ހަޔާތުގެ ފުރަތަމަ 1000 ދުވަހަށް އަމާޒުކޮށްގެން ހެލްތު ޕްރޮޓެކްޝަން އޭޖެންސީ (އެޗްޕީއޭ) އާއި ޔުނިސެފް ގުޅިގެން "ސޯޝަލް އެންޑް ބިހޭވިއަރ ޗޭންޖް ކޮމިއުނިކޭޝަން ސްޓްރެޓެޖީ" އިފްތިތާހުކޮށްފިއެވެ.
ބުރާސްފަތި ދުވަހު ހޮޓެލް ޖެން ގައި ބޭއްވި ރަސްމިއްޔާތެއްގައި މިނިސްޓަރ އޮފް ހެލްތު އަބްދުﷲ އަމީނާއި، ޔުނިސެފުން ދެކުނު އޭޝިއާއަށް ކަނޑައަޅުއްވާފައިވާ މަންދޫބު ޖީން ގޯ ބައިވެރިވެ ވަޑައިގެންފައިވާއިރު، މި ސްޓްރެޓެޖީ އެކުލަވާލުމުގެ މައިގަނޑު މަޤްސަދަކީ ރާއްޖޭގެ ކުޑަކުދިންގެ ނިއުޓްރިޝަން ހާލަތު ރަނގަޅު ކުރުމަށާއި، ގައިން ގަޔަށް ނާރާ ބަލިތައް ޖެހުމުން މުޖުތަމައު ރައްޖާތެރި ކުރުމުގައި އެހީތެރިވެދިނުން ކަމަށް ހެލްތު މިނިސްޓްރީން ބުނެއެވެ.
މި ރަސްމިއްޔާތުގައި ހެލްތު މިނިސްޓަރ އަބްދުﷲ އަމީން ވާހަކަފުޅުދައްކަވާފައިވާއިރު، މިނިސްޓަރ ވިދާޅުވީ، ކުޑަ ދަރިފުޅު ހެދި ބޮޑުވުމުގައި އެންމެ މުހިއްމު ދުވަސްވަރަކީ ދަރިފުޅު މައިމީހާގެ ރަހިމުގައި ގަތުމާއި ހަމައިން ފެށިގެން ގޮސް އުމުރުން 2 އަހަރުވުމާ ހަމައަށް ނުވަތަ ހަޔާތުގެ ފުރަތަމަ 1000 ދުވަސް ކަމަށާއި، އެ ދުވަސްވަރު ކުޑަކުއްޖާގެ ހެދިބޮޑުވުމަށް ޚާއްސަ ސަމާލުކަމެއް ދޭން ޖެހޭނެ ކަމަށެވެ.
އޭގެ އިތުރުން މި ރަސްމިއްޔާތުގައި ވަނީ މައިމީހާއާއި ކުޑަ ދަރިފުޅުގެ "ކާނާގެ ހަޔާތުގެ ރަން 1000 ދުވަސް" ގެ މައްޗަށް އަލިއަޅުވާލައި ތައްޔާރު ކުރެވިފައިވާ މޯބައިލް އެޕްލިކޭޝަނެއްވެސް ތައާރަފްކޮށްފައެވެ. އެގޮތުން "ޔާގޫތު" ނަމުގައި ތައާރަފް ކުރި މި އެޕްލިކޭޝަން މެދުވެރިކޮށް ކުޑަދަރިފުޅަށް ސިއްހީ ގޮތުން އަޅާލުންދޭންޖެހޭ ގޮތާއި، ފުރިހަމަ ސިއްހަތެއްގައި ހުރުމަށް ބޭނުންވާނެ މުހިއްމު މައުލޫމާތުތައް ލިބިގެންދާނެއެވެ.
މި ރަސްމިއްޔާތުގައި ސިއްހީ ދާއިރާގެ ގިނަ އޮފިޝަލުން ބައިވެރިވެ ވަޑައިގެންފައިވާއިރު، މި ސްޓްރެޓެޖީގެ ކަންކަމުގައި އިސްނަންގަވައިގެން މަސައްކަތް ކުރުމަށް "ފޭސް އޮފް ފަސްޓް 1000 ޑޭސް އޮފް ލައިފް" ގެ ގޮތުގައި ވޮލަންޓިޔަރުން އައްޔަނުކޮށް އަގުވަޒަންކުރުމުގެ ގޮތުން އެ ފަރާތްތަކަށް ހަނދާނީ ފިލައެއް އަރުވާފައިވެއެވެ.
ރާއްޖޭގެ ކުޑަކުދިންގެ ނިއުޓްރިޝަންގެ ހާލަތު ރަނގަޅުވަމުން އައި ނަމަވެސް ރާއްޖެއަށް އަންނަ ތަރައްޤީއާ އަޅާ ބަލާއިރު މި މަސައްކަތް އެކަށީގެންވާ ބާރުމިނެއްގައި ނުދާ ކަމަށާއި، އެގޮތަށް މެދުވެރި ވުމުގައި ދިރިއުޅުމުގައި ގެންގުޅެވޭ އާދަތައް މުހިއްމު ރޯލެއް އަދާ ކުރާ ކަމަށް ހެލްތު މިނިސްޓްރީން ބުނެފައިވެއެވެ.
