13 އަހަރު ދުވަސް ވަންދެން ބޮލީވުޑްއާ ދުރުގައި އުޅުމަށްފަހު ފިލްމަކުން ވަރަށް އަވަހަށް ފެނިގެންދާނެ ކަމަށް ޝިލްޕާ ޝެޓީ ވަނީ މީގެ ދުވަސްކޮޅެއް ކުރިން ބުނެފައެެވެ.

ގިނަ އަހަރު ދުވަސްތަކެއްގެ މެދުކެނޑުމަށްފަހު ފިލްމެއް ކުޅުމަށް ފުރުސަތު ލިބުމުން ޝިލްޕާ ވަނީ އޭނާގެ އުދާސްތައް ޝޯޝަލް މީޑިއާގައި ބަންޑުން ކޮށްލާފައެެވެ. ޝިލްޕާގެ އިންސްޓަގްރާމްގައި ލިޔެފައިވާ ޕޯސްޓުގައި ބުނެފައިވަނީ އޭނާ ފެނިގެން ދާނީ ''ނިކައްމާ'' ކިޔާ ފިލްމަކުން ކަމަށެވެ.

އެ ފިލްމު ޑައިރެކްޓް ކުރުމަށް ހަމަޖެހިފައިވަނީ ހީރޯ ޕަންތީ، މުންނާ މައިކަލް، ފަދަ ފިލްމުތައްވެސް ޑައިރެކްޓް ކޮށްފައިވާ ސައްބީރް ޙާން އެވެ.

އެ ފިލްމުގައި ޝިލްޕާގެ އިތުރުން އިންޑިއާގެ ޝޯޝަލް މީޑިއާގެ ދެ އެކްޓަރުން ކަމަށްވާ އަބިމަނިއު ދައްސާނީ އާއި ޝިރްލޭ ސެތިޔާ ފެނިގެން ދާނެ އެެވެ. ފިލްމު ނެރެން ހަމަޖެހިފައިވަނީ އަންނަ އަހަރުގެ ހޫނު މޫސުމުގައެވެ.

ޝިލްޕާ ދާދިފަހުން ވަނީ ޑާންސް ރިއަލިޓީ ޝޯ "ސުޕަރ ޑާންސް ޗެޕްޓަރ 3" ގެ ފަނޑިޔާރުކަން ކޮށްފައެވެ.

ޝިލްޕާ އެންމެ ފަހުން ފެނިގެން ގޮސްފައިވަނީ 2007 ވަނަ އަހަރު ރިލީޒް ކުރި ފިލްމް " އަޕްނޭ" އިންނެވެ. މި ފިލްމުގައި ޝިލްޕާ އާއި އެކު ލީޑް ރޯލުން ފެނިގެން ގޮސްފައިވަނީ ދަރްމެންދްރާ، ސަނީ ޑިއޯލް، ބޮބީ ޑިއޯލް އަދި ކެޓްރީނާ ކެއިފް އެވެ.