަހަޅަން ޖެހުނު މައިގަނޑު ސަބަބު ކަމަށް އިއުލާނުގައިވެއެވެ.
