މަސްވެރިކަމާއި ގުޅޭ ތިން ގަރާރެއް ފާސްކޮށްފި
މަސްވެރިކަމާއި ގުޅޭ ފަސް ގަރާރެއް މަޖިލީހަށް ހުށަހެޅުނު
މަޖިލިސް ޗެމްބަރުގައި މެމްބަރުން
މަސްވެރިކަމާއި ގުޅޭ ތިން ގަރާރެއް ފާސްކޮށްފިއެވެ. މި ތިން ގަރާރު ދިރާސާކޮށްފައިވަނީ އިގްތިސާދީ ކޮމިޓީންނެވެ.
މަޖިލީހުން ފާސްކޮށްފައިވާ ތިން ގަރާރަކީ ބޭރުގެ ބޯޓުފަހަރު ރާއްޖެއައިސް ދިވެހި މަސްވެރިންގެ އަތުން މަސްގަތުމަށް ހުއްދަދިނުމާ ގުޅޭގޮތުން ހުށަހަޅުއްވާފައިވާ ޤަރާރާއި، ރަށު ކައުންސިލް އަދި އަމިއްލަ ފަރާތްތަކާއި ގުޅިގެން ރަށްރަށުގައި ގޭދޮށު މަސް ފެކްޓަރީ ޤާއިމްކުރުމާއި ގުޅޭގޮތުން ހުށަހަޅުއްވާފައިވާ ގަރާރުގެ އިތުރުން ދިވެހިން މަސްވެރިކަންކުރާ ސަރަޙައްދުތަކެއް ފާހަގަކޮށް އޮފްޝޯ ޕްލެޓްފޯމް ޤާއިމުކުރުމާއި ގުޅޭ ގަރާރެެވެ.
ދުވާފަރު ދާއިރާގެ މެންބަރު އިސްމާޢީލް އަޙްމަދު ހުށަހަޅުއްވާފައިވާ، ބޭރުގެ ބޯޓުފަހަރު ރާއްޖެއައިސް ދިވެހި މަސްވެރިންގެ އަތުން މަސްގަތުމަށް ހުއްދަ ދިނުމާ ގުޅޭގޮތުން ހުށަހަޅުއްވާފައިވާ ޤަރާރު ފާސްކުރަން 66 މެމްބަރުން ވަނީ ތާއީދްކުރައްވާފައެވެ. އަދި ތޮއްޑޫ ދާއިރާގެ މެންބަރު ޙަސަން ޝިޔާން ހުށަހަޅުއްވާފައިވާ، ރަށު ކައުންސިލް އަދި އަމިއްލަ ފަރާތްތަކާއި ގުޅިގެން ރަށްރަށުގައި ގޭދޮށު މަސް ފެކްޓަރީ ޤާއިމްކުރުމާއި ގުޅޭގޮތުން ހުށަހަޅުއްވާފައިވާ ގަރާރު ފާސްކުރަން 72 މެމްބަރުން ވަނީ ތާއީދްކުރައްވާފައެވެ.
އޭގެއިތުރުން މާފަންނު މެދު ދާއިރާގެ މެންބަރު އިބްރާހިމް ރަޝީދު ހުށަހަޅުއްވާފައިވާ، ދިވެހިން މަސްވެރިކަންކުރާ ސަރަޙައްދުތަކެއް ފާހަގަކޮށް އޮފްޝޯ ޕްލެޓްފޯމް ޤާއިމުކުރުމާއި ގުޅޭ ޤަރާރަށް 72 މެމްބަރުން ވަނީ ތާއީދްކުރައްވާފައެވެ.
މި ގަރާރުތަކަކީ ސަރުކާރުން ހުށަހަޅާފައިވާ މަސްވެރިކަމާއި ބެހޭ ބިލް ފާސްކުރެވޭއިރު، ދާއިރާ އާއި ގުޅުން ހުރި މުހިއްމު ކަންްތައްތައް ބިލްގައި ހިމެނުމުގެ ގޮތުން ހުށަހެޅިގެން ބަހުސްކުރެވުނު ގަރާރުތަކެކެވެ.
