ޕީއެސްޖީއަށް ކުޅެމުން އަންނަ ބްރެޒިލްގެ ފޯވާޑް ނޭމާ އާއެކު ވާހަކަތައް ފެށުމަށް ސްޕެއިންގެ ބާސެލޯނާއިން ތައްޔާރުވެއްޖެއެވެ.

ދެހާސް ސަތާރަ ވަނަ އަހަރު ބާސާ ދޫކޮށް ޕީއެސްޖީއަށް ބަދަލުވި ނޭމާ ވިއްކާލަން ޕީއެސްޖީއިން ކަނޑައަޅާފައިވަނީ 222 މިލިއަން ޔޫރޯގެ އަގަކަށެވެ. އެޓީމުން އެ އަގު ބަދަލުކުރަން ބޭނުންނުވާ ކަމަށް ރިޕޯޓްތައް ބުނެއެވެ. މި އަގަށް ބަދަލުތަކެއް ކުރިޔަށް އޮތް ދުވަސްތަކުގައި އައުން އެކަށީގެންވާއިރު އުމުރުން 27 އަހަރުގެ ނޭމާ ބޭނުންވަނީ އަންނަ ސީޒަނުގައި ބާސާއަށް ކުޅެން ކަމަށް ގިނަ މަސްދަރުތަކުން ބުނެއެވެ.

ނޭމާގެ މުސްތަގުބަލާ މެދު ގިނަ ސުވާލުތަކެއް އުފެދިފައިވާއިރު ބާސާގެ ރައީސް ވަނީ އޭނާ ޕީއެސްޖީ ދޫކޮށްލަން ބޭނުންވާކަން މީޑިއާގައި ހާމަކޮށްފައެވެ. ޕީއެސްޖީގެ ޕްރީ ސީޒަން އެއްވެސް މެޗެއްގައި އޭނާ ކުޅެފައިނުވާއިރު ފްރެންޗް ސުޕަރ ކަޕް ޕީއެސްޖީއިން ކުޅުނު މެޗުގައި ވެސް އޭނާއަށް ޓީމުން ޖާގަ ދީފައިނުވެއެވެ. އެހެން ނަމަވެސް އޭނާ އަންނަނީ ޗުއްޓީ ނިންމާލުމަށް ފަހު އެޓީމުގެ ފަރިތަކުރުންތަކުގައި ބައިވެރިވަމުންނެވެ.

ބާސާއާ ޕީއެސްޖިއާ ދެމެދު އޮތް ގުޅުން ނޭމާގެ ޓްރާންސްފާއާއެކު ގޯސްވިއިރު މިއީ އޭނާ ހޯދުމަށް މިހާރު ބާސާއިން ކުރަމުން އަންނަ މަސައްކަތަށް އެޅިފައިވާ އެންމެ ބޮޑު ހުރަސްވެސްމެއެވެ.

ބާސާއިން ނޭމާގެ ސޮއި ހޯދުމަށް ކުރަމުން އަންނަ މަސައްކަތުގެ ތެރެއިން އެޓީމުން ވަނީ ބްރެޒިލްގެ ފޯވާޑް މެލްކޮމް ވެސް ވިއްކާލާފައެވެ. އެހެން ނަމަވެސް ޕީއެސްޖީއިން ބޭނުންވާ އަގު ދެއްކުމަށް ބާސާއިން އަދިވެސް ފަންޑްރައިސް ކުރަން ޖެހެއެވެ. ބެލެވޭ ގޮތުގައި ކުރިޔަށް އޮތް ދުވަސްތަކުގައި އިވާން ރަކިޓިޗް އަދި ފިލިޕޭ ކުޓީނިއޯ ވިއްކާލުމަށް ވެސް ބާސާއިން މަސައްކަތްކުރާނެއެވެ.

ބްރެޒިލްގެ ސަންޓޯސްގައި ކާމިޔާބު ދުވަސްތަކެއް ހޭދަކުރުމަށް ފަހު ނޭމާ ބާސާއަށް ބަދަލުވީ 2013 ވަނަ އަހަރެވެ. އެގޮތުން އޭނާ ވަނީ އެޓީމަށް ކުޅުނު 186 މެޗުގައި 105 ލަނޑު ކާމިޔާބުކޮށް އެޓީމާއެކު ސްޕެނިޝް ލީގު ދެފަހަރު، ކޮޕާ ޑެލްރޭ ދެފަހަރު، ސްޕެނިޝް ސުޕަރކަޕް ޔުއެފާ ޗެމްޕިއަންސް ލީގު އަދި ފީފާ ކްލަބް ވޯލްޑް ކަޕް ވެސް ކާމިޔާބު ކޮށްފައެވެ.

ނޭމާ އަންނަނީ ޕީއެސްޖީއަށް ބަދަލުވެ، އެ ކްލަބުގައި މޮޅު ކުޅުމެއް ދައްކަމުންނެވެ. އެގޮތުން އޭނާ ވަނީ އެ ކްލަބަށް މިހާތަނަށް ކުޅުނު 58 މެޗުގައި 51 ލަނޑު ކާމިޔާބު ކޮށްފައެވެ.

ބްރެޒިލް ގައުމީ ޓީމާއެކު އޮލިމްޕިކްސް ރަން މެޑަލް މިދިޔަ އަހަރު ކާމިޔާބުކުރި ނޭމާ ވަނީ ގައުމީ ޓީމަށް ކުޅުނު 97 މެޗުގައި 60 ލަނޑު ކާމިޔާބު ކޮށްފައެވެ. މީގެ އިތުރުން އޭނާ ވަނީ ފީފާ ކޮންފެޑެރޭޝަންސް ކަޕް 2013 ވަނަ އަހަރު ކާމިޔާބު ކޮށްފައެވެ.