މެސީގެ އަމާޒު އަނެއްކާ ވެސް ހުރިހާ މުބާރާތެއް ކާމިޔާބުކުރުމަށް

އަންނަ ސީޒަނުގައި ވެސް އަމާޒަކީ ވާދަކުރާ ހުރިހާ މުބާރާތެއް ކާމިޔާބުކުރުން ކަމަށް ބާސެލޯނާގެ ކެޕްޓަން ލިއޮނެލް މެސީ ބުނެފިއެވެ.

މިދިޔަ ސީޒަން ހުޅުވުމުގެ ގޮތުން ބާސާއިން ބޮކަ ޖޫނިއަރސްއާ ދެކޮޅަށް ކުޅުނު މެޗުގެ ކުރިން މެސީ ވަނީ ޗެމްޕިއަންސް ލީގު އެޓީމަށް ހޯދައިދޭނެ ކަމަށް ވައުދުވެފައެވެ. އެހެން ނަމަވެސް އެވައުދު ފުއްދިފައިނުވާއިރު މިކަމާ ގުޅިގެން މެސީއަށް ގިނަ ފާޑުކިޔުންތަކެއް އަމާޒުވިއެވެ.

މިދިޔަ ސީޒަނުގެ ޗެމްޕިއަންސް ލީގުގެ ސެމީ ފައިނަލުގެ ފުރަތަމަ ލެގުގައި 3-0 އިން ލިވަޕޫލް އަތުން މޮޅުވި ނަމަވެެސް ދެވަނަ ލެގުގައި 4-0 އިން ބަލިވެ ލަދުވެތި ގޮތަކަށް ބާސާ މުބާރާތުން ކެޓިއެވެ. ހަމައެެހެންމެ ކޮޕާ ޑެލްރޭގެ ފައިނަލުން ވެސް އެޓީމު ބަލިވީއެވެ. ބާސާއަށް މިދިޔަ ސީޒަނުގައި ކާމިޔާބު ކުރެވުނީ ހަމައެކަނި ސްޕެނިޝް ލަލީގާ ކަމަށްވާއިރު މިއީ އެޓީމަށް ފަހުގެ ތާރީހެއްގައި އެންމެ ގިނަ ފާޑުކިޔުން އަމާޒުވި އެއް ސީޒަންއެވެ.

އެހެން ނަމަވެސް މިސީޒަން ހުޅުވުމަށް ކުޅުނު މެޗުގައި މެސީ ވަނީ އަނެއްކާ ވެސް ސަޕޯޓަރުންނަށް ވައުދުތަކެއްވެ އައު އުއްމީދުތަކެއް ގެނެސްދީފައެވެ.

ގާތްގަނޑަކަށް ދަނޑަށް ހާޒިރުވެތިބި ލައްކައެއްހާ ސަޕޯޓަރުންނާ ވާހަކަ ދައްކަމުން މެސީ ބުނީ މިދިޔަ ސީޒަނުގައި ކަންކަން ވެގެންދިޔަ ގޮތުން އެެއްޗެއް ބުނަން ވަރަށް އުނދަގޫވާ ކަމަށެވެ. އުމުރުން 32 އަހަރުގެ ކެޕްޓަން ބުނީ މިދިޔަ ސީޒަނުގައި ބުނެވުނު އެއްވެސް އެއްޗަކާއި ގުޅިގެން ދެރަނުވާ ކަމަށާއި އެކަމާ މެދު ފަރުވާލެއް ވެސް ނެތް ކަމަށެވެ. އަނެއްކާ ވެސް މި ސީޒަނުގައި ހުރިހާ މުބާރާތެއް ކާމިޔާބުކުރަން މަސައްކަތްކުރާނެ ކަމުގެ ފުރިހަމަ ޔަގީންކަން ދޭ ކަމަށާއި މި ސީޒަނާއި ކުރިމަތިލަނީ އަނެއްކާ ވެސް އައު ކާމިޔާބުތަކެއް ހޯދަން ކަމަށް މެސީ ބުނެފައިވެއެވެ.

ސްޕެއިންގެ ފުޓްބޯޅަ ބާސާއިން މިދިޔަ ދިހަ ސީޒަނުގައި ޑޮމިނޭޓްކޮށްފައިވީ ނަމަވެސް ޔޫރަޕުގައި އެޓީމަށް މާ ބޮޑު ކާމިޔާބެއް ލިބިފައިނުވުމާއެކު ގިނަ ފާޑުކިޔުންތަކެއް ވަނީ އަމާޒުވެފައެވެ. 2015 ވަނަ އަހަރުގެ ފަހުން ބާސާއަށް ޗެމްޕިއަންސް ލީގެއް ލިބިފައިނުވާއިރު އޭގެ ފަހުން ރެއާލް މެޑްރިޑްއިން ވަނީ ޖެހިޖެހިގެން ތިން ތަށި ކާމިޔާބުކޮށްފައެވެ. ބެލެވޭ ގޮތުގައި މިސީޒަނުގައި ވެސް ބާސާއިން ހޯދުމަށް އެންމެ ބޮޑަށް މަސައްކަތްކުރާނީ ޗެމްޕިއަންސް ލީގެވެ.