ޕްރައިވެޓް ހަޔަރއަށް ޓެކްސީ ކުރުމުގެ ހުއްދަ ދޫކުރަނީ
ޕްރައިވެޓް ހަޔަރއަށް ޓެކްސީ ކުރެވޭނީ އެޕްލިކޭޝަން ބޭނުންކޮށްގެން
މާލޭގެ ޓެކްސީތަކެއް: ޓެކްސީ ހިދުމަތުގެ އަގުބޮޑު ކަމުން އާންމުންގެ ޝަކުވާ ބޮޑު
ޕްރައިވެޓް ހަޔަރގެ ގޮތުގައި ޓެކްސީގެ ހިދުމަތް ދޭން ބޭނުންވާ ފަރާތްތަކަށް ޓެކްސީ ކުރުމުގެ ހުއްދަ ދިނުމަށް މޯލްޑިވްސް ޓްރާންސްޕޯޓް އޮތޯރިޓީން ނިންމަފިއެވެ.
ޓްރާންސްޕޯޓް އޮތޯރިޓީން އަންގާރަ ދުވަހު ކުރި އިއުލާނެއްގައި ބުނެފައިވަނީ، މިހިދުމަތް ދޭން ބޭނުންވާ ފަރާތްތަކަށް އެ އޮތޯރިޓީން ހުއްދަ ދީފައިވާ އެޕްލިކޭޝަނެއްގައި ބައިވެރިވެގެން އެހިދުމަތް ދިނުމުގެ ފުރުސަތު ހުޅުވާލާފައިވާ ކަމަށެވެ. އެގޮތުން އެއޮތޯރިޓިން ވަނީ ރަޖިސްޓްރީ ކުރުމަށް ހުށައަޅަންޖެހޭ ލިޔެކިޔުން ހުށައެޅުމުން ޓެކްސީ ކުރުމުގެ ހުއްދަ ދޫކުރާނެކަމަށް ބުނެފައެވެ.
އޭގެ އިތުރުން ޓްރާންސްޕޯޓް އޮތޯރިޓީން ވަނީ ޓެކްސީގެ ހިދުމަތް ދިނުމުގެ އަގުތައް ކަނޑައެޅި އިއުލާނުގައި ޓެކްސީގެ ހިދުމަތްދޭ ހުރިހާ ފަރާތްތަކަށް އެޕްލިކޭޝަން ބޭނުންކުރަން މަޖުބޫރުކޮށްފައިއޮތް އޮތުން ބާތިލްކޮށްފައެވެ. އެންމެ ފަހުން ކުރި އިއުލާނުގައިވާ ގޮތުން ނަމަ މިހާރު ޓެކްސީ އެޕްލިކޭޝަން ބޭނުންކުރުން މަޖުބޫރުކޮށްފައިވަނީ 1 އޮގަސްޓުގެ ފަހުން ރަޖިސްޓްރީކުރާ ޓެކްސީތައް އެކަންޏެވެ.
ޓްރާންސްޕޯޓް އޮތޯރިޓީން ކުރި އިތުރު އިއުލާނެއްގައި ވަނީ ޓެކްސީ ކުރާ ފަރާތްތަކުން، ރޭގަނޑު 12 އިން ފެށިގެން ހެނދުނު 6 އާއި ދެމެދު ކުރާ ދަތުރުތަކުން، ދަތުރަކަށް 5 ރުފިޔާ ނެގިދާނެކަމަށް ބުނެފައެވެ.
ޓްރާންސްޕޯޓް އޮތޯރިޓީން މިއިއުލާނުތައް ކޮށްފައި މިވަނީ އެއޮތޯރިޓީން އާންމުކޮށްފައިވާ އަގުތަކަށް ޓެކްސީގެ ހިދުމަތް ނުދޭނެ ކަމަށް، ޓެކްސީ ޑްރައިވަރުންނާއި ސެންޓަރުތައް ހިމެނޭ ޓެކްސީ ޑްރައިވަރސް އެސޯސިއޭޝަނުން ބުނެފައިވާ ދަނޑިވަޅެއްގައެވެ. މިއަގުތަކާއި ދެކޮޅަށް ޑްރައިވަރސް އެސޯސިއޭޝަންއިން ވަނީ ސިވިލް ކޯޓަށް މައްސަލައެއް ވެސް ހުށައަޅާފައެވެ.
އެއްވެސް ފަރާތަކުން މިކަމުގައި ދޫނުދޭނެ ކަމަށް ބުނެފައިވާ އިރު، ފުލުހުން ވެސް ވަނީ ކަނޑައެޅިފައިވާ އަގުތަކުގައި އެހިދުމަތް ފޯރުކޮށްދޭތޯއާއި ޓެކްސީތަކުގެ ފެންވަރު ބެލުމަށް ހާއްސަ އޮޕަރޭޝަނެއް ފަށާފަައެވެ.
