ބައިނަލް އަގްވާމީ ރަހްމަތްތެރިކަމުގެ ދުވަސް މިއަދު ފާހަގަކުރަނީ
30 ޖުލައި 2019 | އަންގާރަ 04:02މި ހަރަކާތް އޮންނާނީ މިއަދު ހަވީރު
ވީހާވެސް ގިނަ ބަޔަކު މި ހަރަކާތުގައި ބައިވެރިވުމަށް މިނިސްޓްރީން އެދޭ
2019 ވަނަ އަހަރުގެ ބައިނަލް އަގްވާމީ ރަހްމަތްތެރިކަމުގެ ދުވަސް (އިންޓަރނޭޝަނަލް ފްރެންޑްޝިޕް ޑޭ) ދުވަސް ފާހަގަކުރުމުގެ ގޮތުން ބާއްވާ އަތުގުޅާލުމުގެ ހަރަކާތް އަންގާރަ ދުވަހު ހަވީރު އޮންނާނެއެވެ.
ހޯމް މިނިސްޓްރީން ބުނީ މި ހަރަކާތް އޮންނާނީ 30 ޖުލައިގެ ހަވީރު 4.45 ގައި ބޮޑު ތަކުރުފާނު މަގު "ރިންގު ރޯޑު" ގައި ކަމަށެވެ. މި ހަރަކާތުގައި ރާއްޖޭގައި ދިރިއުޅެމުން އަންނަ އެކި ގައުމުތަކުގެ މީހުން ވެސް ބައިވެރިވާނެ ކަމަށް ހޯމް މިނިސްޓްރީން ވަނީ ބުނެފައެވެ
ހޯމް މިނިސްޓްރީން ބުނީ އަތުގުޅާލުމުގެ މި ހަރަކާތުގައި ވީހާވެސް ގިނަ މީހުން ބައިވެރިވާން އެދޭ ކަމަށާއި، ހަރަކާތުގައި ބައިވެރިވާން އަންނަ ފަރާތްތަކުން ، ގައުމީ ކުލައެއްގެ ހެދުމުގައި އައުމަކީ ވަރަށް ބޮޑު އެދުމެއް ކަމަށެވެ. އަތުގުޅާލުން ކުރިއަށްދާ ވަގުތު ގައުމީ ދިދަ، ހުރިހާ އެންމެންނަށް ފޯރުކޮށްދޭނެ ކަމަށް މިނިސްޓްރީން ވަނީ ބުނެފައެވެ.
މިއީ މި ހަރަކާތް ރާއްޖޭގައި ފާހަގަކުރާ ފުރަތަމަ ފަހަރެވެ.
އަތުގުޅާލުމުގެ ހަރަކާތް ކުރިއަށްދާ ވަގުތު ބޮޑު ތަކުރުފާނު މަގުގައި، މާލެ ވަށާ އިންޖީނުލީ އުޅަނދު ދުއްވުން ޓްރާންސްޕޯޓް މިނިސްޓްރީން ވަނީ މަނާ ކޮށްފައެވެ. ބޮޑުތަކުރުފާނުމަގުގައި، އިންޖީނުލީ އެއްގަމު އުޅަނދު ދުއްވުން މަނާކޮށްފައިވާ ގަނޑިތަކަކީ ހަވީރު 4.30 އިން 6.00 އަށެވެ.
އެ ގަނޑިތަކުގައި ދުއްވޭނީ ސަލާމަތީ ބާރުތަކުން ބޭނުންކުރާ އިންޖީނުލީ އެއްގަމު އުޅަނދާއި، އެމްބިއުލެންސް، އާ ފުރާ މީހުން ބޭނުންކުރުމަށް ހުއްދަ ދެވޭ އުޅަނދާއި، ހާއްސަ އެހީއަށް ބޭނުންވާ މީހުން ދުއްވުމަށް ހާއްސަ ކުރެވިފައިވާ އުޅަނދުތަކާއި، ޕަބްލިކް ޓްރާންސްޕޯޓުގެ ގޮތުގައި ދެމުން ގެންދާ ބަހުގެ ހިދުމަތުގެ އިތުރުން އެ ގަޑިތަކުގައި ދުއްވުމުގެ ހުއްދަ ދެވޭ އުޅަނދުތައް ކަމަށް ޓްރާންސްޕޯޓް މިނިސްޓްރީން ވަނީ ބުނެފައެވެ.
