އެންމެ ފަހުގެ ޓެކްނޮލޮޖީތަކާއި އުފެއްދުންތެރި ޙިދުމަތްތަކުގެ އެހީގައި ކަސްޓަމަރުންގެ ޑިޖިޓަލް ދިރިއުޅުން އިތުރަށް ކުރިއެރުވުމުގެ މަސައްކަތް ކުރާނެ ކަމަށް އުރީދޫ މޯލްޑިވްސް އިން ބުނެފިއެވެ.

އުރީދޫ މޯލްޑިވްސްގެ 14 ވަނަ އަހަރީ ދުވަސް ފާހަގަ ކުރަމުންދާއިރު، އުރީދޫއިން ވަނީ އަހަރީ ދުވަހުގެ ތަހުނިޔާ އެކުންފުނީގެ އެންމެހާ ހިއްސާދާރުންނާއި ކަސްޓަމަރުންނާއި މުވައްޒަފުންގެ އިތުރުން ހެޔޮއެދޭ އެންމެހާ ފަރާތްތަކަށް ފޮނުވާފައެވެ.

މި ދުވަހާ ގުޅިގެން އުރީދޫގެ ސީއީއޯ ނަޖީބް ޚާން ދެއްވި ޚާއްސަ ހިތާބެއްގައި ވަނީ ޑިޖިޓަލް ދިވެހިރާއްޖެއެއް ޤާއިމްކޮށް، ދިވެހިންގެ ދިރިއުޅުމަށް އިތުރު ފާގަތިކަމާއި ކުރިއެރުން ފޯރުކޮށްދިނުމަށް އެކުންފުނިން ކުރަމުންދާ މަސައްކަތްތަކަށް އަލިއަޅުވާލައި، މުސްތަގްބަލުގައި ވެސް އެގޮތުގައި ކުރިއަށް ދެވޭނެ ކަމުގެ ޔަގީންކަން އަރުވާފައެވެ.

އެގޮތުން ނަޖީބު ވަނީ ފާއިތުވި 14 އަހަރުގެ ތެރޭގައި އުރީދޫ މެދުވެރިކޮށް ޓެލެކޮމިއުނިކޭޝަންގެ ދާއިރާއަށް ގެނެވިފައިވާ ކުރިއެރުންތަކަށް ވެސް އަލިއަޅުވާލާފައެވެ.

މުވާސަލާތީ ޚިދުމަތްދޭ ބައިނަލްއަޤްވާމީ ކުންފުންޏެއްގެ ހައިސިއްޔަތުން އުރީދޫ މޯލްޑިވްސް ވުޖޫދަށް އައސްފައިވަނީ 2005 ވަނަ އަހަރުގެ އޮގަސްޓު މަހުގެ 1 ވަނަ ދުވަހުއެވެ. އެގޮތުން ވަތަނިއްޔާ ޓެލެކޮމް މޯލްޑިވްސް ޕްރައިވެޓް ލިމިޓެޑްގެ ނަމުގައި ވުޖޫދުވުމަށް ފަހު 6 އޮކްޓޯބަރ 2016 ވަނަ ދުވަހު އުރީދޫ މޯލްޑިވްސްގެ ޤާނޫނީ ހައިސިއްޔަތު ޕަބްލިކް ކުންފުންޏަކަށް ވަނީ ބަދަލު ކުރެވިފައެވެ. އަދި އެއަށް ފަހު އުރީދޫ މޯލްޑިވްސް ޕަބްލިކް ލިމިޓެޑް ކޮމްޕެނީގެ ނަމުގައި ކުންފުނި ވަނީ އަލުން ރަޖިސްޓަރީ ކޮށްފައެވެ.