ޔާމީންގެ ޝަރީއަތަށް އަދީބު ގެނެވޭނެތޯ އެހުމުން ފުލުހުން ޖަވާބެއް ނުދިން!
2 އޯގަސްޓު 2019 | ހުކުރު 14:39އިތުރު މައުލޫމާތު ހާމަ ކުރަން ފުހުންނަށް ފެނިއްޖެ ނަމަ ފުލުހުން އިސްވެ އެ މައުލޫމާތު ހާމަ ކުރަމުން ގެންދާނެކަމަށް ބުނި
ކުރީގެ ރައީސް އަބްދުﷲ ޔާމީން (ކ) އަދި އެމަނިކުފާނުގެ ދެވަނަ ނައިބު ރައީސް އަހުމަދު އަދީބު (ވ)
އަންނަ އާދީއްތަ ދުވަހު އޮންނަ ކުރީގެ ރައީސް އަބްދުﷲ ޔާމީންގެ ޝަރީއަތުގައި އެމަނިކުފާނުގެ ދިފާއީ ހެކީންނާއި، ދައުލަތުން އެމަނިކުފާނާއި ދެކޮޅަށް ހުށައެޅި ހެކިންގެ ހެކިބަސް ނަގަން ހަމަޖެހިފައިވާއިރު އެ ޝަރީއަތަށް ކުރީގެ ނައިބު ރައީސް އަހުމަދު އަދީބު ރާއްޖެ ގެންނާނެތޯ ސުވާލުކުރުމުން އެ ސުވާލަށް ޖަވާބު ދިނުމަށް ފުލުހުން ދެކޮޅު ހަދައިފި އެވެ.
ފުލުހުންގެ މީޑިއާ އޮފިޝަލް ވިދާޅުވީ އަދީބު ފިލައިގެން ގޮސްފައިވާ މައްސަލައާ ގުޅޭގޮތުން އެ އިދާރާއިން މިވަގުތަށް ހާމަކުރާ މައުލޫމާތު ބަޔާނެއްގެ ގޮތުގައި ހާމަ ކޮށްފައިވާކަމަށާއި އިތުރު މައުލޫމާތު ހާމަ ކުރަން ފުހުންނަށް ފެނިއްޖެ ނަމަ ފުލުހުން އިސްވެ އެ މައުލޫމާތު ހާމަ ކުރަމުން ގެންދާނެކަމަށެވެ. އަދި އަދީބުގެ މައްސަލާގައި އިތުރު އެއްވެސް ކޮމެންޓެއް ދިނުމަށް ފުލުހުން ވަނީ ދެކޮޅު ހަދާފަ އެވެ.
ޔާމީނާއި ދެކޮޅަށް ދައުލަތުން ޝަފައީ އަށް ހެކި ހުށައަޅާފައިވާއިރު އަދީބަކީ އޭގެއިން އެއް ހެއްކަކަށް ދައުލަތުން ހުށައަޅާފައިވާ ފަރާތެކެވެ. ޔާމީންގެ ޝަރީއަތް އާދީއްތަ ދުވަހުގެ ހެނދުނު 10:30 ގައި ބާއްވާއިރު ދައުލަތުން ރައީސް ޔާމީނާއި ދެކޮޅަށް ހުށައެޅި ހެކިތަކާއި ރައީސް ޔާމީންގެ ދިފާއީ ހެކިންގެ ހެކިބަސް ނެގުމަށް ވަނީ ނިންމާފައެވެ. ހެކިންގެ ބަޔާން ނެގުމަށް އެކޯޓަށް ހާޒިރުވުމަށް ވެސް ވަނީ އަންގާފައެވެ.
ނަމަވެސް އަދީބު ކޯޓަށް ހާޒިރު ވުމަށް ޗިޓު ހަވާލު ކުރެވުނު ކަމެއް ސާފެއް ނުވެއެވެ. އެކަމާއި ގުޅިގެން ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)ގެ މީޑިއާ އޮފިސަރ ފައިސަލް އާދަމް ވިދާޅުވީ ޝަރީއަތަށް ހާޒިރު ކުރާ ހެކިންނަކީ މީޑިއާއަށް ހާމަ ކުރާނެ މައުލޫމާތެއް ނޫން ކަމަށެވެ.
ޓަގު ބޯޓެއްގައި ފިިލައިގެން އިންޑިއާއަށް އެތެރެވާން އުޅެނިކޮށް އިންޑިއާއިން ހައްޔަރު ކޮށްފައިވާކަން ފުލުހުން ހާމަކޮށްފައިވަނީ ބުރާސްފަތި ދުވަހުއެވެ. އަދީބު އިންޑިއާށް ވަޑައިގެންނެވި އިރު އޭނާގެ ޕާސްޕޯޓް ވަނީ ހިފަހައްޓާފައެވެ.
އަދީބަކީ ރައީސް ޔާމީނާއި ދެކޮޅަށް ދައުލަތުން ހުށައަޅާ ހެއްކަކަށްވާއިރު ފުލުހުން ތަހުގީގު ކުރަމުންދާ މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ގެ މައްސަލައާއި ބޭރު ފައިސާ ގަނެދިނުމުގެ ނަމުގައި ދައުލަތުގެ ކުންފުނިތަކުން އެމްއެމްޕީއާރުސީއަށް ފައިސާ ނެގުމަށް ފަހު އެފައިސާއަށް ޚިޔާނާތްތެރިވެ އެފައިސާ ލޯންޑަރކޮށްފައިވާ ކަމަށް ތުހުމަތު ކުރެވޭ މައްސަލައިގެ ތަހުގީގު އެ އިދާރާއިން ދަނީ ކުރަމުންނެވެ.
އެކަމާއި ގުޅިގެން ފުލުހުން ނެރެފައިވާ ބަޔާނެއްގައި ބުނެފައިވަނީ ޝަރީއަތަށް ހުށައެޅިފައިވާ މައްސަލަތަކާއި ގުޅިގެން އަދީބުގެ ޕާސްޕޯޓް ހިފަހައްޓާފައިވަނިކޮށް ކަނޑުމަގުން ފިލައިގެން ރާއްޖެއިން ބޭރަށް ދިޔަ މަގުމަތީގައި ހިފަހައްޓާފައިވާ ކަމަށެވެ. އަދީބު ފިލުވުމުގައި އެހީތެރިވި ފަރާތްތަކުގެ މައްސަލަ ތަހުގީގުކޮށް އެފަރާތްތަކާއިމެދު ގާނޫނީ ގޮތުން ފިޔަވަޅު އަޅާނެ ކަމަށް ވެސް ފުލުހުންގެ ބަޔާނުގައި ބުނެފައި ވެއެވެ.
