އުރީދޫ މޯލްޑިވްސްގެ ޑިޖިޓަލް ކަސްޓަމަރ އެކްސްޕީރިއަންސް ސޮލިއުޝަންތައް ދައްކާލައިފި

ސްޕެއިންގެ ބާސެލޯނާގައި ބޭއްވުނު މޮބައިލް ވާރލްޑް ކޮންގްރެސްގައި އުރީދޫ މޯލްޑިވްސްގެ ޑިޖިޓަލް ކަސްޓަމަރ އެކްސްޕީރިއަންސް ސޮލިއުޝަންތައް ދައްކާލައިފިއެވެ.

"ޑިޖިޓަލް ޚިދުމަތްތަކާއި އެކު އާންމު ދިރިއުޅުމަށް އިތުރު ފުރިހަމަކަމެއް" ޝިއާރުގެ ދަށުން އުރީދޫ ގްރޫޕުން ވަނީ އަރަމުން އަންނަ އީޖާދީ ޓެކްނޮލޮޖީތަކާއި، އެންމެ ފަހުގެ ކުރިއަރާފައިވާ ޓެކްނޮލޮޖީތައް ދައްކާލާފައެވެ.

Advertisement

"ޢާންމު ދިރިއުޅުމާއި ވިޔަފާރީގެ ކަންކަމުގައި، ޑިޖިޓަލް ޚިދުމަތްތަށް މެދުވެރިކޮށް ދިރިއުޅުމަށް އިތުރު ފުރިހަމަކަމެއް ގެނެސްދިނުމުގައި، އުރީދޫއަކީ ބައިނަލްއަގްވާމީ މައިދާނުގައި ވެސް އެންމެ ކުރީ ސަފުގައި ގުނާލެވޭ ކުންފުންޏެއްކަން ސާބިތުކޮށްދިނުމަށް ވަރަށް ރަނގަޅު ފުރުސަތެއް މޮބައިލް ވަރލްޑް ކޮންގްރެސް އިން ފޯރުކޮށްދޭ" އުރީދޫ ގްރޫޕްގެ ޗީފް އެކްޒެކްޓިވް އޮފިސަރ، ޝައިޚް ސައުދު ބިން ނާސިރު އަލް ޘާނީ ވިދާޅުވިއެވެ.

އުރީދޫ އިން ތައާރަފުކޮށްފައިވާ މަގްބޫލް ޑިޖިޓަލް ޚިދުމަތްތައް ކަމުގައިވާ އުރީދޫ ނެކްސްޓް އާއި މަގޭ ޕްލޭން އަށް ކުރިޔަށް އޮތްތާނގައި ގެނެވޭނެ އާ ޚިދުމަތްތައް ވެސް، މޮބައިލް ވާރލްޑް ކޮންގްރެސްގައި ވަނީ ދައްކާލާފައެވެ. މި އަޕްޑޭޓްތައް މި މަހުގެ ތެރޭގައި އުރީދޫ މޯލްޑިވްސްގެ ކަސްޓަމަރުންނަށް ލިބިގެންދާނެއެވެ.

"އުރީދޫގެ ކަސްޓަމަރުންނާއި ކުރަން ޖެހޭ ކޮންމެ މުއާމަލާތެއް ވެސް ޑިޖިޓަލް ޓެކްނޮލޮޖީ މެދުވެރިކޮށް، އޮންލައިންކޮށް ކުރުމުގެ ފުރުސަތު ފުޅާކުރުމަށް އުރީދޫ އިން ގިނަ މަސައްކަތްތަކެއް ކުރަމުންދޭ. ރާއްޖޭގެ ރައްޔިތުންނަކީ ތަފާތު އެކި ރަށްރަށުގައި ދިރިއުޅޭ ބަޔަކަށް ވީ ހިނދު، ޑިޖިޓަލް ޕްލެޓްފޯމްތައް މެދުވެރިކޮށް ކޮންމެ ހިސާބެއްގައި ހުރެގެންވެސް އެންމެ އަވަސް ޚިދުމަތް ލިބުމަކީ ވަރަށް މުހިއްމު ކަމެއް. މިގޮތުން، ދުނިޔޭގެ ޓެކްނޮލޮޖީ ދާއިރާގެ އެންމެ މަގްބޫލު އަދި ކުޅަދާނަ ކުންފުނިތައް ބައިވެރިވާ މޮބައިލް ވާރލްޑް ކޮންގްރެސް ފަދަ އެއްވުމެއްގައި، ޑިޖިޓަލް ކަސްޓަމަރ އެކްސްޕީރިއަންސްގެ ދާއިރާ އިން އުރީދޫ ހޯދާފައިވާ ކުރިއެރުންތައް ހިއްސާކޮށް، އުރީދޫ ނެކްސްޓް އަދި މަގޭ ޕްލޭން ފަދަ ޕްލެޓްފޯމްތަކުގައި ދެން ތައާރަފްކުރެވޭނެ ޚިދުމަތްތައް ދައްކުވާދެވުމަކީ، އަޅުގަނޑުމެންނަށް ލިބުނު ޝަރަފެއް،" އުރީދޫގެ ސީއީއޯ، ނަޖީބް ޚާން ވިދާޅުވިއެވެ.

އުރީދޫ ނެކްސްޓްއަކީ، އާޓިފިޝަލް އިންޓެލިޖެންސް އަދި މެޝިން ލަރނިންގްގެ އެހީގައި މަސައްކަތް ކުރާ އޭ.ޕީ.އައި ޕްލެޓްފޯމް އެކެވެ. ސިލިކަން ވެލީގެ ޓެކް ކުންފުންޏެއް ކަމަށްވާ ފާސްޓް ފޯވާޑްއާ ގުޅިގެން ތައާރަފުކޮށްފައިވާ މި ޕްލެޓްފޯމް މެދުވެރިކޮށް، ކަސްޓަމަރުން ގިނަ ވަގުތުތަކެއް ހޭދަކުރާ ސޯޝަލް މީޑިއާ ޗެނަލްތަކުގައި އުރީދޫއާ ބެހޭ މައުލޫމާތު ހޯދައި، އުރީދޫގެ ޚިދުމަތްތައް ހިޔާރުކުރެވެއެވެ. އުރީދޫ މޯލްޑިވްސް ކަސްޓަމަރުން މިހާރު އުރީދޫ ނެކްސްޓް މެދުވެރިކޮށް ޚިދުމަތް ހޯދަނީ ފޭސްބުކް އިން ކަމަށްވާއިރު، މޮބައިލް ވަރލްޑް ކޮންގްރެސްގައި ތައާރަފުކޮށްފައިވާ އުރީދޫ ނެކްސްޓްގެ އާ ވަރޝަން ވައިބަރގައި ވެސް ބޭނުންކުރެވޭނެއެވެ.

މޮބައިލް ވަރލްޑް ކޮންގްރެސްގައި، އުރީދޫ އިން ވަނީ އެކުންފުނީގެ މަގޭ ޕްލޭން ޕްލެޓްފޯމްގެ އައު އަޕްޑޭޓް ހާމަކޮށް، "އާޓިފިޝަލް އިންޓެލިޖެންސް ބޭސްޑް ޕްރިޑިކްޓިވް ޓެކްނޮލޮޖީގެ" އެހީގައި ހިމަނާފައިވާ އައު ޚިދުމަތްތައް ދައްކާލާފައެވެ.

މަގޭ ޕްލޭންގައި، އަލަށް ތައާރަފުކޮށްފައިވާ ޚިދުމަތްތަކަކީ:

• އުރީދޫގެ ޑޭޓާ، އެސްއެމްއެސް، ކޯލް، އަދި އައިޑީޑީ އެޑްއޯން ތައް، ގާތްތިމާގެ މީހުންނަށް ހަދިޔާކުރެވުން.
• ޚިޔާރުކުރާ ބަޖެޓަކަށް އެންމެ އެކަށީގެންވާ ޕްލޭންތައް ބަލާލެވުން.
• ޓިފިޝަލް އިންޓެލިޖްންސް ޓެކްނޮލޮޖީގެ އެހީގައި، މަގޭ ޕްލޭން މެދުވެރިކޮށް ޚިޔާރުކުރާ އެންމެ މަގުބޫލު ޕްލޭންތައް ބަލާލެވުން.

މަގޭ ޕްލޭންގެ ވަރޝަން 2 ރާއްޖޭގައި ތައާރަފްކުރެވޭނީ، މި މަހުގެ ކުރީކޮޅުއެވެ.