ޕެލެޓުތައް ނެގުމުގެ މަސައްކަތް ހުއްޓައެއްނުލާ: ޕްލޭނިން މިނިސްޓްރީ
3 އޯގަސްޓު 2019 | ހޮނިހިރު 08:17މަސައްކަތް ކުރިއަށް ގެންދަނީ ހުރިހާ ފަރާތްތަކުގެ ޝަކުވާ އަޑުއެހުމަށްފަހު އުސޫލުގެ ތެރެއިން
ޕެލެޓުތައް ނެގުމުގެ މަސައްކަތް ކުރަނީ
އާންމުންނަށް އުނދަގޫވާ ގޮތަށް ޕޭވްމަންޓާއި ޕާކިން ޒޯންތަކުގައި ބަހައްޓާފައި ހުންނަ ޕެލެޓުތައް ނެގުމުގެ މަސައްކަތް ހުއްޓާނުލާ ކުރިއަށް ގެންދާ ކަމަށް ޕްލޭނިން މިނިސްޓްރީން ބުނެފިއެވެ.
ޕްލޭނިން މިނިސްޓަރު މުހައްމަދު އަސްލަމް ވިދާޅުވީ މާލެ ސިޓީ ކައުންސިލްއާ ގުޅިގެން މާލެ ސިޓީއަކީ އާންމުންނަށް ރައްކާތެރިތަނަކަށް ހެދުމަށް މަސައްކަތް ކުރަމުން އަންނަ ކަމަށާއި، އެމަސައްކަތް ހުއްޓާނުލާ ކަމަށެވެ. އަދި އަބަދު ވެސް މަގުތައް މޮނިޓަރ ކުރަމުންދާނެ ކަމަށް މިނިސްޓަރު ވިދާޅުވިއެވެ.
އެގޮތުން ނުރައްކާތެރި ގޮތަކަށް ނުވަތަ އާންމުންނަށް އުދަނގޫވާ ގޮތަކަށް މަގުމަތީގައި އެއްޗެހި ބެހެއްޓުމުން އެކަން ކައުންސިލަށް ރިޕޯޓުކުރުމުން ވެސް އެނެގުމުގެ މަސައްކަތް ކުރާނެ ކަމަށް މިނިސްޓަރު އަސްލަމް ވިދާޅުވިއެވެ.
މީގެ އިތުރުން މިނިސްޓަރު އަސްލަމް ވިދާޅުވީ މިމަސައްކަތް ކުރުމުގައި ދަތިތައް ކުރިމަތިވާ ކަމަށާއި، ޕެލެޓުތައް ނަގާތީ ވެސް ބައެއް ފަރާތްތަކުން ޝަކުވާ ކުރަމުން ގެންދާ ކަމަށެވެ.
މިނިސްޓަރު ވިދާޅުވީ މަސައްކަތް ކުރިއަށް ގެންދަނީ ހުރިހާ ފަރާތްތަކުގެ ޝަކުވާ އަޑުއެހުމަށްފަހު އުސޫލުގެ ތެރެއިން ކަމަށެވެ.
މާލޭގެ މަގުތަކުގައި އާންމުންނަށް އުނދަގޫވާ ގޮތަށް ބަހައްޓާފައި ހުންނަ ޕެލެޓުތައް ނެގުމުގެ މަސައްކަތް ސިޓީ ކައުންސިލުން ފަށާފައި ވަނީ ޕެލެޓެއްގައި ތާށިވެ އަންހެނެއްގެ ފައި ބިނދައިގެން ދިޔަ ހާދިސާއާ ގުޅިގެންނެވެ.
މާލޭގެ މަގުތަކުގައި ދަގަނޑު ޕެލެޓުތަކާއި ލަކުޑި ޕެލެޓުތައް މަގުތަކުގައި ބެހެއްޓުމަކީ މަނާ ކަމެއް ނަމަވެސް އެމައްސަލައަށް އަދިވެސް ދާއިމީ ހައްލެއް ނުލިބެއެވެ. ޕެލެޓުތައް ޕާކިން ޒޯންތަކުގައި ބަހައްޓާފައި ހުރުމުން، ޕާކު ކުރާނެ ޖާގަ ގެއްލި، އާންމުންނަށް ދަނީ ދަތިތަކާ ކުރިމަތިވަމުންނެވެ.
