ޔުވެންޓަސް ދޫކޮށް އިޓަލީގެ ފޯވާޑް މޮއިސް ކީން އެވަޓަންއަށް ސޮއިކޮށްފިއެވެ.

އުމުރުން 19 އަހަރުގެ ކީން އެވަޓަންއަށް ބަދަލުވީ 30 މިލިއަން ޕައުންޑުގެ އަގަކަށް ފަސް އަހަރަށެވެ.

އެވަޓަންއަށް ބަދަލުވުމަށް ފަހު ކީން ބުނީ، އެވަޓަންގެ ޖޯޒީ ލާން ފުރުސަތު ލިބުމަކީ އޭނާއަށް ލިބުނު ޝަރަފެއް ކަމަށާއި، ކްލަބަށް ކާމިޔާބު ހޯދައިދޭން މަސައްކަތް ކޮށްދޭނެ ކަމަށެވެ.

އެވަޓަންގެ ކޯޗު މާކޯ ސިލްވާ ބުނީ، ކީން އަކީ މި ސީޒަނުގައި ކްލަބުން އެންމެ ބޮޑަށް ގެންނަން މަސައްކަތް ކުރި ކުޅުންތެރިޔާ ކަމަށާއި، އެއީ ވަރަށް ހުނަރުވެރި އަދި ވަރަށް ރަނގަޅު ކޮލެޓީތަކެއް ހުރި ކުޅުންތެރިޔެއް ކަމަށެވެ.

އެގޮތުން މާކޯ ސިލްވާ ބުނީ، ކީންއާއެކު އެވަޓަންގެ ސްކޮޑު އިތުރަށް ވަރުގަދަވާނެ ކަމަށާއި، ޒުވާން ކުޅުންތެރިޔާއާއެކު މަސައްކަތް ކުރުމަށް ކެތްމަދުވެފައި ހުރި ކަމަށެވެ.

ޔުވެންޓަސްއިން 2016 ވަނަ އަހަރުގެ ސީޒަނުގައި ސީނިއަރ ކެރިޔަރު ފެށި ކީން ވަނީ އެ ކްލަބަށް ކުޅުނު 21 މެޗުގައި 8 ލަނޑު ކާމިޔާބު ކޮށްފައެވެ. އަދި އޭނާ ވަނީ އެ ކްލަބުގައި ހުރެ، ވެރޯނާއަށް ލޯން އެއްބަސްވުމެއްގެ ދަށުން ބަދަލުވެ ކުޅުނު 41 މެޗުގައި 12 ލަނޑު ކާމިޔާބު ކޮށްފައެވެ.

ކީން ވަނީ ޔުވެންޓަސްއާއެކު ދެ ލީގު ތަށި ހޯދުމުގެ އިތުރުން ކޮޕާ ޓަލިއާ އަދި އިޓާލިއަން ސުޕަކަޕް ވެސް ކާމިޔާބު ކޮށްފައެވެ. އޭނާއަކީ އިޓާލިއަން ލީގުގައި ލަނޑު ޖެހި އެންމެ ޒުވާން ކުޅުންތެރިޔާއެވެ. އޭނާ ލަނޑު ޖެހި އުމުރުން 17 އަހަރާއި 88 ދުވަހުގައެވެ.

އިޓަލީގެ ސީނިއަރ ޓީމަށް ކުޅުނު ތިން މެޗުގައި ދެ ލަނޑު ކާމިޔާބު ކޮށްފައިވާ ކީން ވަނީ އިޓަލީގެ އެކި އުމުރުފުރާގެ ގައުމީ ޓީމުތަކަށް ވެސް ކުޅެފައެވެ. އަދި އޭނާ ވަނީ އިޓަލީގެ 19 އަހަރުން ދަށުގެ ޓީމާއެކު ޔޫރޯގެ ދެވަނަ ހޯދާފައެވެ.