ސްޓިކާ ޖަހަނީ އާއްމުންނަށް އުނދަގޫވާ ގޮތަށް ޕާކް ކުރާތީ: ނަހުލާ
ހައްލު ހޯދުމުގެ މަސައްކަތް ދަނީ ކުރަމުން
ފުލުހުން ސައިކަލް ތަކެއް ސްޓިކާ ޖަހަނީ
އެއްގަމު އުޅަނދު ތަކުގައި ސްޓިކާ ޖަހަނީ އާއްމުންނަށް އުނދަގޫވާ ގޮޮތަށް ޕާކް ކުރަތީ ކަމަށް ޓްރާންސްޕޯޓް މިނިސްޓަރު އައިޝަތު ނަހުލާ ވިދާޅުވެއްޖެ އެވެ.
ސައިކަލްގައި ސްޓިކާ ޖަހާ މައްސަލާގައި ބުދަ ދުވަހު ޓްރާންސްޕޯޓް މިނިސްޓަރު ނަހުލާ ވަނީ ރައްޔިތުންގެ މަޖިލީހަށް ހާޒިރުކޮށްފަ އެވެ.
މެމްބަރުން ކުރިމަތި ކުރެއްވި ސުވާލުތަކަށް ޖަވާބު ދެއްވަމުން ނަހުލާ ވިދާޅުވީ، ރައްޔިތުންގެ އާދަކާދަ ހުންނަ ގޮތުން ކޮންމެ މީހަކުވެސް އެމީހަކު ދާ ތަނެއްގެ ކުރިމަތީގައި ޕާކް ނުކުރެވޭނަމަ ޕާކިން ޒޯނަކަށް ބެލުމެއް ނެތި ޕާކް ކުރަމުންދާ ކަމަށެވެ.
އޭގެ ސަބަބުން އެކަމުގެ އުނދަގޫ ހުރިހާ ރައްޔިތުންނަށް ފޯރާ ކަމަށާއި، އާއްމުންގެ މަސްލަހަތާ ގުޅޭ ގޮތުން ކޮންމެހެން އަޅަން ޖެހޭ ފިޔަވަޅުތައް އަޅާނުލާ ދޫކޮށްލުމަކީ ކުރެވޭނެ ކަމެއް ކަމަށް ނުފެންނާތީ ފުލުހުންް ސްޓިކާ ޖަހަމުންދަނީ ގާނޫނާ ގަވާއިދާ ހިލާފަށް އަމަލު ކުރަމުން ދާތީ ކަމަށް ވިދާޅުވި އެވެ.
ސްޓިކާ މައްސަލައަށް ދާއިމީ ހައްލެއް ގެނައުމަށް ކުރެވެން ހުރި ކަންތައްތައް ބަލައި ދިރާސާ ކުރަމުންދާކަން ނަހުލާ ފާހަގަކުރެއްވި އެވެ. ޕާކް ކުރާނެ ތަންތަން ނުދައްކާ ސްޓިކާ ނުޖަހާނެ ކަމަށް މި ސަރުކާރުން ބުނެފައިވާއިރު، އެގޮތަށް އަމަލު ނުކުރާތީ ކަމަށް ބުނެ އާއްމުންގެ ގިނަ ފަރާތްތަކުން ދަނީ ކަންބޮޑުވުން ފާޅުކުރަމުންނެވެ.
މި އަހަރުގެ މާރޗް މަހުގެ 30 ވަނަ ދުވަހުން ފެށިގެން އޭޕްރީލް މަހުގެ ފަސް ވަނަ ދުވަހާ ހަމައަށް ފުލުހުން ވަނީ 1350 އުޅަނދެއްގައި ސްޓިކާ ޖަހާފަ އެވެ. އެއްގަމު އުޅަނދުގައި ފުލުހުން ސްޓިކާ ޖަހައިގެން ބައި މިލިއަނެއްހާ ރުފިޔާ މިދިޔަ މެއި މަހުގެ ތެރޭގައި އެކަނި ވެސް ހޯދަފައިވާކަން ފުލުހުންގެ ތަފާސް ހިސާބުތަކުން ދައްކައެވެ.
