ދަށު ކޯޓުތަކުން ޖޭއެސްސީގައި އިންނަވާނެ މެމްބަރު ކަމަށް އިސް ގާޒީ ހައިލަމް ވާދަކުރައްވަނީ
ދަށު ކޯޓުން މެމްބަރަކު އިންތިޚާބު ކުރުން އޮންނާނީ މިމަހުގެ 24 ގައި
ކްރިމިނަލް ކޯޓުގެ އިސް ގާޒީ އަހުމަދު ހައިލަމް
ދަށު ކޯޓުތަކުން ޖުޑީޝަލް ސަރވިސް ކޮމިޝަން(ޖޭއެސްސީ)އަށް ކްރިމިނަލް ކޯޓުގެ އިސް ގާޒީ އަހުމަދު ހައިލަމް ވާދަ ކުރައްވައިފިއެވެ.
ހައިލަމްގެ އިތުރުން އެ މަގާމަށް ވާދަ ކުރައްވަނީ ލ. މާމެންދޫ ކޯޓުގެ އިސް މެޖިސްޓްރޭޓް އަލީ ޝަރީފާއި ދ. ކުޑަހުވަދޫ ކޯޓުގެ އިސް މެޖިސްޓްރޭޓް އަބްދުއްރައްޒާގު މުހައްމަދެވެ.
މިމަހުގެ 24 ވަނަ ދުވަހު ބާއްވާ ދަށު ކޯޓުތަކުން ޖޭއެސްސީއަށް އައްޔަން ކުރާނެ ކެންޑިޑޭޓަކު ހޮވުމަށް ބާއްވާ އިންތިޚާބުގައި މިހާރު ވަނީ ކެންޑިޑޭޓުންގެ ނަންތައް ތަރުތީބު ކޮށްފައެވެ.
ދަށު ކޯޓުތަކުން ޖޭއެސްސީއަށް މެމްބަރަކު އިންތިޚާބު ކުރަނީ ދަށު ކޯޓުތަކުގެ ފަނޑިޔާރުންގެ ތެރެއިން މިހާރު އިންނަވާ ޖުވެނައިލް ކޯޓުގެ ގާޒީ މުހައްމަދު އީސާފުޅުގެ ދައުރު މިމަހު ހަމަވާތީއެވެ.
ޖޭއެސްސީއަށް އާންމުންގެ ތެރެއިން ކަނޑައަޅާ މެމްބަރުގެ ދައުރު ވެސް މިއަހަރު ހަމަވާތީ އެ މަގާމަށް ވެސް ތިން ބޭފުޅަކު މިހާރު ވަނީ ކުރިމަތިލައްވައިފަ އެވެ. އެއީ ޚާލިދު ޤާސިމާއި ޒުބައިރު އަހްމަދު މަނިކާއި މިރުފަތު ފާއިޒެވެ. ނަމަވެސް އެ މަގާމަށް އައްޔަން ކުރާނެ ބޭފުޅުން ކަނޑައަޅާނީ ރައްޔިތުންގެ މަޖިލީހުންނެވެ.
