އިންޑިއާގައި 14 އަހަރުން ދަށުގެ ކުޅުންތެރިންނަށް އަމާޒުކޮށްގެން ބޭއްވި އިންޓަނޭޝަނަލް ކަޕް އޮފް ޖޯއިގެ ޗެމްޕިއަންކަން ހޯދި މާޒިޔާގެ ޓީމު ރާއްޖެ އައިސްފިއެވެ.

އަންގާރަ ދުވަހުގެ ރޭ މާޒިޔާގެ 14 އަހަރުންދަށުގެ ފުޓުބޯޅަ ޓީމު ރާއްޖެ އައިއިރު ޓީމަށް އެއާޕޯޓްއިން މަރުހަބާކީ ފުޓްބޯޅަ އެސޯސިއޭޝަން އޮފް މޯލްޑިވްސް ގެ ރައީސް ބައްސާމްގެ އިތުރުން މާޒިޔާގެ އިސްވެރިންނާއި، ގައުމީ ފުޓުބޯޅަ ޓީމުގެ ކޯޗުގެ އިތުރުން ގްރީން ސްޓްރީޓްގެ ކޯޗު ސުޒޭންގެ އިތުރުން އެ ޓީމުގެ ކެޕްޓަން އަޝްފާގެވެ.

މާޒިޔާގެ 14 އަހަރުން ދަށުގެ ޓީމުގެ ކޯޗް އާރިފް ބުނީ މި މުބާރާތަކީ ވަރުގަދަ މުބާރާތެއް ކަމަށާއި މުބާރާތުގެ ޗެމްޕިއަންކަން ހޯދިނީ ކުޅުންތެރިންކުރި ބުރަ މަސައްކަތުން ކަމަށެވެ. އޭނާ އިތުރަށް ބުނީ ސެމީ ފައިނަލުގައި ކުޅެންޖެހުނީ ވަރަށް ވަރުގަދަ ޓީމަކާއި ދެކޮޅަށް ކަމަށާއި އެޓީމު ބަލިކުރެވުމުން ތަށި ލިބޭނޭ ކަމުގެ އުންމީދު ބޮޑުވި ކަމަށެވެ.

މުބާރާތުގެ ގްރޫޕް ސްޓޭޖުގައި މާޒިޔާ ކުޅުނު ތިން މެޗުގެ ތެރެއިން ދެ މެޗު ކާމިޔާބުކޮށްފައިވާއިރު، އެޓީމު ބަލިވީ އެންމެ މެޗަކުންނެވެ. މުޅި މުބާރާތުގައި މާޒިޔާއިން ވަނީ މޮޅު ކުޅުމެއް ދައްކާފައެވެ.

މުބާރާތުގައި މާޒިޔާގެ އިތުރުން 11 ޓީމެއް ވާދަކުރާއިރު، މުބާރާތް ކުޅުނީ ތިން ގްރޫޕަކަށް ބަހާލައިގެންނެވެ. މުބާރާތުގައި މާޒިޔާއަށް އިރުޝާދު ދީފައިވަނީ މުހައްމަދު އާރިފް (އާރިއްޕެ) އެވެ.

މިއީ މި މުބާރާތް ބާއްވާތާ ތިންވަނަ ފަހަރަށްވާއިރު، މިއީ މުބާރާތުގައި ރާއްޖޭގެ އެކަޑަމީއަކުން ބައިވެރިވި ފުރަތަމަ ފަހަރުކަން ފާހަގަ ކޮށްލެވެއެވެ. މުބާރާތުގައި އިންޑިއަން ސުޕަ ލީގު އަދި ބޮޑެތި ފުޓުބޯޅަ އެކަޑަމީތަކުން ވެސް ބައިވެރިވެއެވެ.