އަތޮޅު ކައުންސިލްތައް ދެން އެކުލެވިގެންދާނީ ރަށްރަށުގެ ކައުންސިލްތަކުގެ ރައީސުން ހިމެނޭ ގޮތަށް ކަމަށް ހުޅުމާލެ ދާއިރާގެ މެމްބަރު އަލީ ނިޔާޒު ވިދާޅުވެއްޖެއެވެ.
ފަލަ ސުރުހީ ޕްރޮގްރާމްގައި މެމްބަރު ނިޔާޒު ވިދާޅުވީ ލޯކަލް ގަވަމެންޓް އޮތޯރިޓީ (އެލްޖީއޭ) ހަގީގަތުގައި އުފެދިފައި އޮތީ ކައުންސިލްތައް ބާރުވެރިކުރުވައި ކައުންސިލްތައް ހިންގުމަށް މަގުފަހިކޮށްދިނުމަށް ކަމަށެވެ. ނަމަވެސް އެލްޖީއޭ ފާހަގަކުރެވުނީ ކައުންސިލުންނާ ދޭތެރޭގައި ހަމައެކަނި ފިޔަވަޅު އަޅާ ބައެއްގެ ގޮތުގައި ކަމަށެވެ.
މެމްބަރު ނިޔާޒު ވިދާޅުވީ 2014 އިން 2018 އާ ދެމެދުގައި 106 ކައުންސިލަރުންނާ ދޭތެރޭގައި ލޯކަލް ގަވަރމެންޓް އޮތޯރިޓީން ފިޔަވަޅު އަޅާފައި އެބައޮތް ކަމަށާއި، ރައްޔިތުންގެ މަޖިލީހުގެ ލާމަރުކަޒީ ކޮމެޓީގައި މިހާރު އެމައްސަލަ ދިރާސާކުރަމުންދާ ކަމަށެވެ.
މެމްބަރު ނިޔާޒު ވިދާޅުވީ މަގުސަދަކީ ކައުންސިލްތައް ބާރުވެރިކުރުވުން ކަމަށާއި، ބާރުތައް ދޫކުރުމަށްޓަކައި ގާނޫނަށް ގެންނަންޖެހޭ ބަދަލުތައް ވެސް ގެންނާނެ ކަމަށެވެ. ލާމަރުކަޒީ ގާނޫނަށް ހިމަނަންޖެހޭ ބައިބައި އެޖެންޑާ19ގައި ހިމަނާފައިވާ ކަމަށާއި، 19 ވަނަ މަޖިލީހަށް މިފަހަރު ހުށަހަޅާ މިއިސްލާހުތައް ފާސްކުރެވިގެންދާނެ ކަމަށް މެމްބަރު ނިިޔާޒު ވިދާޅުވިއެވެ.
މެމްބަރު ނިޔާޒު ވިދާޅުވީ ކައުންސިލްތަކުގެ ގާނޫނަށް ގެންނަ ބޮޑެތި ބަދަލުތަކުގެ ތެރޭގައި އަތޮޅު ކައުންސިލްގައި އެކުލެވިގެންދަނީ ރަށްރަށުގެ ކައުންސިލްތަކުގެ ރައީސުން ހިމެނޭ ގޮތަށް ކަމަށާއި، މުޅި އަތޮޅުން އެކަކު އަތޮޅު ވެރިޔާ ގޮތަށް ނުވަތަ އަތޮޅު ކައުންސިލަރަކު ނެގިގެންދާނެ ކަމަށެވެ. މިމަސައްކަތް ކުރިއަށް ގެންދާނީ އަތޮޅުގެ ހުރިހާ އެންމެން ވޯޓުލައިގެން ކަމަށް މެމްބަރު ނިޔާޒު ވިދާޅުވިއެވެ.
އެގޮތުން އަޅުގަނޑުމެންނަށް 8 އަހަރު ދުވަހުގެ ތަޖުރިބާ ފާހަގަކުރެވުނީ ރަށްތައް ހިންގުމުގައި އިހުތިޔާރު މަރުކަޒީ ސަރުކާރަށް ދީފައިނުވާކަން. އެއީ ވަރަށް ބޮޑު މައްސަލައެއް ގޮތުގައި. އިދާރީ ގޮތުންނާއި މާލީ ގޮތުން މުއައްޒަފުން އަސްލު ޓެކްނިކަލް މުއައްޒަފުންނާއި އަދި އެކަމަށް ބޭނުންވާ އިދާރީ މުއައްޒަފުން ވެސް ކައުންސިލްތަކުގައި ނެތްކަން އަޅުގަނޑުމެންނަށް ފާހަގަވޭ.މެމްބަރު ނިޔާޒު ވިދާޅުވި
މެމްބަރު ނިޔާޒު ވިދާޅުވީ މިފާއިތުވި އަހަރުތަކުގައި ސިޔާސީ ފަށަލައާ އިދާރީ ފަށަލާގެ ދެމެދު މައްސަލަ ޖެހި ކައުންސިލްތައް ހިންގުން ހުއްޓިފައިވާ ކަމަށާއި، ކައުންސިލްތަކާއި ސަރުކާރުގެ މިނިސްޓްރީތަކާ ދެމެދު ހިޔާލުތަފާތުވުން އުފެދި ޚިދުމަތް ދިނުމަށް ހުރަސް އަޅިފައިވާ ކަމަށެވެ.
މީގެ އިތުރުން މެމްބަރު ނިޔާޒު ވިދާޅުވީ މިފާއިތުވެގެންދިޔަ އަހަރުތަކުގައި ކައުންސިލްތަކުގެ އިހުތިސާސްއަކީ ކޮބައިކަމާއި، އެމީހުންގެ މިލްކުވެރިކަމަކީ ކޮބައިކަން މިހާތަނަށް ފާހަގަކޮށްދެވިފައި ނުވާ ކަމަށެވެ. އަދި ކައުންސިލްތަކާއި ކައުންސިލްގެ ވަސީލަތްތައް ސިޔާސީ ބޭނުންތަކަށް ބޭނުންކޮށްފައިވާއިރު ލާމަރުކަޒު ކުރުމުގެ ރޫހާ ހިލާފަށް ގާނޫނަށް ބޮޑެތި ބަދަލުތައް ގެނެސްފައިވާކަން މެމްބަރު ވިދާޅުވިއެވެ.
މިސާލަކަށް 2014 އިން ފެށިގެން 2018 އަށް ލާމަރުކަޒީ ނިޒާމަށް 8 އިސްލާހު ގެނެވިފައި. މި 8 އިސްލާހުން ވެސް ހާސިލްވި އެއްޗަކީ ކައުންސިލްތަކަށް ލިބިފައިހުރި ބާރު އަނެއް ކާ ވެސް މަރުކަޒީ ސަރުކާރުތައް ނަގާ އަދި ކައުންސިލްތައް ހިންގުމަށް ހުރަސްއެޅުމަށް ހުރި ގާނޫނުގެ ބަދަލުތަކެއްކަން އަޅުގަނޑުމެންނަށް ފާހަގަވި.މެމްބަރު ނިޔާޒު ވިދާޅުވި
މެމްބަރު ނިޔާޒު ވިދާޅުވީ ކައުންސިލްތަކަށް ދިމާވާ މިގޮންޖެހުންތައް ނައްތާލުމަށް އެކި މަޝްވަރާތައް ކުރެވި މިކަންކަން ހައްލުކުރުމަށް އެއްބަސްވުމަކަށް އާދެވިފައިވާ ކަމަށެވެ. އަދި ގާނޫނު އަލުން ރައްޔިތުންގެ މަޖިލީހަށް ލެވޭ ހިސާބަށް ގޮސްފައިވާކަން މެމްބަރު ފާހަގަކުރެވިއެވެ.
